Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 1

1Те книгась – Иисус Христоснэнь панжозь неявкс, конань максызе Тензэ Пазось: невтемс Эсензэ важотненень, мезе куроксто топавтови. Тень Христос ангелэнзэ вельде пачтизе Эсензэ Иоанн важонтень.2Иоанн ёвтнизе весементь, мезе несь. Те – Пазонь максовт куля ды видечи, конань панжизе сонензэ Иисус Христос.3Уцяскав се, кона ловны те книганть, уцяскавт сетнеяк, конат кунсолыть неть валтнэнь ды эрить те книгань валтнэнь коряс, конат ёвтнить неень шкадонть ды сыця шкадонть. Эдь сынст топавтома шкась эль сы.

Христос кучи вал сисем кемикуротненень

4Иоанн сёрмады сисем кемикуротненень, конат эрить Римень Асиясо. Улезэ тенк чансть ды седейоймамо Пазонть пельде, кона свал ули, ульнесь ды карми улеме, ды сисем оймеялтнэнь пельде, конат аштить Пазонть инязоронь озамо тарканть икеле,5ды Иисус Христосонь, кемевикс яволявтыцянзо пельде. Сон васенце, кие вельмесь кулозьстэ, ды Сон ашти Азорокс мода лангонь инязортнэнь лангсо!

Сон вечксамизь минек ды Эсь верьсэнзэ ванськавтымизь эсенек пежетнестэ.6Сон теимизь минек инязорокс ды Пазонтень, Эсензэ Тетянстэнь, важодиця попокс. Шнамо ды вий Тензэ пингеде пингес! Аминь, истя улияк!7
Ванодо: Сон сы менелень пельсэ копачазь,
ды весе ломантне несызь Сонзэ,
несызь сетнеяк, конат Сонзэ лазызь.
Ды весе масторлангонь раськетне
кармить лайшеме-авардеме кисэнзэ.
Истя улияк! Аминь.

8«Мон – Альфа ды Омега*, Ушодкс ды Прядовкс», – корты Азорось, Весеменькирдицясь, кона свал ули, ульнесь ды карми улеме.

Иоанн неи вельмезь Иисус Христосонь

9Мон, Иоанн, кемемасо тынк ялганк, яван мартонк Иисус Христосонь пиштеманть, инязорксчинть ды цидярдоманть. Мон ульнинь Патмос усия лангсо, козо панекшнимизь сень кис, мекс мон пачтинь Пазонь валонть ды ёвтнинь Иисус Христосто.10Недлячистэ, Азоронть чистэ, Пазонь Оймеялтось саимим Эсь виензэ алов, ды мон маринь, кода монь удало гайгезевсь прок покш торамонь вайгель, кона кортась: «Мон Альфа ды Омега, Васенцесь ды Меельцесь».11«Сёрмадык книгас весе, мезе неят, ды кучик Асиясо эриця кемикуротненень сисем оштнэва: Эфесэв, Смирнав, Пергамов, Тиатирав, Сардисэв, Филадельфияв ды Лаодикияв».

12Сестэ мон велявтынь ды варштынь удалов, кинь вайгелесь корты монь марто, ды неинь сисем сырнень лампат.13Сисем лампатнень ютксто мон неия Ломантнень Цёранть кондямонть. Сон оршазель кувака оршамосо, мештезэ карксазель сырнень карксамосо.14Сонзэ прячерензэ ульнесть ашот, кода ашо пона, прок лов. Сельмензэ цивтёрдсть прок палыця толт.15Пильгензэ ульнесть прок каштомсо ванськавтозь сияждыця бронза, вайгелезэ ведьпрамонь увномань кондямоль.16Вить кедьсэнзэ Сон кирдсь сисем тештть, кургстонзо лисиль кавто пельга пшти торо, ды Сонзэ чамазо сияждсь чи куншкань чипай ладсо.

17Сонзэ неезь, мон прынь, прок кулозь, пильгезэнзэ. Сон путызе вить кедензэ прям лангс ды мерсь: «Иля пеле. Мон – Васенцесь ды Меельцесь.18Мон – Эрямонь лисьмапря. Мон ульнинь кулозь, ней жо, вант, Мон эрян ды карман эрямо пингеде пингес, аминь. Монь кедьсэ куломань ды тоначинь панжоматне.19Секс сёрмадык, мезе тон неят, мезе ней ули ды мезе карми улеме теде мейле.20Ней Мон панжса тонеть салавачинть: кодамо смусть невтить сисем тештне, конатнень тон неят Монь вить кедьсэ, ды сисем сырнень лампатне. Неть сисем тештне – те сисем кемикуротнень ангелэст, а сисем лампатне, конатнень тон неить, – сисем кемикуротне».


предыдущая глава Глава 1 следующая глава