Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЭФЕС ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 2

Куломасто эрямос

1Тынь икеле ульниде кулозь эсь зыянов тевенк ды пежетенк кувалт,2конатнень потсо тынь зярдо-бути эриде те пингенть берянь койтнень коряс. Сестэ тынь ульниде коштсо улиця апаро оймеялтнэнь прявтост кедь ало, се оймеялтонть, кона нейгак теи эсь тевензэ Пазонь акунсолыцятнень эйсэ.3Сынст ютксо весе миньгак истя жо эринек колазь обуцянок мельтнень коряс, топавтынек эсенек рунгонь ды превень бажамотнень. Секс миньгак те обуцянок кисэ, весе лиятнень ладсо, ульнинек Пазонь кеженть ало.

4А вана Пазонть седеймарямозо сюпав ды вечкемазо, конань Сон панжизе-путызе миненек, ине!5Секс Сон теимизь минек, зыянов тевенек кувалт кулозтнень, эрицякс Христос марто вейсэ. Сонзэ чанстензэ коряс тыньгак идезтядо!6Христос Иисус марто вейсэ Сон вельмевтимизь минек ды озавтымизь минеккак Сонзэ марто вейсэ менель лангс.7Истя Сон невтизе весе сыця пингень ломантненень Эсь чанстензэ аонкставиця сюпавчинть се ине парочисэнть, конань Сон максызе миненек Христос Иисус вельде.8Сонзэ чанстензэ коряс, кемеманк вельде, тынь идезтядо! Тень теинк аволь тынь, те – Пазонь казне!9Те идемась аволь тевень кисэ, секскак кияк теньсэ илязо шна эсь прянзо!10Эдь миньгак Пазонь теевкст. Сон теимизь минек Христос Иисус марто вейсэндямонть вельде паро тевс, конатнень Сон уш икеле анокстынзе миненек топавтомс.

Христос сюлми-вейсэнди весе кемицятнень

11Тынь чачомань коряс лия раськень ломанть. Тынк ловильть “апак керявтокс” сетне, конатненень мерить “керявтозь” рунгосост кедьсэ теезь киськепень керявтомань коряс. Секс кирдеде мельсэнк, кодамокс тынь ульниде икеле.12Се шкастонть тынь ульниде Христостомо, явозелиде Израилень раськенть эйстэ. Вейсэньлувтне, конатнень юрс путозь Пазонь алтамотне, тынк лангс а сравтневильть. Тынь эриде те масторлангсонть седейнежедькстэме ды Пазтомо.

13А вана ней, Христос Иисус марто вейсэндямонть кувалма, тынк, конат зярдо-бути ульниде Пазонть эйстэ васоло, Христос Эсь верензэ вельде малавгавтыдизь.14Эдь те Христос – минек ладицянок. Сон сюлминзе еврейтнень ды лия раськенсетнень вейке раськес.15Эсь куломасонзо Сон калавтызе минек эйсэ явиця пирявксонть, лиякс, ятксчинть. Сон ёртызе Коенть весе кармавтовксонзо ды аравтовксонзо марто, ды Эсензэ марто вейсэндямонть вельде кавтосто тейсь вейке од ломань. Истямо ладсо Сон сюлмизе-кемекстызе ладямонть.16Крёст лангсо куломанзо вельде Сон ёмавтызе ятксчинть. Истя Сон ладинзе сынст кавонест Пазонть марто ды эсь ютковаст ды теинзе вейке рунгокс.17Христос сась ды пачтясь Кенярксов куля ладямодонть тыненккак, конат эрясть Пазонть эйстэ васоло, ды сетнененьгак, конат маласонзольть.18Вана истя Христос весенек туртов, еврейтнень ды лия раськетнень туртов, панжизе кинть Тетянтень вейке теке жо Оймеялтонть вельде.

19Лисни: тынь ультядо уш аволь лия масторонь ломанть ды аволь ве ёндонь савкст. Ней тынь совавтозтядо Пазонь раськенть юткс ды ультядо Пазонь кудораськенть ломанекс.20Тынь путозтядо апостолтнэнь ды пазмарицятнень кудоюронть лангсо, косо ужонь-уголонь кирдиця юр кевекс ашти Сонсь Иисус Христос.21Сон кирди-сюлми весе пелькстнэнь кудонть эйсэ, конась касы-кепети ды тееви Азоронтень алтазь кудокс.22Сонзэ марто вейсэндямонть вельде тыньгак лиятнень марто кастадо-кепедевтядо истямо кудокс, косо Пазось карми эрямо Иневанькс Оймеялтонзо вельде.


предыдущая глава Глава 2 следующая глава