Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 4

Сёвонень кедьгесэ сюпавчи

1Эсь седеймарямонзо кувалт Пазось максызе миненек истямо важодема тевенть, ды секскак минь а нолдтнетяно прянок.2Мекевланк, минь допрок ёртынек-кадынек весе салавань-визьксэнь тевтнень. Минь киньгак а манчетяно ды а колатано Пазонь валонть. Мекевланк, минь апак кекше ёвтнетяно видечинть ды Пазонть сельмензэ икеле аравттано эсь прянок эрьва ломанень оймеёжонь судс.3Бути Кенярксов кулясь, конань минь ёвтнетяно, киненьгак кекшезь вельтямосо, сон кекшезь ансяк сетненень, конат ютыть ёмамонь киява.4Неень масторлангонь “пазось”, Сатанась, сокоргавтынзе неть акемицятнень превест. Секс сынь а неить, кодамо иневалдо тенст сияжды Кенярксов кулястонть, косо ёвтневи Христосонь инексчиденть. А Христос – анеявикс Пазонть чачозо.5Эдь минь ёвтнетяно аволь эсенек эйстэ, а вана Христос Иисусто: Сон – Азорось, ды минь – тынк важот Иисусонь кисэ.6Сонсь Пазось, кона мерсь: «Чоподастонть сияждозо валдо», самай теке Пазось валдомтынзе минек седеенек. Истямо ладсо миненек максозь содамс Пазонть иневалдонзо, кона сияжды Иисус Христосонь чамастонть.

7Ды истямо питней сюпавчись ванстови минек эйсэ теке порксавиця сёвонень кедьгесэ. Истя неяви: те аонкставикс виесь лиси Пазонть эйстэ, аволь минек эйстэ.8Минек лепштить эрьва ёндо, ды ялатеке минь ужос-уголс апак пане. Кой-зярдо минь пракшнотано кавтолдомас-талномас, ансяк зярдояк а пракшнотано прянь-пильгень чавомас.9Минек мельга пансить, ды ялатеке Пазось минек эзимизь кадо. Минек правтымизь пильге лангсто, ансяк минь апак куловто-ёмавто.10Минь свал кандтнетяно эсь рунгосонок Иисус Азоронть куломанзо сень кисэ: кадык Иисусонь эрямоськак минек рунготнесэ ули невтезь.11Эрямонок перть Иисусонь кисэ куломась свал чары минек перька вана мекс: кадык Иисусонь эрямоськак минек кулыця рунготнесэ ули невтезь.12Лисни, минек эйсэ эсь тевензэ теи куломась, а вана тынк эйсэ – эрямось.13Минек эйсэ ули кемемань секе оймеялтось, кона ульнесь сень эйсэяк, кие Псалтирьсэ ёвтась: «Мон кеман, ды секс кортангак». Минь истя жо кемтяно, ды секс кортатанояк.14Минь содатано: се Пазось, кона кулозьстэ вельмевтизе Иисус Азоронть, нама, минеккак вельмевтьсамизь Иисусонь вельде ды стявтсамизь Сонсензэ икелев тынк марто вейсэ.15Ды весе те тееви тынк кисэ: зярдо Пазонь чанстесь пачкоди яла седе ламонь седейс, сестэ ломантнень пельде кармить чадозь чадомо сюкпрянь ёвтамот Пазонть шнамос-инексчис.

Паз лангс кемезь эрямо

16Тень кувалт минь а нолдтнетяно прянок. Бути минек ушо ёнксось сырелгады-калады, минек потмо ёнксось ялатеке одкстоми эрьва чистэ.17Эдь минек неень стакачитне шождынеть ды нурькинеть, ды сынь кандыть тенек покштояк покш, аонкставикс, пингеде пингень инексчи, конась кодаяк а вейкетстяви неть стакачитнень марто.18Истямо ладсо, минь кайсетяно сельменек анеявиксэнть лангс, аволь неявиксэнть лангс, секс мекс неявиксэсь эри-ашти ансяк нурькине шкас, а вана анеявиксэсь – пингеде пингес.


предыдущая глава Глава 4 следующая глава