Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 5

Минь ней ловозь чумовтомокс

1Минь ней ловозь чумовтомокс кемемань коряс, ды секс ладязь эрятано Пазонть марто минек Иисус Христос Азоронть вельде.2Те Сон панжизе миненек кинть совамс кемеманть вельде те чанстентень, конасонть минь ней эрятано-аштетяно. Ней минь кенярдозь седейнежедькс марто учотано сень, зярдо миньгак соватано Пазонть марто Сонзэ инексчинтень.3Ды минек кенярксось аволь ансяк теньсэ. Минь кенярдтано истя жо пиштематнененьгак-майсематнененьгак, секс мекс содатано: пиштемась чачты-касты цидярдома,4цидярдомась – кеме обуця, кеме обуцясь максы тенек седейнежедькс.5Ды те седейнежедьксэсь а манчи-визделгавтни минек, секс мекс Пазось валызе минек седейтнес Эсь покш вечкеманзо – Иневанькс Оймеялтонть вельде, конань Сон миненек максызе.

6Минек арасель виенек лездамс эстенек. Сестэ Пазонь путовт шкасто Христос кулось минек, пежетев ломантнень, кисэ.7А содан, муеви-арась вейкеяк истямо ломань, конань улевель мелезэ куломс мик Коень топавтыцянть кисэ. Паряк, кияк анок максомс прянзо алкуксонь паро ломанень кисэ.8А вана Христос кулось минек кисэ сестэ, зярдо минь ульнинек пежетевть! Истя Пазось невтизе миненек, кода Сон вельть вечксамизь.9Бути Пазось Иисусонь веренть вельде ловимизь ней чумовтомокс, сестэ Иисус седеяк идесамизь Пазонь кеженть эйстэ.10Бути минь ладинек Пазонть марто Сонзэ Цёранзо куломанть вельде сестэ, зярдо ульнинек Сонензэ душманокс, – ней жо, зярдо минь Сонзэ марто уш ладязь, седеяк пек идевтяно Пазонь Цёранть эрямонзо вельде.11Ды те зярс аволь весе! Минь кенярдтанояк минек Пазонть эйсэ, секс мекс минь ладязь Пазонть марто минек Иисус Христос Азоронть вельде.

Адам ды Христос

12Пежетесь совась масторонть лангс вейке ломань вельде. Куломаськак сась пежетенть марто. Истя куломась стардсынзе весе ломантнень, секс мекс весе совасть пежетьс.13Моисеень Коенть максомадо икелеяк пежетесь уш ульнесь масторонть лангсо; ансяк тосо, косо арась Кой, пежетесь чумокс а ловови.14А вана Адамонь эрямо шкасто саезь Моисей видьс куломась ульнесь азорокс весе ломантнень лангсо, натой сетнень лангсояк, кить эзть колсе Пазонть кармавтовксонзо, кода тейсь Адам.

Адам ульнесь Се ломаненть ёнов молицякс, Кинень эряволь самс седе мейле.15Ансяк Адамонь теевть пежетесь кодаяк а вейкетстяви Пазонь чанстенть марто. Вейке ломанень теевть пежетесь, нама, кандсь кулома весе ломантненень. Мекевланк, ламодояк седе покш Пазонь чанстесь ды Сонзэ чанстень казнесь, конат максовить весенень вейке ломань, Иисус Христос, вельде!16Вейке ломанень пежетесь кодаяк а вейкетстяви Пазонь чанстенть марто. Сестэ вейке пежетенть кисэ ульнесь суд ды кежей чумондома. Ней жо ламо теезь пежетень кисэ максови чанстень казнекс чумосто ливтема.17Вейке ломаненть пежетензэ кисэ, ансяк сонзэ вейкенть кувалт, куломась теевсь азорокс. Ансяк пек седе покш се, мезе тейсь вейке Ломань, Иисус Христос. Сеть, кинень сюпавсто-важовсто максозь Пазонть пельде чансть ды чумовтомочинь казне, кармить эрямо ды улеме азорокс Христосонь кувалт.

18Секс лисни: кода вейкень пежетесь кандсь кежей чумондома весе ломантненень, истя жо вейкень видечись теи весе ломантнень Пазонть икеле чумовтомокс ды кази тенст эрямо.19Кода вейкень, Адамонь, а кунсоломась теинзе весе ломантнень пежетевекс, истя жо вейкень, Иисусонь, кунсоломась теи весе ломантнень Пазонть икеле чумовтомокс.20Моисеень Коесь максозель мейле пежетевчинь ламолгадоманть кисэ. Ды вана зярдо ламолгадсь пежетевчись, сестэ седеяк пек кассь-ламолгадсь Пазонь чанстесь.21Истя, кода икеле пежетесь ульнесь азорокс ды ветясь куломас, истя жо ней Пазонь чанстеськак ули азорокс ды вети пингеде пингень эрямос ды чумовтомочис минек Иисус Христос Азоронть вельде.


предыдущая глава Глава 5 следующая глава