Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 9

Савла вастови Иисус марто

1Савла икеле ладсо яла лакась кежсэ, Азоронть тонавтницянзо туртов куломань арсезь. Сон сась попонь прявтонтень2ды вешинзе кедьстэнзэ сёрматнень Дамасконь синагогатнень прявтост туртов. Сёрматнесэ мерезель: бути Савла муи ошсто Иисусонь тонавтоманзо мельга молицят, сонензэ максозь вий кундамс сынст, цёрат сынь эли ават, ды сюлмсезь пачтямс Ерусалимс.

3Ансяк зярдо Савла Дамаск ошонть маласоль, ки лангсо апак учо валдомтызе сонзэ менельстэ лисиця сияждома.4Савла прась мода лангс ды марясь вайгель, кона кортась тензэ: «Савла, Савла! Мекс тон пансят Эйсэнь?»5«Тон кият, Азоро?» – кевкстизе Савла. «Мон Иисусан, конань тон пансят, – мерсь вайгелесь, – Стака теть молемс пшти сялгонть каршо».6Сон сорнозь ды пелезь мерсь: «Азоро! Мезе кармавтат монень теемс?» Азорось мерсь тензэ: «Стяк ды азё ошов. Тосо тонеть ёвтасызь, мезе теть теемс».7Ломантне, конат ульнесть Савла марто, чувтомсть таймаскадозь: сынь маризь вайгеленть, ансяк киньгак эзть нее.8Савла стясь моданть лангсто, панжинзе сельмензэ, ансяк киньгак эзь нее, сон сокоргадсь. Дамаск ошов ветизь кедь педе.9Колмо чить сон мезеяк эзь нее, эзь ярсаяк, эзь симеяк.

10Дамаск ошсо эрясь Иисусонь вейке мельга молицязо, лемезэ Анания. Азорось пшкадсь сонензэ неявкссо: «Анания!» – «Кунсолан, Азором!» – мерсь Анания.11Азорось поладызе кортамонзо: «Стяк ды мольть ульцяв, конанень мерить Виде ульця, Иудань кудос. Тосо кевкстик Тарс ошонь ломаненть, лемезэ Савла. Сон ней озны тосо12ды неявкссо несь, кода тензэ сы ломань, лемезэ Анания, путсынзе лангозонзо кедензэ, ды Савла одс тееви неицякс».13Тень каршо Анания мерсь: «Азоро, мон ламо марсинь те ломаненть эйстэ: сон тейсь пек ламо берянь Ерусалимсэ Тонеть кемицятненень.14Тейгак сон сась попонь покштнэнь пельде кармавтома марто кундсемс весень, кить озныть Тонеть».15Ялатеке Азорось мерсь Ананиянень: «Азё! Те ломанесь Монь кочкавт кедьёнкс. Сон карми Монь эйстэ ёвтнеме лия раськетненень, сынст инязортнэнень, Израилень ломантнененьгак.16Мон монсь невтьса тензэ, кода ламо сонензэ пиштемс Монь лемем кисэ».

17Анания тусь ды совась ёвтазь кудонтень, путынзе кедензэ Савлань лангс ды мерсь: «Савла ялгам! Иисус Азорось, кона лиснесь теть ки лангсо тей самсто, кучимим тонеть: кадык тон одс тееват неицякс ды пештяват Иневанькс Оймеялтсо».18Ды сеске прок лукшт прасть Савлань сельмензэ лангсто, ды сон нейке таго кармась нееме. Савла стясь ды нававтызе прянзо.19Мейле сон ярсась, ды вийтне велявтсть тензэ одов.

Савла ёвтни Иисусто Дамаск ошсо

Теде мейле Савла зярыя чить ютавтсь Дамаск ошсо кемицятнень ютксо.20Сон сеске кармась синагогава ёвтнеме: Иисус – Пазонь Цёра.21Весе, кить сонзэ маризь, дивсесть ды кевкстнесть: «Арази а сон пансесь Ерусалимсэ Иисуснэнь озныцятнень? Ды тейгак сон сась арази аволь сынст кундсеме ды попонь покштнэнень ветнеме?»22Савла тонавтсь седеяк ды седеяк покш вий марто. Еврейтне Дамаск ошсо талакадыльть, зярдо сон виевстэ кемевтиль: Иисус – те Пазонь кучовт Идиця.

23Те шкастонть ютасть читнеде байтяк, ды еврейтне вейсэ арсизь маштомс Савлань,24ансяк Савла марясь сынст арсевксэст эйстэ. Чить ды веть еврейтне ванстсть эйсэнзэ ошонь орта лангсо, арсесть маштомонзо.25Ансяк Савлань тонавтницянзо веть лездасть тензэ валгомс ошонь пирявксонть велькска покш паргсо.

Савла Ерусалимсэ

26Савла сась Ерусалимев ды тосо терявтнесь вейсэндявомс Иисусонь мельга молицятненень. Ансяк сынь эзть кеме: сон Иисусонь алкуксонь мельга молицязо, пельсть эйстэнзэ.27Ялатеке Варнава лездась Савланень ды ветизе апостолтнэнень. Сон ёвтнизе тенст, кода Савла вастызе ки лангсо Азоронть, кода Азорось кортась мартонзо ды кода Савла кармась Дамаск ошсо апак пеле пачтямо Иисусто паро кулянть.28Савла зярыя шка эрясь ды якась мартост Ерусалимга ды апак пеле пачтясь Иисус Азоронть эйстэ паро кулянть.29Сон сеедьстэ кортакшнось ды совсесь пелькстамос грекень кельсэ кортыця еврейтнень марто. Тонат мик терявтнесть маштомс сонзэ.30Зярдо кемиця ялгатне марясть теде, сынь ветизь Савлань Кесарияв ды тосто ильтизь Тарсов.

31Мейле весе Иудеянь, Галилеянь ды Самариянь кемицянь куротнес сась сэтьме шка. Сынь яла эрясть Азоронть мельде пелезь ды яла ламолгадсть Иневанькс Оймеялтонь виенть ды лездамонть вельде.

Айнеень шумбралгадомазо

32Петра, эрьва кува якамстонзо, сась Иисуснэнь кемицятненень, конат эрясть Лидда ошсо.33Тосо ульнесь цёра ломань Айней, кона катароль ды таркастонзо эзь стякшно кавксо иеть.34Петра мерсь тензэ: «Айней! Иисус Христос тонь шумбралгавтынзеть. Стяк ды пурныть алксот-ацамот». Айней сеске стясь.35Зярдо Лиддань ды Сарононь эрицятне сонзэ неизь шумбракс-парокс, сынь кармасть кемеме Азоронтень.

Табитань вельмевтемазо

36Иоппия ошсо ульнесь Иисусонь мельга молицязо, вейке ава, лемезэ Табита. Лементь смустезэ: “пандопрянь сея”, “газель”. Табита свал теиль ломаннень паро, лездыль кажовнень.37Ды вана сон неть читнестэ ормалгадсь ды кулось. Уловонзо шлизь ды путызь вере икельце кудос.38Лидда ошось Иоппия маласоль. Зярдо Иисусонь мельга молицятне марясть, келя, Петра Лиддасо, сынь кучсть тензэ кавто ломанть энялдома марто: «Сак курокке миненек Иоппияв!»39Петра сыргась мартост. Зярдо сынь пачкодсть тов, Петрань ветизь вере нупальс. Перьканзо пуромсть весе доватне, сынь авардсть ды невтнесть тензэ руцяст ды паляст, конатнень стынзе тенст Газелесь, зярдо эрясь мартост.40Петра весеменень мерсь лисемеде, пульзясь кумажанзо лангс ды кармась озномо. Мейле сон велявтсь кулозенть ёнов ды мерсь: «Табита, стяк!» Табита панжинзе сельмензэ, неизе Петрань ды озась.41Петра саизе кедте ды лездась тензэ стямс пильге лангс. Мейле сон тердинзе доватнень ды весе кемицятнень, аравтызе икелест вельмезь Табитань.42Теде кармась содамо весе Иоппиясь, ды ламо ломанть кемезевсть Азоронтень.43Теде мейле Петра эрясь зярыя шка Иоппиясо, Симон кедень теицянть кудосо.


предыдущая глава Глава 9 следующая глава