Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 4

Петра ды Иоанн Инепромксонть икеле

1Зярдо Петра ды Иоанн кортасть ломантненень, ваксозост састь попт, Пазонь кудонь ванстыцянь прявтось ды саддукейть.2Весе сынь пек кежеельть сень лангс, мекс апостолтнэ тонавтсть ломантнень ды, Иисусонь вельмеманть лангс невтезь, кортасть кулозьстэ вельмемадо.3Сынь кундызь Петрань ды Иоаннонь чокшнень шкава ды секскак валскес пекставтызь пекстамо кудос.4Ансяк ламот, конат маризь сынст тонавтома валост, кемезевсть, ды кемицятнень цётост кассь вете тёжас.

5Омбоце чистэнть прявтнэ, покштнэ ды Моисеень Койс тонавтыцятне пурнавсть Ерусалимс.6Тосо ульнесь Аннас – попонь прявтось, Кайафа, Иоанн, Александр ды попонь прявтонть лия роднянзо-раськензэ.7Сынь аравтызь апостолтнэнь эсест икелев ды кевкстизь: «Кодамо вийсэ ды кинь лемсэ тынь шумбралгавтынк чамор ломаненть?»

8Петра, Иневанькс Оймеялтсо пештязь, мерсь: «Раськенть прявтт ды Израилень покшт!9Бути тынь течи вештядо минек пельде каршо вал сэредиця ломаннень лездамонь кувалма ды бути кевкстнетядо, кода сон ульнесь шумбралгавтозь,10сестэ содадо тыньгак, Израилень весе раськеськак: Назаретэнь Иисус Христосонь лементь вельде те ломанесь ашти ней икеленк шумбра-паро! Тынь Иисусонь вачкодекшнынк крёст лангс, а вана Пазось ялатеке вельмевтизе кулозьстэ.11Иисус – се кевесь, конань тынь, кудонь теицятне, ёртынк ды кона мейле арась ужонь-уголонь кирдиця юр кевекс, ды Сондензэ башка киньгак эйсэ лиясо арась идема.12Апак максо ломантненень весе менеленть ало лия истямо лем, конань вийсэ минь идевлинек».

13Зярдо инепромксонсетне неизь Петрань ды Иоаннонь апелеманть ды редизь сынст апак тонавтозекс, весемень кондямо ломанекс, сынь дивазевсть. Сестэ сынь чарькодсть: неть ломантне ульнесть Иисусонь марто молицятнень ютксто.14Шумбралгавтозентькак неизь апостолтнэнь вакссо аштемстэ, ды секскак сыненст а мезе ульнесь ёвтамс каршо.15Сестэ сынь кармавтсть апостолтнэнень лисемс Инепромксстонть ды кармасть эсь ютковаст кортнеме:16«Мезе миненек теемс неть ломантнень марто? Ерусалимень весе эрицятне содыть, кодамо алкуксонь тамаша сынь тейсть, ды миненек а кода тень сёпомс.17Ансяк раськенть ютксо седе келейстэ те кулянть а эряви сравтнемс, тандавтнезь, кардасынек сынст: Иисусонь лемензэ коряс киненьгак мезеяк а кортамс».

18Сынь таго тердизь апостолтнэнь ды кежейстэ кармавтсть тенст а кортамс ды а тонавтомс Иисусонь лемсэ.19Ансяк Петра ды Иоанн мерсть тень каршо: «Арседе тынсь: бути карматано седе пек кунсоломо тынк, ды аволь Пазонть, – те виде-а виде ули Пазонть икеле?20Минь кодаяк а цидярдтано а кортамс сень эйстэ, мезенть неинек ды маринек».21Инепромксонсетне таго, седеяк пек тандавтнезь, кардызь апостолтнэнь ды нолдызь. Сынь эзть муе эйсэст чумонь пандомань тувтал. Весе перькаст аштиця ломантне шнасть Пазонть теезенть кисэ,22эдь ломанентень, конань марто лиссь те тамашань шумбралгавтомась, ульнесть ниленьгеменде ламо иеть.

Кемицятнень озномаст

23Зярдо Петрань ды Иоаннонь нолдызь, сынь таго састь эсь ялгаст юткс ды ёвтнизь, мезе тенст кортасть попонь покштнэ ды раськень прявтнэ.24Тень марямодо мейле весе кемицятне кармасть вайгельсэ озномо Пазонтень: «Весеменькирди Паз! Тон теик менеленть, моданть, иневеденть ды весементь, мезе сынст эйсэ.25Тон кортыть Иневанькс Оймеялтсо Давидэнь вельде, кона минек покштянок ды Тонь важот:
“Мекс пек кежейгадсть лия раськенсетне?
Мекс стяко арсить зыянов тевде раськетне?
26Масторлангонь инязортнэ сыргасть тюреме,
прявтнэяк вейсэндявсть Азоро Пазонть каршо
ды Сонзэ кучовт Идицянть каршо”.
27Ды алкукскак те ошсонть Ирод ды Понтий Пилат вейсэндявсть лия раськенсетнень ды Израилень ломантнень марто Тонь Иневанькс Иисус Цёрат каршо, конань Тон вадик-кочкик Идицякс.28Сынь топавтызь сень, мезенть Тон икелепелев аравтык Эсь вийсэть ды арсемасот.29Ды ней, Азоронок, варштак сынст тандавтнемаст лангс ды макст тенек, Тонь важотненень, вий апак пеле пачтямс Тонь валот.30Тон венстик кедеть ды тейть истя: шумбралгалест сэредицят, улест невтезь дивань тевть ды тамашат Тонь Иневанькс Иисус Цёрат лемсэ!»

31Зярдо сынь прядызь озномаст, сорнозевсь се таркась, косо сынь ульнесть, весе сынь пештявсть Иневанькс Оймеялтсо ды апак пеле ушодсть пачтямо Пазонь валонть.

Весемесь вейсэнь

32Кемицятнеде ульнесть ламо, ды весе сынь вейсэндявсть седейёжосост ды превсэст-оймесэст. Кияк эзь лово эсь ули-паронзо ансяк эсензэкс, весемесь ульнесь вейсэнь.33Апостолтнэ, ине вийсэ пештязь, ёвтнесть Иисус Христос Азоронть вельмемадонзо, ды ине чанстесь ульнесь казезь весенень сыненст.34Арасельть ютксост арасьчисэть, эдь весе ломантне, кинь ульнесть модаст ды кудост-чист, микшнильть эйсэст, ярмактнень кандылизь35ды максылизь апостолтнэнь кедьс. Неть ярмактнень сынь явшильть кемицятнень ланга, кинень зяро эряви.36Истя Иосияяк, Кипра усиянь левинсесь, конанень апостолтнэ мерильть Варнава, лиякс – Лациця-Кемекстыця,37миизе эсь паксянзо, кандынзе ярмактнень ды максынзе апостолтнэнь кедьс.


предыдущая глава Глава 4 следующая глава