Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 17

Пежетте ды кемемадо тонавтома

1Сестэ Иисус мерсь Эсензэ тонавтницятненень: «Манявкстнэ, конат ветить ломантнень пежетьс, свал сыть. Ансяк покш зыян ули сенень, конань вельде сынь сыть!2Кие совавты пежетьс куш вейкешка неть вишкинетнень-асодавикстнэнь ютксто, сенень улевель седе паро, бути кирьгазонзо поводевельть покш яжамо кев ды ёртовлизь иневедьс!3Ды секскак ванодо, ванстынк прянк!

Бути сови пежетьс тонь каршо малавиксэть, ёвтык тензэ эсь пежетензэ, ды бути сон карми янксеме, нолдыть чумонзо.4Бути сон сисемксть чинтень пежетьс сови тонь каршо ды сисемксть чистэнть янкси икелеть, нолдыть чумонзо».

5Апостолтнэ вешсть Азоронть кедьстэ: «Виевгавтык кемеманок!»6Азорось каршост мерсь: «Улиндеряй тынк кемеманк куш горчица видьмешка, тынь меревлиде те покш чувтонтень: “Таргик эсь прят юрнэк-мезнек ды озавтык иневедьс”, – сон кунсоловлидизь».


Уледе вадря важокс

7«Мерьсынек, ули тынк важонк, кона соки мода эли ваны реветь. Зярдо сон сы паксясто, арази мертядо тензэ: “Совак ды куроксто озак столь экшс?”8Арась, тынь сонензэ мертядо: “Анокстак монень ярсамопель, карксык рунгот ды монь ярсамо-симема шкасто якак мельган. Тонсь ярсамо-симеме кармат мейле”.9Арази тынь ёвтатадо важонтень сюкпря сень тееманть кисэ, мезесь тензэ кармавтозель? Истя а арсян.10Истя тыньгак, зярдо тейсынк весементь, мезе тенк кармавтозель, ёвтадо: “Минь ансяк уреть, конат теизь кармавтозенть ды а учить сень кисэ кодамояк сюкпря”».


Проказасо кемень сэредицятнень шумбралгавтомаст

11Ерусалимев молемстэ Иисус ютась Самария ды Галилея мастортнэнь юткова.12Вейке велинес совамсто Иисусонь каршо понгсть проказа ормасо сэредиця кемень ломанть. Сынь лоткасть ве ёнов13ды серьгедсть: «Иисус, Тонавтыця, ульть миненек седеймарицякс!»14Зярдо Иисус сынст неинзе, Сон мерсь: «Азёдо, невтинк прянк поптнэнень». Ды тов молемстэ сэредицятне ормадост ванськадсть.15Вейкесь юткстост, зярдо маризе эсь прянзо шумбракс, велявтсь мекев ды кармась верьга вайгельть Пазонть шнамо.16Сон прась Иисусонь пильгс ды, модас сюконязь, ёвтась Тензэ покш сюкпря. Те ломанесь ульнесь Самариянь эриця.17Иисус кевкстизе: «Нать а кеменест ванськадсть? Косот лия вейксэтне?18Мекс ансяк те, лия раськень ломанесь, велявтсь Пазонть шнамо?»19Ды мерсь Иисус те ломанентень: «Стяк ды азё, кемемат шумбралгавтынзеть тонь».


Зярдо сы Пазонь Инязорксчись?

20Весть фарисейтне кевкстизь Иисусонь: «Зярдо сы Пазонь Инязорксчись?» Сон каршост ёвтась: «Пазонь Инязорксчись сы аволь кодамояк неявикс тешкс марто.21Секскак кияк а мереви: “Сон вана тесэ!” эли “Сон тосо!” Ванодо: Пазонь Инязорксчись тынк эйсэ».

22Мейле Иисус мерсь Эсензэ тонавтницянзо туртов: «Вана сы истямо шка, зярдо сы тыненк покш мель неемс куш ве чис Ломантнень Цёранть, ансяк а несынк.23Ды зярдо мерить тенк: “Сон вана тесэ!” эли “Сон тосо”, аштеде таркасонк, илядо капша чиеме кортыцятнень мельга.24Кода ёндолонь кивчкадемась валдомты менеленть пестэ пес, истя карми неявомо Ломантнень Цёраськак само чистэнзэ.25Ансяк васняяк Сонензэ сави ютамс ламо пиштемат, ды неень пингень ломантне велявтсызь седеест эйстэнзэ.26Кода ульнесь Ноень читнестэ, истя карми Ломантнень Цёранть читнестэяк.27Ломантне ярснесть, симнесть, урьвакстнесть ды лиснесть мирденень се чинть самс, зярдо Ной совась иневенчес. Мейле сыргась инечадысь, конась весень ваявтынзе.

28Карми улеме истя, кода ульнесь Лотонь шкатнестэ: весе ярснесть, симнесть, рамсесть, микшнесть, виднесть, тейнесть кудот.29Ансяк се чистэнть, зярдо Лот тусь Содом ошстонть, менельстэ пиземекс прась тол ды палыкандал, конась маштынзе весе эрицятнень.30Истя карми улеме те шкастонтькак, зярдо мекев сы Ломантнень Цёрась.31Се чистэнть, кие стардови кудо лангс ды ули-парозо кадови кудо потс, илязо валгоне парочинть кисэ. Кие стардови паксяс, илязо велявтне мекев кудов.32Мельсэ кирдеде Лотонь нинть!33Кие снарты ванстомс эсь эрямонзо, се ёмавтсы сонзэ. Кие ёмавтсы эсь эрямонзо, се ванстсы сонзэ.34Видестэ тенк кортан: те вестэнть кавто ломантне кармить удомо ве тарка лангсо – вейкесь эйстэст карми улеме саезь Пазонтень, омбоцесь – кадозь.35Кавто ават вейсэ кармить товонь яжавтомо. Вейкесь эйстэст ули саезь Пазонтень, омбоцесь – кадозь.36Кавто цёрат кармить улеме паксясо: вейкесь эйстэст карми саезь Пазонтень, омбоцесь – кадозь».37Ды тонавтницятне кевкстизь Иисусонь: «Азоро, косо те весе карми улеме?» «Косо кулозь ракшась, тов пуромить раужо варакатнеяк», – валмеревкссэ каршост мерсь Иисус.



*а 17:29 палыкандал – сера


предыдущая глава Глава 17 следующая глава