Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ГАЛАТИЯНЬ КЕМИКУРОТНЕНЕНЬ ПАВОЛОНЬ СЁРМАЗО

Глава 2

Павол вастови лия апостолтнэнь марто

1Мейле, кемнилее иень ютазь, мон таго якинь Ерусалимев Варнава марто ды Титэньгак сайния мартон.2Сонсь Пазось мерсь монень чартензэ-неявксонзо вельде молемс тов. Ды тосо мон ёвтнинь сыненст те Кенярксов кулядонть, конань пачтян лия раськетнень туртов. Башка вастовкшнынь ды кортынь сехте содавикс прявтнэнь марто. Мон истя теинь сень кисэ: илязо ёма стяко икелень ды неень монь важодемась.3Ды вана: сынь натой эзть кармавто теемс киськепень керявтомаяк Титнэнь, кона ульнесь мартон, куш сон – грек.4Минек юткс салава совасть кемицякс прянь невтицят. Сынь яксесть-ванстнесть минек мельга ды се олячинть мельга, кона миненек максозь Христос Иисусонь пельде. Сынст ульнесь мелест мекев велявтомс минек Моисеень Коенть урексчис.5Сынст вешематненень минь прянок эзинек максо ве липкескак сень кисэ: ванстомс тынк туртов Кенярксов кулянть видечинзэ.

6А вана кемикуронь прявтнэ, конатне лововсть содавиксэкс – кить сынь истят ды мезекс ульнесть, монень ялатеке, эдь Пазонть икеле весе ломантне вейкеть – сынь, неть содавикстнэ, мезеяк лия монь пельде эзть вешне.7Мекевланк, сынь парсте несть: монень максозь Кенярксов кулянть пачтямс лия раськетнень туртов истя жо, кода Петранень – еврейтнень туртов.8Се, Конась Эсь вийсэнзэ теизе Петрань еврейтнень туртов апостолокс, моньгак теимим лия раськетнень туртов апостолокс.9Яков, Кефа ды Иоанн, конатнень ловсть кемикуронь юрокс-нежекс, чарькодизь тевенть, кона монень максозь Пазонть чанстензэ коряс. Сестэ сынь максызь монень ды Варнаванень эсь кедест кода вейсэнь тевень теема тешкс. Минь прынек ве мельс: миненек молема лия раськетненень, сыненст – еврейтненень.10Сынь энялдсть минек икеле ансяк вейкеде: а стувтнемс Ерусалимень кемикуронь кажовтненень лездамодо, мезенть мон свал покш виень путозь топавтангак.

Павол мурни Петрань

11Зярдо Петра сась Антиокияв, сестэ мон видьстэ кортынь сонзэ каршо, секс мекс сон прянзо ветясь а видестэ.12Тевесь сеньсэ: Ерусалимстэ Яковонь ломантнень самодо икеле Петра ярснесь-симнесь лия раськень кемицятнень марто вейсэ. Зярдо жо сеть састь Антиокияв, сестэ Петра потась лия раськень кемицятнень эйстэ ды явсь. Сон пелезевсь керявтомань кисэ аштицятнеде.13Петра мельга истя жо кавто чачосотнень ладсо кармасть ветямо пряст лия еврейтнеяк. Сынст кувалма мик Варнаваяк тусь виде ки лангсто.14Мон неинь: сынь молить аволь виде киява, пурдасть Кенярксов кулянть видечинзэ эйстэ. Секс мон весе кемицятнень марямга меринь Петранень: «Бути тон, еврей, эрят кода лия раськень ломань, аволь еврей ладсо, сестэ мекс тон лия раськенсетнень кармавтат эрямо еврей ладсо?»

Ансяк Христоснэнь кемемась максы чумовтомочи

15Минь – чачомань коряс еврейть, аволь “лия раськень пежетев ломанть”, кода тенст мерить.16Ялатеке минь содатано: ломанесь ловови Пазонть икеле чумовтомокс ансяк Иисус Христоснэнь кемеманть вельде, аволь Моисеень Коень топавтоманть вельде. Секс миньгак кемезевинек Христос Иисуснэнь: теевемс чумовтомокс Христоснэнь кемеманть вельде, аволь Коень топавтоманть вельде. Эдь Коень топавтоманть вельде вейкеяк ломань Пазонть икеле чумовтомокс а ловови.

17Минь бажатано теевемс Пазонть икеле чумовтомокс Христос марто вейсэндямонть кувалт. А вана бути теке марто неяви: миньгак, еврейтне, истят жо пежетевть, – арази сестэ те невти: Христос лезды кастомс пежетенть? Кодаяк аволь!18Ансяк бути мон карман одс стявтомо сень, мезенть калавтыя икеле, сестэ теньсэ невтьса: мон – Коень каладыця.

19Коесь ялатеке монь куловтымим, ды секс мон ней Коенть туртов кулозян, Пазонть туртов эрямга. Мон теке крёст лангс вачкодезян Христос марто.20Лисни: монь эйсэ ней эри Христос, уш аволь монсь. Зярс мон эрян мода лангонь рунгсонть, мон эрян Пазонь Цёрантень кемеманть вельде. Сон вечксамам монь ды максызе Эсь прянзо монь кисэ.21Мон а ёртса Пазонь чанстенть. Эдь бути Коень топавтоманть вельде тееват чумовтомокс, сестэ Христос кулось стяко!


предыдущая глава Глава 2 следующая глава