Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 6

Ловодо прянк кулозекс пежетенть туртов – эрицякс Христосонь туртов

1Истямо ладсо, мезе ёвтамс тень коряс? Карматано, кода икелеяк, тейнеме пежетть, Пазонь чанстенть кастомга? Кодаяк арась!2Минь пежетенть туртов кулынек! Кода эно миненек седе тов эрямс пежетьсэ?3Арази тынь а содатадо: зярдо минь нававтынек прянок Христос Иисус марто сюлмавомань кисэ, теньсэ уш весе минь кулынек Сонзэ марто.4Истямо ладсо, нававтомсто минь кулынек Сонзэ марто ды ульнинек калмазь Сонзэ марто вана мекс: кода Христос кулозьстэ вельмевтезь Тетянть инексчинзэ вийсэ, истя жо миньгак карматано эрямо од эрямосо.5Эдь бути Сонзэ куломась кармась улеме теке минек куломакс ды теньсэ минь сюлмавинек-тапардавинек мартонзо вейс, сестэ минь Сонзэ ладсо ультяно вельмевтезьгак мартонзо од эрямос.6Минь содатано: икелень ломанесь минек эйсэ кулось Христос марто крёст лангсо сень кисэ: кадоволь вийтемекс минек пежетев обуцянок, ды истя минь лоткавлинек улеме пежетень урекс.7Эдь кулозесь олякстомтозь пежетенть эйстэ.

8Минь кемтяно: бути кулынек Христос марто, сестэ эрямояк карматано мартонзо.9Эдь минь содатано: Христос, кона кулозьстэ вельмесь, ней, нама, зярдояк а кулы. Куломанть уш арась азорксчизэ Сонзэ лангсо.10Зярдо Христос кулось, Сон весть ды допрок кулось пежетенть туртов. Эрямось, конаньсэ Сон ней эри, алтазь Пазонть туртов.11Истя тыньгак, конат сюлмазь минек Христос Иисус Азоронть марто, ловодо эсь прянк кулозекс пежетенть туртов ды эрицякс Пазонть туртов.

12Кадык пежетесь а ули уш азорокс тынк кулыця рунгонть лангсо, ды илядо кунсоло сонзэ визьксэнь мельтнень.13Илинк максо пежетентень рунгонь кодамояк пельксэнк берянь тевень теема кедьёнксокс. Мекевланк, алтынк эсь прянк Пазонтень, кода ломанть, конат ютасть куломасто эрямос. Эсь рунгонь пельксэнккак максынк Пазонтень паро тевень теема кедьёнксокс.14Кадык пежетесь уш а ули тынк азорокс, секс мекс тынь ней эрятадо Пазонь чанстенть ало, аволь Коенть ало.

Тынь олякстомтозь пежетенть эйстэ

15Истя мезе эно? Паряк, карматано тейнеме пежетть, бути минь ней эрятано Пазонь чанстенть ало, аволь Коенть ало? Кодаяк арась!16Арази тынь а содатадо: бути тынь максынк эсь прянк киньгак кедь алов, сестэ тынь алкукскак кармиде улеме сень урекс, кинь кунсолотадо? Эли тынь уреть пежетентень, мезесь вети куломас, эли тынь Пазонь кунсолыця уреть, мезесь вети тынк Сонзэ икеле чумовтомочис.17Тынь зярдо-бути ульниде пежетень урекс. Ней, – сюкпря Пазонтень, – весе седейсэнк кармиде кунсоломо се тонавтоманть, конань алов тынь максозтядо.18Тынь олякстомтозь пежетень урексчистэ, паронь теиця урекс улемга.19Монень савкшны теде ёвтнемс се кельсэнть, конасонть весе свал кортыть, секс мекс лиякс тынь а чарькодтядо. Тынь икеле максынк рунгонь весе пельксэнк аваньксчинь ды койтемечинь урексчис, кона ветясь койтеме эрямос. А ней вана максынк рунгонь весе пельксэнк паро тевень урексчис, кона ветятадызь Пазонтень алтазь эрямос.

20Зярдо тынь ульниде пежетень урекс, сестэ тынь ульниде олясо паро тевень теемадо.21Кодамо жо лезэ тынь саиде тень эйстэ? Саиде сень, мезде ней виздтядо, секс мекс сонзэ пезэ – кулома.22Ней жо тынь олякстомтозь пежетенть эйстэ ды теевиде Пазонть “урекс”. Весе тынк эрямонк уш ней алтазь Пазонтень, ды сонзэ песэ максови тыненк пингеде пингень эрямо.23Пежетесь панды эсь уренстэнь куломасо. Пазось Эсь чанстензэ коряс кази пингеде пингень эрямо минек Христос Иисус Азоронть марто.


предыдущая глава Глава 6 следующая глава