Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИУДАНЬ СЁРМАЗО

Глава 1

1Иуда, Иисус Христосонь важозо ды Яковонь братозо, кучи шумбракстнемат тердезтненень, конатнень алтынзе Эстензэ Тетя Пазось ды конатнень вансты Иисус Христос.2Кадык яла ламолгалить тынк ютксо седеймарямось, сэдейоймамось ды вечкемась.

Манчиця тонавтыцят

3Вечкевикс ялган, монь ульнесь покш мелем сёрмадомс тенк минек вейсэнь идемадонть, ды ней мон ловия пек эрявиксэкс сёрмадомс тенк сёрма ды тердемс тынк тюреме кемеманть кисэ, кона весть ды свал шкас максозь Пазонь ломантненень.4Тевесь сеньсэ: тынк юткс салава совасть кодат-бути пазтомо ломанть, конатненень уш умок аравтозь-анокстазь Пазонь судось. Сынь минек Пазонь чанстенть теить эсь визькс мелест топавтома тевекс, ды велявтыть-пурдыть минек вейкине Кирдиця Пазонть ды Иисус Христос Азоронть эйстэ.

5Монь мелем ледстямс тенк, куш тынь весе тень уш содасынк: Азорось, кона идизе-ливтизе Эсь раськензэ Египетэнь масторсто, мейле маштнинзе-чавнынзе юткстост сетнень, кить Тензэ эзть кеме.6Ды ангелтнэнь, конатне эзизь кирде тенст максозь азорксчинть ды кадызь эсест эрямо таркаст, Сон вансты чопода отьмасо, пингеде пингень тертьсэ, покш чинь судонтень.7Истя жо Содом, Гоморра ды перькаст аштиця оштнэяк сынст ладсо пряст каякшнызь усксевемас-ускурямос ды рунгонь визьксэнь мелест эрьва ладсо топавтомас. Сынь улить весенень невтевксэкс: чумонь пандомакс максозь тенст пингеде пингень тол.

8Истя жо неть пазтомотне, ононь-чартень неицятне теить эсь рунгост нулгодьксэкс-аваньксэкс, мезекскак а ловить прявтнэнь ды сёвныть-покордыть менелень вийтнень.9Мик Михаил архангелэсь, зярдо сон пелькстась-спорясь Идемевсенть марто Моисеень уловдонть, эзь сае смелчи сёвнозь-покордазь судямс Идемевсенть. Сон ансяк мерсь: «Кадык чумот пандсы Азорось!»10Неть ломантне жо сёвныть-покордыть сень, мезенть а чарькодьсызьгак. Ансяк мезенть сынь чарькодить, кода превтеме ракшат, эсь чачома обуцяст коряс, теньсэ сынь ёмавтыть эсь пряст.11Вай, кодамо зыян сы тенст, секс мекс сынь тусть Каинэнь киява. Сынь питнень саемань кисэ Валаам ладсо ваясть манчевемас, ды каршо молемаст кисэ Корей ладсо кулыть-ёмить.12Неть ломантне визькстэме ветить эсь пряст тынк вечкемань каванямо промкстнэсэ, косо сынь мартонк симить-ярсыть ды допрок апак визде пештить эсь пекест. Сынь мелявтыть ансяк эсь прядост. Сынь пиземевтеме пельть, конатнень пансить-кандтнить варматне. Сынь сёксень чувтт, умартеме, кавксть кулозь, юрнэк-корённэк таргазь.13Сынь иневедень кежей ведьвелявкст, конат човиякшныть эсест визьксчисэст; азгондыця-кадовиця тештть, конатненень анокстазь-ванстозь пингеде пингес тунь чопода отьма.

14Те сынст эйстэяк икелев ёвтась Енок, Адамсто саезь сисемеце ине покштясь: «Вана сы Азорось Эсь тёжа тёжат иневанькс ангелэнзэ марто15весеме лангсо судонь тееме. Сон ливтьсынзе лангс Пазнэнь весе акемицятнень весе пазтомо тевсэст, конатнень сынь теизь Пазонть каршо, ды визькстэме весе валсост, конатнень ёвтызь Сонзэ каршо неть Пазнэнь акемиця пежетевтне».16Сынь свал музгордить ды пеняцить уцяскаст лангс, топавтыть эсест визькс мелест пазтомо ды койтеме, каштангалить стяконь шнамо валсост ды соланясто савтыть ломантненень эстест лезэнь кисэ.

Превспутомат кемицятненень

17А вана тынь, вечкевикс ялгат, кирдеде мельсэнк сень, мезе икелев ёвтасть минек Иисус Христос Азоронть апостолтнэ.18Сынь кортасть тенк: «Меельце шкастонть сыть нарьгицят-мусколицят, конат кармить пряст ветямо пазтомо эсь визьксэнь мелест коряс».19Неть ломантне явить эсь пряст кемемань вейсэньксчинть эйстэ, сынь эрить ансяк эсь мода лангонь арсемаст коряс, арась эйсэст Пазонь Оймеялт.

20Тынь жо, вечкевикс ялгат, касодо-кемекстадо Пазонь максовт питней кемемасонк ды ознодо Иневанькс Оймеялтонть ветямонзо коряс.21Ванстодо прянк Пазонть вечкемасо ды учодо: минек Иисус Христос Азорось Эсь седеймарямосонзо ветясамизь минек пингеде пингень эрямос.

22Веенстнэнень уледе седеймарицякс ванозь.23Омбонстнэнь идеде-ливтеде тандавтнезь, теке толсто таргазь. Лиятнень жо лангс таргадо ванозь-пелезь, нулгодеде мик сынст оршамопельдест, кона теевсь аваньксэкс сынст рунгосост.

Шнамо Пазонтень

24Ансяк Пазонть ули виезэ ванстомс тынк прамодо ды аравтомс тынк асатыкстэмекс-ваньксэкс ды кецязь Эсь сияждыця инексчинзэ икелев.25Улезэ Сонензэ, вейкине превейдеяк превей Пазонтень, минек Идицянтень, шнамо, инексчи, вий ды азорксчи, минек Иисус Христос Азоронок вельде, весе пингетнеде икеле, ней ды пингеде пингес! Аминь.


предыдущая глава Глава 1 следующая глава