Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 1

1Павол, кона Пазонть мелензэ коряс аравтозь Иисус Христосонь апостолокс, ды Тимофей кемиця ялгась кучить шумбракстнемат Пазонь кемикуронтень Коринф ошсо, истя жо Пазонь весе ломантненень, конат эрить Акайянть келес.2Чансть ды седейоймамо тенк Пазонть, минек Тетянть, пельде ды Иисус Христос Азоронть пельде.

Пазось лездыця ды оймавтыця

3Улезэ шназь-чанстязь минек Иисус Христос Азоронть Тетязо ды Пазозо! Сон – седеймариця Тетя ды свал минек оймавтыця-кемекстыця Паз.4Сон минек оймавты-кемексты эрьва кодамо стакачисэнек. Сестэ минеккак саты виенек оймавтомс-кемекстамс эрьва кодамо стакачитнес понгозтнень секе оймавтоманть эйсэ, конаньсэ Сон кемексты минек.5Кода Христосонь кисэ стака пиштематне-майсематне певтеме прыть минек лангс, истя жо Христос вельде Пазось певтеме оймавты-кемексты минек.6Зярдо минь кирдтяно стакачить, те улияк тынк оймавтоманк ды идеманк кисэ. Те лезды тенк цидярдозь кирдемс сеть майсематнень, конатнень кирдтяно миньгак.7Минь кемтяно: тынь весементь цидярдсынк. Ды зярдо Пазось оймавты-кемексты минек, сестэ те оймавтомась ули миненек тынк оймавтоманк ды идеманк кисэ. Минь содатано: кода тыненккак максови эсенк таликанк минек пиштеманть эйстэ, истя жо Пазось макссы тыненк оймавтомань-кемекстамонь таликанккак.

8Минек меленек, кемиця ялгат, ёвтнемс тенк сеть стакачитнеде, конат пракшность минек лангс Асия ёнкссо. Те ульнесть истят стакат, истят акирдевикс пиштемат, конатнень кувалт минь эзинек кемеяк кадовомс эрицякс.9Миненек марявсь: минь уш судязтяно куломас. Истя лиссь сень кисэ: а кадомс миненек кодамояк кемема-нежедема эсь лангозонок, кадык жо минек нежедемась ули ансяк Пазонть лангс, кона мик кулозьстэяк вельмевти.10Те Сон менстимизь минек истя малав сазь куломадонть! Ды икелепелевгак Сон менстьсамизь. Минь Сонзэ лангс кемтяно: нама, таго менстьсамизь,11бути тыньгак тенень карматадо лездамо эсь озномасонк. Сестэ кепети Пазонтень сюкпря, конань ёвтасызь ламот ине чанстензэ кисэ, конань Сон кази миненек ламо озноманк каршо!

Паволонь Коринфев самозо кувать кирдевсь

12Минь шнатано прянок вана мейсэ: свал эрьва косо ды седе пек тынк ютксо минь эринек оймень ды седеень панжозь, кода тукшны Пазонть мельс. Теде корты минек ванькс оймеёжоськак. Прянь ветямосонок минь нежединек Пазонь чанстенть лангс, аволь ломанень превейчинть лангс.13Минь сёрмадтанояк тыненк эсь сёрмасонок ансяк сень, мезесь тенк ловнови ды чарькодеви. Мон кеман: тынь педе пес чарькодьсамизь минек,14кода уш аламодо нейгак чарькодимизь. Сестэ минек Иисус Азоронть само чистэнть тынь карматадо прянк шнамо минек эйсэ, кода миньгак шнатано прянок тынк эйсэ.

15Тенень кемезь, мон сайнинь мель содавтомс тынк васенцекс ды кандомс тенк кавксть чансть.16Мон арсинь тынк содавтомс Македонияв молемстэ, а вана мейле Македониясто велявтомсто таго совамс тенк, ды сестэ тынь пурнавлимизь-сэрнявлимизь Иудеяв.17Зярдо мон сынь истямо мельс, арази теньсэ мон невтия эсь валом лангсо аволь свал аштемам? Арази мон ветян эсь прям кода те масторлангонь ломань? Арази ули обуцям-коем теке жо шкастонть меремс «эно, эно» ды «арась, арась»?18Сонсь кемевикс Пазось неи: монь валоськак истя жо кемевикс, ды зярдояк мон эзинь ёвтне «энояк» ды «араськак».19Эдь Пазонь Цёраськак, Иисус Христос, зярдояк а ёвтни «энояк» ды «араськак». Сонзэ эйсэ ансяк «эно»! Сондензэ тыненк пачтинек минь: Силуан, Тимофей ды мон.20Кадык Пазонь алтамотнеде ламо, Христос эрьванть эйстэст кемекстызе «эно» валсонть! Вана мекс миньгак Сонзэ кувалт Пазонь шнамга ёвтатано: «Виде, истя ули!»21Те Сонсь Пазось кемексты минек ды тынк Христос Вадевтенть* марто вейсэндямосонть. Те Сон минеккак вадимизь-кочкимизь.22Сон тешкстымизь минек Эсь тешкссэнзэ, лиякс, кучизе минек седейтнес Эсь Оймеялтонзо, кода кемекстамо.

23Пазось Сонсь неи-соды, ды пежетькстан-божан эсь эрямосонгак: мон те шкас эзинь велявто Коринфев ансяк тынк ванстоманк кисэ.24Нама, минек арась меленек саемс тынк кемеманть эсь кеденек алов. Минь содатано: тынь а кавтолдтадо кемеманть коряс. Минь ансяк лездатано тенк муемс эстенк кеняркс.


предыдущая глава Глава 1 следующая глава