Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 15

Весе вейсэ шнадо Пазонть!

1Миненек, кемемасо виевтненень, эряви улемс нежедьксэкс-кирдицякс седе лавшотненень, эсь прянок туртов апак савто.2Кадык эрьвась минек эйстэ савты кемиця ялганстэнь ды арси седе, мезесь канды тензэ паро ды виевгавты кемеманзо.3Христоскак савтсь аволь Эстензэ. Мекевланк, Сёрмадовксось корты Сондензэ истя: «Тонь покордыцятнень покордамотне прасть-понгсть Монь лангс».4Весе, мезесь ёвтазь Сёрмадовкссо, сёрмадозь минек тонавтомань кисэ. Те книгась максы тенек цидярдома ды кемекстамо, минек седейнежедьксэнть а ёмавтомга.5Кадык Пазось, цидярдомань ды кемекстамонь лисьмапрясь, лезды тыненк улемс эсь юткованк ве мельсэ, Христос Иисус мельга молезь.6Сестэ весе тынь ве мельсэ-седейсэ ды ве валсо карматадо шнамо Пазонть, минек Азоронть Иисус Христосонь Тетянзо.

7Секскак, Пазонть шнамонзо кисэ, саеде вейкенк-вейкенк эйсэ эсь седеезэнк истя, кода Христоскак саидизь тынк Эсь седеезэнзэ.8Мон кирдян мельсэнь вана мезе: Иисус Христос сась еврейтненень важодеме ды Пазонть видечинзэ невтеме. Сон сась топавтомо алтамотнень, конатнень Пазось максынзе кезэрень пингень ине тетятненень.9Истя жо Сон сась сень кисэяк: кадык лия раськетнеяк шнасызь Пазонть Сонзэ седеймарямонзо кисэ, кода ёвтазь Сёрмадовкссо:
«Секскак карман шнамот лия раськетнень ютксо
ды карман шнамо Тонь леметь моравтозь».
10Сёрмадовкссо истяяк ёвтазь:
«Лия раськетне!
Кенярдодо Пазонь кочкавт раськенть марто вейсэ!»
11Ды истяяк:
«Весе лия раськетне! Шнадо Азоронть!
Весе раськетне, кепедеде Сонзэ инексчинть!»
12А вана Исайя корты истя:
«Иессеень родсто-юрсто пургонды Лисевкс,
конась касы-кепети весе раськетнень ветицякс.
Сонзэ лангс сынь кармить седейсэст нежедеме».
13Кадык Пазось, седейнежедьксэнь лисьмапрясь, пештятадызь тынк, конат кемить, покш кеняркссо ды седейоймамосо. Кадык истя жо тынк седейнежедьксэнк апак лотксе касы-кепети Иневанькс Оймеялтонть вийсэ.

Павол ёвтни эсь важодемадонзо

14Кемиця ялган, мон зярдояк а кавтолдан тень кувалт: тынь пештязь паро арсемасо, тынк улить ламо эрьва кодамо содамочинк ды маштадо путомс превс вейкенк-вейкенк.15Ялатеке мон сёрмадан тенк, кемиця ялган, – кона-кона таркатнесэ покш смелчи марто, – арсян ледстямс мелезэнк кой-кона тевтнень. Мон тень теян секс, мекс Пазось макссь монень чансть,16улемс Иисус Христосонь важокс лия раськетнень туртов. Мон поп ладсо топавтан эсь важодемам: пачтян Пазонь Кенярксов Кулянть ды тень вельде теян лия раськетнестэ Пазонтень мельстуиця анокс, кона алтазь Тензэ Иневанькс Оймеялтонть вельде.

17Христос Иисусонь шнамонзо кисэ мон каштангалян эсь важодемасон Пазонтень.18Мон а пелян кортамс ансяк седе, мезе монь вельде тейсь Христос, лия раськетнень Пазонть кунсоломас ветямга. Сон тень теизе монь валсо ды тевсэ,19тамашань ды дивань тешксэнь вийсэ, Пазонь Оймеялтонть вийсэ. Истямо ладсо, мон ёвтния Христосто Кенярксов кулянть эрьва кува, Ерусалимстэ саезь Иллирикев пачкодемс.20Мон свал бажинь ёвтнемс Кенярксов кулянть ансяк тосо, косо Христосонь лемензэ зярс эзизь марсе. Монь арасель мелем путомс се кудо юртонть лангс, конань ушодызь лият.21Ульнесь мелем топавтомс Пазонь Сёрмадовксонь валтнэнь:
«Сеть, кинень Сондензэ эзть ёвтне, несызь,
ды сеть, конатне эзть марсе, чарькодьсызь».

Паволонь мелезэ содавтомс Рименть

22Секс мон те шкас эзинь саво тыненк, куш ламоксть пурнакшныньгак.23А вана ней мон прядынь тевень неть таркатнесэ ды кеман: паряк, топавтови монь ламо иень бажамом – самс-вастовомс тынк марто.24Монь ули мелем Испанияв молемстэ самс тенк, неемс тынк ды зярскак кенярдокшномс мартонк вастовомасонть. Кеман, тынь мейле макстадо тень лезкс сеньсэ, мезе монень эряви те якамонть туртов.

25Ней мон кирдян ким Ерусалимев, ков эряви кандомс лезксэнть Пазонь ломантненень.26Кортамось моли седе: Македониянь ды Акайянь кемикуротне эсест мельсэ пурнасть лезксэкс ярмакт Ерусалимень кемиця ялгатненень, конат эрить арасьчисэ.27Сынь сынсь тень теизь, ды алкукскак сынсь долксот неть арасьчисэтнень икеле. Бути Ерусалимсэ кемиця еврейтне явизь сынст марто эсест оймеялтонь сюпавчист, сестэ ней неть, лия раськень кемицятнеяк, кадык лездыть тенст мода лангонь эсест сюпавчисэст.28Истя, зярдо мон те тевенть топавтса ды пачтясынь тенст весе сеть ярмактнень, конат ульнесть тенст пурназь, сестэ туян Испанияв ды ютамсто содавттадызь тынк.29Мон содан: зярдо сан тенк, кандса тыненк Христосонь Кенярксов кулянь чанстямонь-баславамонь пешксечинть.

30Кемиця ялган, энялдан тенк минек Иисус Христос Азоронть лемсэ ды Оймеялтонть казевть вечкемасонть: лездадо тень монь тюремасонть. Ознодо кисэнь Пазонтень:31Иудеянь акемицятне иляст тее монень зыян, ды Пазонь ломантне Ерусалимсэ саевлизь паро мельсэ лезксэнть, конань мон кандан тов.32Ды теде мейле мон кенярдозь сован тыненк, бути ули тенень Пазонть мелезэ, ды оймазь, тынк марто вейсэ ютавтса шканть.33Пазось, седейоймамонь лисьмапрясь, улезэ весень тынк марто! Аминь.


предыдущая глава Глава 15 следующая глава