Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 21

Ерусалимев Паволонь якамось

1Ильтицятнень марто явовомадо мейле минь лисинек иневедьс ды туинек видьстэ Кос усиянтень. Омбоце чистэнть минь сынек Родосов, тосто туинек Патарав.2Тосо муинек покш венч, кона пурныль туеме Финикияв, ды те венчсэнть сыргинек седе тов.3Зярдо минь неинек Кипранть, ютынек сонзэ вакска видь кедь ёндо. Сестэ минь кинть саинек Сириянть ёнов ды лоткакшнынек Тирс, косо эрявсь валгстомс покш венчстэнть та-кодат курмот-кармот.4Тосо минь муинек Иисусонь мельга молицят ды эринек сынст кедьсэ сисем чить. Сынь, Оймеялтонть мельспутоманзо коряс, кортасть Паволнэнь: «Иля яка Ерусалимев!»5Ялатеке, зярдо шказо сась, минь сыргинек седе тов. Весе кемиця ялгатне, поланек-эйкакшнек, ильтясть эйсэнек ошстонть. Ведь чиресэнть минь пульзинек кумажа лангс ды ознынек.6Мейле ёвтынек туемань сюкпрят эрьвейкенень ды озынек покш венчентень. Ломантне мурдасть эсест кудова.

7Тир ошсто минь сынек Птолемаидав. Тосо содавтынек кемиця ялгатнень ды мартост ульнинек ве чи.8Омбоце чистэнть минь Павол марто сыргинек Кесарияв, лоткинек Филип евангелистэнть кудос, кона ульнесь Ерусалимсэ сисем кочказтнеде вейкекс.9Филипень ульнесть мирденень апак максо ниле тейтерензэ, конатнень ульнесь пазмарицянь валсо кортамонь казнест.10Зярыя чинь ютазь, зярдо минь ульнинек тосо, Иудеясто сась Агав пазмарицясь.11Сон совась миненек, саизе Паволонь карксонзо, сюлмсинзе эсензэ кедтнень-пильгтнень ды мерсь: «Иневанькс Оймеялтось корты: “Истя еврейтне Ерусалимсэ сюлмсесызь те карксонь азоронть ды макссызь сонзэ лия раськенсетнень кедь алов”».12Зярдо тень маринек, минь ды тосотне карминек энялдомо Паволнэнь: «Иля моле Ерусалимев!»13Ансяк Павол тень каршо мерсь: «Мезе тынь тейтядо, мекс авардтядо, мекс сезнетядо седеем? Мон аволь ансяк сюлмсемс максовлия прям, анокан куломскак Ерусалимсэ Иисус Азоронть кисэ».14Зярдо минь чарькодинек, сон мелензэ а полавтсы, лоткинек энялдомодо ды меринек: «Кадык топавтовови Азоронть мелезэ».

15Сеть читнеде мейле, конат ютавтозельть Кесариясо, минь пурнынек-сэрнинек ды туинек Ерусалимев.16Мартонок сыргасть зярыя тостонь кемицят. Сынь минек ветимизь Мнасононь кудос, косо анокстазель миненек эрямо тарка. Мнасон Кипрань ломанель, умонь кемицятнень эйстэ вейкель.

Ерусалимсэ Паволонь Яков марто вастовомась

17Ерусалимсэ кемиця ялгатне вастымизь кенярдозь.18Омбоце чистэнть минь Павол марто молинек Яковнень. Кемикуронь прявтнэяк весе тосольть.19Шумбракстнемадо мейле Павол педе пес ёвтнизе весементь, мезе Пазось сонзэ важодеманзо вельде тейсь лия раськетнень ютксо.

20Яков ды весе лиятне кунсолызь Паволонь ды инелгавтнизь Пазонть. Мейле Паволнэнь мерсть: «Кемиця ялганок, тон содат, ней еврейтнень ютксо кемицятнеде кармасть улеме тёжат, ды весе сынь седейшкава ванстыть Моисеень Коенть.21Сыненст ёвтасть, келя, тон весе еврейтнень, конат эрить лия раськетнень ютксо, тонавтат Моисеень Коенть эйстэ потамо. Тон, келя, кортат: сыненст а эряви эсест цёрынетненень теемс киськепень керявтоманть ды а эряви эрямс минек раськень весе койтнень-кирдатнень коряс.22Ней мезе тенек теемс? Сынь, нама, марить самодот, ды пурнавить ламо ломанть.

23Кунсоломизь, тейть минек превспутоманть коряс. Минек ютксо улить ниле ломанть, конат макссть алтамо вал Пазонтень.24Саить сынст, ютак мартост ванськавтовомань илат ды пандт пряст нарамонь кисэ. Сестэ весе несызь: апаро кулятне тонь леметь перька аволь видеть – тон эрят Коенть коряс.25Лия раськенсетненень, конат совасть кемемас, минь уш сёрмасо кучинек эсенек меленек-превенек. Кадык сынь а кирдить мезеяк истямо. Сынь кирдевест ансяк аволь алкуксонь пазнэнь казнекс кандозь ярсамопельде, верде, сывельде, конастонть апак нолда вересь, ды усксевемадо».

26Сестэ Павол саинзе мартонзо неть ломантнень ды омбоце чистэнть ютавтынзе мартост вейсэ ванськавтовомань илатнень. Мейле сон совась Пазонь кудос ды яволявтсь, зярдо прядови неть нилетнень ванськавтовомань шкаст ды зярдо эрьванть кисэ максови Пазонтень казне.

Пазонть кудосо Паволонь тертямозо

27Зярдо прядовкшнось ванськавтома шкань сисемеце чись, зярыя еврейть, конат Асиястольть, неизь Пазонь кудосто Паволонь. Сынь кепедизь перька аштиця ломантнень, кундызь Паволонь28ды кармасть пижнеме: «Израилень ломанть! Лездадо! Те цёрась сравтни эрьва кува тонавтома, кона моли минек раськенть каршо, минек Коенть каршо ды те иневанькс тарканть каршо. Ней, теде башка, сон ветясь Пазонь кудозонок аволь еврейть, тень эйсэ нулгодькстызе те иневанькс тарканть ваньксчинзэ».29Теде икеле сынь ошсо некшнизь Павол марто вейсэ Трофимень, кона Эфесстэль. Ды секс сынь арсесть, Павол, нама, ветнилизе тонань Пазонь кудос.

30Весе ошось шалнозевсь. Паволонь каподизь, ускозь ускизь Пазонь кудостонть ды Пазонь кудонь кенкштнень сеске пекстызь.31Сынь арсесть маштомс Паволонь, ансяк кулясь весе Ерусалименть лажнозевемадонть пачкодсь римень ушмонь тёжань прявтонтень.32Сон сеске сайсь зярыя сядонь прявтт ды ушмант ды лиссь пурнавозтненень. Зярдо шалныцятне неизь тёжань прявтонть, сынь лоткасть Паволонь чавомодо.33Тёжань прявтось саизе Паволонь, кармавтсь тертямонзо кшнинь кавто тертьсэ. Сон кевкстинзе ломантнень, кие те истямось ды мезе сон тейсь.34Пурнавозтнень ютксто веенст кармасть пижнеме седе, омбонст лиядо. Истямо шалтсонть тёжань прявтонтень кодамояк смусть эзь чарькодеве, ды сон кармавтсь ветямс Паволонь ушмокудос.35Зярдо сынь кустема лангсольть, пурнавозтне пек азаргадсть ды ушмантнэнень савсь кандомс Паволонь кедь лангсост.36Ломантне мольсть мельгаст ды пижнесть: «Кулома тензэ!»

Ломантнень икеле Паволонь идема валозо

37Ушмокудов совамсто Павол кевкстизе тёжань прявтонть: «Мерят-арась монень пшкадемс тонеть вейке вешемань кувалма?» «Арази тон кортат грекень кельсэ?» – дивазевсь се.38«Сестэ, лисни, тон аволь се египетэнь ломанесь, кона аволь умок кепедевкшнесь масторонь прявтнэнь каршо ды ливтекшнесь эсензэ марто чаво модав ниле тёжат нельгицят-маштницят?»39«Арась. Мон евреян, – мерсь Павол, – Киликиянь Тарс ошсто, кона весенень содавикс. Энялдан, макст монень ёвтамс вал ломантненень».40Тона макссь тензэ вал. Павол стясь кустеманть лангс ды кедень аволдамосо тердинзе ломантнень чатьмонеме. Зярдо весе опамсть, Павол кармась кортамо евреень кельсэ:


предыдущая глава Глава 21 следующая глава