Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЕТРАНЬ ВАСЕНЦЕ СЁРМАЗО

Глава 4

Паз марто од эрямо

1Истя вана: кода Христос пиштсь-майсесь минек кисэ рунгосонзо, тыньгак кемекставодо теке арсемасонть. Кие майси рунгосонзо, се лотки пежетень тейнемадо.2Секскак ней уш эринк мода лангсо кадовозь тенк шканть Пазонть мелензэ коряс, аволь ломанень визькс мельтнень мельга молезь.3Уш сатышка шка тынь эриде Пазонь асодыця ломантнень ладсо. Тынь макснинк прянк эрьва кодамо аваньксчис, визьксэнь мельтнес, [цёра цёра марто удсемас, ракша марто эрямос, апаро тевс,] винадо иредемазонк симемас, промкссо идемгалезь визьксэв велямос-чарамос ды минень-сюнонь тандавкснэнь седеень кельмевтиця сюконямос.4Секс сынь ней дивсить сень лангс, мекс тынь сынст марто вейсэ а чийтядо теке жо визьксчис прамо-ёмамо чадынтень, ды амазы валсо сёвныть-пазить эйсэнк.5Ансяк сыненст ялатеке сави кирдемс каршо вал Азоронть икеле, кие курок карми судямо эрицятненьгак, кулозтненьгак.6Кенярксов кулясь пачтязель кулозтнененьгак тень кисэ: эрявольть сынь Пазонть ладсо пингеде пингес эсь оймесэст, куш сыньгак судязельть рунгонь куломас лия ломантнень ладсо.

Пазонь казнетнень нолдадо тевс!

7Курок весементень сы пе. Секскак уледе ванькс мельсэ ды валдо превсэ, ды истя ультядо анокт озномантень.8Васняяк, седейшкава вечкеде вейкенк-вейкенк, эдь вечкемась вельти-нарды пек ламо пежетть.9Апак музгорде, седейшкава келейстэ панжинк кенкшенк вейкенк-вейкенк туртов.10Кадык эрьвась эйстэнк важоди вейкенк-вейкенк туртов се казненть коряс, конань максызе тензэ Пазось. Сестэ тынь ультядо Пазонь эрьва ладсо невтевиця чанстенть тевс нолдыця паро важокс.11Кие корты, се кадык корты, кода кортыть Пазонь валтнэ. Кие лезды-важоди, се кадык лезды-важоди се вийсэнть, конань максы тензэ Пазось. Истямо ладсо весе тень эйсэ шнави Пазось Иисус Христос вельде, конанень улезэ инексчи ды азорксчи пингеде пингес! Аминь.

Кенярдодо пиштематненень-майсематненень

12Вечкевикс ялгат, илядо дивсе теке пси толсо тынк варчавтнемантень; теньсэ мезеяк истямо а эрсиця арась.13Мекевланк, кенярдкшнодо, зярдо тынь явтадо Христос марто вейсэ Сонзэ пиштематнень. Кода панжови Сонзэ инексчизэ, сестэ седеяк пек карматадо кенярдозь кенярдомо.14Бути тынк сёвныть-пазить Христосонь кисэ, сестэ тынь уцяскавт, секс мекс Иневалдонь Оймеялтось, лиякс, Пазонь Оймеялтось, эри-ашти тынк эйсэ. Сетне Сонзэ сёвныть-пазить, а вана тынь Сонзэ шнатадо-инелгавтадо.15Ансяк кияк эйстэнк илязо пиште ды чумондово кода чавныця-маштниця, салыця эли зыянонь теиця, эли лия ломанень тевс эциця.16Вана кияк майсиндеряй христианокс улеманть кисэ, сестэ кадык тень кисэ а визделгали, ды кадык шнасы Пазонть истямо уцясканть кисэ, конань сон кандтни.17Сась судонь шкась, ды васенцекс судявить Пазонь ломантне. Ды бути судось ушодови минек эйстэ, сестэ кодамо уцяска учи сетнень, конат а кемить Пазонь пельде Кенярксов кулянтень!18
«Бути стака идевемс видечисэ ломанентень,
сестэ мезе карми улеме Пазнэнь акемиця пежетевенть марто?»
19Вана мекс сеть, кить пиштить-майсить Пазонть мелензэ коряс, кадык макссызь эсь оймест кемевикс Теицянтень-Кирдицянтень ды кадык седе товгак тейнить паро тевть.


предыдущая глава Глава 4 следующая глава