Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ГАЛАТИЯНЬ КЕМИКУРОТНЕНЕНЬ ПАВОЛОНЬ СЁРМАЗО

Глава 4

1Мон тесэ кортан вана мезде: зярс эйкакш пингесэ се, конань кедьс мейле максови тетянзо уличись, сон мейсэяк а явови уренть эйстэ, кадык сон – весементь лангсо азор.2Сон ашти мельганзо якицятнень ды кудоветицятнень кедь ало тетянзо аравтовт шканть самс.3Истя жо миньгак, зярдо ульнинек “эйкакш пингесэ”, ульнинек урексчисэ те мирэнть-масторонть ветиця вийтнень ало.4Ансяк зярдо топодсь аравтозь шкась, сестэ Пазось кучизе миненек Эсь вейкине тиринь Цёранзо. Сон чачсь ломанекс авань пельде ды эрясь Коенть ало сень кисэ:5идемс-менстемс минек Коенть алдо олячис ды теемс минек Пазонь эйкакшокс.6Ней уш тыньгак ультядо Пазонь эйкакшокс. Тень невтеманзо кисэ Пазось кучизе весень тынк седейс Эсь Цёранзо Оймеялтонть, конась тердевти Пазонть: «Абба! Тетяй!»7Истямо ладсо, ней тон эйкакш, уш аволь уре. Бути тон эйкакшат, сестэ Иисус Христосонь кувалт тонеть максови уличиськак, конань Пазось алтызе-аравтызе Эсь эйкакшонзо туртов.

Павол талны-мелявты галатиянсетнень кисэ

8Икеле, зярдо тынь а содылинк Пазонть, ульниде урексчисэ сеть вийтнень ало, конат допрок аволь алкуксонь пазт.9Ансяк ней тынь домкасто содасынк Пазонть, эли видестэ ёвтамс, Пазось кармась тынк содамонк. Мекс сестэ, эно, тынь таго велявттадо мирэнь-масторонь неть лавшо, лезэвтеме вийтненень! Арази тынк меленк мекев совамс сынст алов урексчис?10Тынь мик яла ловтадо-тешкстатадо кодат-бути чить, ковт, шкат ды иеть!11Мон талнан кисэнк ды пелян: арази монь важодемась тынк туртов тусь варма мельга?

12Энялдан икеленк, кемиця ялган, уледе истямокс, кодаман мон! Монгак теевинь истямокс, кодат тынь. Тынь монень эзиде тее мезеяк берянь.13Тынь жо содатадо: мон васенцеде Кенярксов кулянть пачтия тенк секс, мекс ульнинь сэредицякс.14Кадык сестэ монь сэредемась ульнесь монень стака канстокс, тынь ялатеке эзиде безарде-нулгоде эйстэнь. Мекевланк, седейшкава вастымизь монь, теке Пазонь ангелэнть, теке Эсензэ Христос Иисусонь.15Ков ёмась ней тынк икелень кецямось-уцяскась! Мон апак кавтолдо яволявтан тынденк: икеле тынь эсь сельменккак таргавлинк ды максовлинк монень, бути тынк сатоволь виенк!16Арази мон ней теевинь тынк икеле душманокс сень кувалма, мекс кортан тенк видечи?17Лиятне, нама, свал мелявтыть тынк кисэ, ансяк тень сынь теить аволь паронь арсезь. Сынст мелест явомс тынк монь эйстэ ды теемс тынк эсест кисэ чинек-венек мелявтыцякс.18Свал вадря се, зярдо кияк мелявты кисэнк паронь арсезь. Кадык истя ули свал, аволь ансяк сестэ, зярдо мон тынк ютксо.19Вечкевикс эйдень! Мон одс майсезь чачтан эйсэнк, зярс а теевтядо Христосонь кондямокс.20Вай, бути мон ней улевлинь тынк ютксо! Сестэ тынк марто кортамсто полавтовлия вайгелем. Ней жо превс тень а саеви, мезе теемс мартонк.

Агарь ды Сарра

21Сетне тынк эйстэ, конатнень мелест эрямс Коенть ало, ёвтадо монень: арази тынь а чарькодтядо, мезе корты Коесь?22Эдь Койсэнть сёрмадозь: Авраамонь ульнесть кавто цёранзо, вейкесь уре авань пельде, омбоцесь – олячисэ эриця нинзэ пельде.23Уре авань цёрась чачсь истя, кода свал чачить весе эйкакштнэ, а вана олячисэ авань цёрась чачсь Пазонть алтамонзо коряс.24Те ёвтамонть ули кекшезь смустезэ: неть кавто аватне аштить кавто вейсэньлувонь-ладямонь невтемакс. Васенце авась Агарь, конань эйкакштнэ чачить урексчис, невти се вейсэньлувонть, кона ульнесь теезь-кемекстазь Синай пандонть лангсо.25Агарь вейкетстяви Синай пандонть марто, кона Аравиясо. Сон истя жо невти неень шкань Ерусалименть, кона эсь эйкакшонзо марто эри-ашти урексчисэ.26Весе минек аванок жо – те менель лангонь Ерусалимесь, кона олячисэ, аволь уре.27Сёрмадовкссояк сондензэ ёвтазь:
«Кенярдкшнок, эйкакштомо ды ачачтниця ава!
Эрьгелезь сеерек ды кецнек, чачтома пиштемань-майсемань асодыця!
Эдь мирдевтементь ламо эйкакшонзо,
мик седе ламо мирде мартонть коряс».
28Минь, кемиця ялган, – истят эйкакшт, конат чачозь алтамонь коряс, Исак ладсо.29Сестэ ульнесь истя: ломанень вийсэ чачозь эйкакшось пансесь Пазонь Оймеялтонь вийсэ чачозенть. Истя моли нейгак.30Мезе эно корты Сёрмадовксось?
«Паник уре аванть цёранзо марто!
Уре авань цёрантень мезеяк а ули максозь.
Тетянть ули-парозо кадови
ансяк олячисэ аванть цёранзо туртов».
31Секскак, кемиця ялган, вана истя: минь олячисэ авань эйкакшт, аволь уре авань!


предыдущая глава Глава 4 следующая глава