Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 13

Велявтынк эсенк седеенк Пазонтень

1Иисусонь кунсолыцятнень ютксо ульнесть ломанть, конат ёвтнизь Сонензэ, кода Пилат Пазонь кудосо маштынзе Галилеянь эрицятнень. Секскак сынст верест човорявсь Пазонтень кандозь аноксокс печкезь ракшатнень верест марто.2Иисус тень каршо мерсь: «Тынь, паряк, арсетядо: неть Галилеянь эрицятне ульнесть весе Галилеянь лия эрицятнеде пежетевть, ды секскак истямоль куломаст?3Арась, кортан тенк. Бути тынь Пазонтень а велявттадо, истя жо весе ёматадо.4Паряк, сеть кемгавксово ломантне, конатнень лангс сяворсь Силоам башнясь ды маштынзе сынст, ульнесть пежетевдеяк пежетевть Ерусалимень эрицятнень ютксто?5Арась, кортан тенк. Бути тынь Пазонтень а велявттадо, истя жо весе ёматадо».


Валвелявкс лезэнь а кандыця чувтодо

6Сестэ ёвтнесь Иисус истямо валвелявкс: «Вейке ломанень пиресэ озавтозель инжир чувто. Весть азорось мольсь варштамо, улить-арасть лангсонзо инжирт; инжирт арасельть.7Сестэ сон мерсь пиренть мельга якицянтень: “Колмоце ие мон сакшнан те чувтонть лангсто инжирэнь варштамо ды те шкас вейкеяк эзинь нее. Керик сонзэ, мейс сонензэ лезэвтеме потямс мода виенть?”8“Азоро”, – мерсь каршонзо пиренть мельга якицясь, – “кадык кадови чувтось таго вейке иес. Мон сонзэ моданзо кавшакавтса ды навозыявтса.9Паряк сы иестэ кармить улеме инжирт, бути а кармить – сестэ керясак”».


Иисус шумбралгавты ава ломань оймсема чистэ

10Весть оймсема чистэ Иисус тонавтсь синагогасо.11Тосо ульнесь ава, конань кемгавксово иеть майсевтсь ормань оймеялтось. Авась ульнесь мендявозь ды овсе эзь витеве.12Кода Иисус сонзэ неизе, тердизе Эсензэ малав ды мерсь тензэ: «Ава ломань! Тон олякстомтозят эсеть ормадот».13Иисус путызе сонзэ лангс кедензэ, ды авась сеске виемсь, кармась Пазонть шнамо.14Синагогань прявтось кеждясь сень кисэ, мекс Иисус шумбралгавтызе аванть оймсема чистэ ды кармась кортамо перька аштиця ломантненень: «Важодемань туртов максозь кото чить. Сакшнодо шумбралгалеме неть читнестэ, аволь оймсема чистэ».15Тень каршо Азорось мерсь тензэ: «Чачонь полавтниця! Нать эрьвась эйстэнк оймсема чистэяк а нолдтни кардазсто буканзо эли осёлонзо ды а ветни эйсэст симдеме?16Арази Авраамонь те тейтерентькак, конань Сатанась тертякшнызе кемгавксово иес, а нолдамаль тертьстэнть оймсема чистэ?!»17Тень марямодо мейле Иисусонь каршо молицятне весе визделгадсть. Весе лиятне кенярдсть Иисусонь теевть тамашань тевтненень.


Горчица видьмеде ды чапавтомадо валвелявкст

18Сестэ Иисус кевкстсь: «Мезе ёнов моли Пазонь Инязорксчись ды мезе марто Монень вейкетстямс сонзэ?19Сон моли горчица видьме ёнов, конань ломанесь саизе ды видизе эсензэ пирес. Видьмесь кассь ды теевсь сэрей чувтокс, ды менель нармунтне кармасть тейнеме тарадозонзо пизэть».

20Иисус таго кевкстсь: «Мезе марто Монень вейкетстямс Пазонь Инязорксчинть?21Сон кода чапавтома, конань човоризе авась почтонь колмо парь марто ды теде сыргась весе чапаксось».


Теине орта

22Иисус мольсь оштнэнь ды велетнень трокс Ерусалимев. Молемстэ Сон тонавтсь весе ломантнень.23Кие-бути кевкстизе Сонзэ: «Азоро, арази ансяк аламотне улить идезь?» Тень каршо Иисус мерсь:24«Весе виенк путынк теине ортава совамонтень. Кемеде Монень, ламотне кармить снартнеме совамо тов, ансяк а совавить.25Сы шка, зярдо кудазорось сти ды пекстасы кенкшензэ, ды теде мейле тынь ушосто карматадо вачкоеме кенкшезэнзэ ды энялдомо: “Азоро, Азоро, панжт тенек!” Сон каршонк мери: “Мон а содатадызь тынк ды а содан, костонтядо”.26Сестэ карматадо ёвтнеме: “Минь Тонь марто ярснинек ды симнинек. Тон тонавтыть минек ошонь ды велень пуромома таркатнесэ”.27Сон каршонк мери: “Кортан тенк: Мон а содатадызь тынк ды а содан, костонтядо. Оргодеде Монь эйстэ, весе зыянонь тейницят!”28Зярдо тынь несынк Авраамонь, Исаконь, Яковонь ды весе пазмарицятнень Пазонь Инязорксчисэнть, сестэ тынь карматадо авардеме ды пейсэнк чикордомо. Эдь тынь ушосотадо, тосто панезтядо.29Чилисема ды чивалгома ёндо, кельме ды лембе ёндо ломантне сыть ды ойсить Пазонь Инязорксчисэнть каванямонь столь экшс.30Ды ламотне, конат течи меельцеть, сестэ кармить улеме васенцекс, ды ламотне, конат течи васенцеть, сестэ кармить улеме меельцекс».


Иисус аварди Ерусалименть кисэ

31Те чистэнть Иисусонь малав састь зяро-бути фарисейть ды мерсть: «Тук неть таркатнестэ: Ирод пурны маштомот».32Иисус каршост мерсь: «Азёдо ды ёвтадо те ривезентень: “Мон карман идемевстнень пансеме ды ломантнень шумбралгавтомо течи, ванды, ды ансяк колмоце чистэ Мон прядса эсь тевем”.33Ансяк течияк, вандыяк ды меельце чистэнтькак Монень сави поладомс Эсень кинть, эдь арась истямо пазмариця, конась куловоль аволь Ерусалим ошсо.34Вай, Ерусалим, Ерусалим, тон маштнят пазмарицятнень ды кевсэ чавнат Пазонь кучовт кулянь кандыцятнень! Зяроксть Мон арсинь пурнамс тонь эйкакшот, кода нарвицькась пурны эсь сёлмонзо алов левксэнзэ, ансяк тонь мелеть арасель!35Ды вана, тынк кудонк кадови чавокс. Кортан тенк: тынь Монь а несамизь семс, зярс а мертядо: “Улезэ чанстязь-баславазь Азоронть лемсэ Сыцясь!”»



предыдущая глава Глава 13 следующая глава