Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ГАЛАТИЯНЬ КЕМИКУРОТНЕНЕНЬ ПАВОЛОНЬ СЁРМАЗО

Глава 6

Лездадо вейкенк-вейкенк туртов

1Кемиця ялгат! Бути кияк сови пежетьс, сестэ тынь, кить эрить Оймеялтонть ветямонзо коряс, аравтынк сонзэ виде ки лангс. Ансяк тень эряви теемс чевтьстэ ды сэтьместэ. Теке шкастонть ванодо эсенк мельгаяк, тынськак аволиде маняво пежетьс.2Лездадо вейкенк-вейкенк туртов кандомс эсь канстонзо-ашконзо, истя тынь топавтсынк Христосонь коенть.3Бути ломанесь, кона мезекскак а ашти, сонсь эсь прянзо покшкавтни, сестэ сон ансяк манчи эсь прянзо.4Кадык эрьвась видестэ ваны эсь тевензэ лангс. Сестэ сонензэ шнави прязо эсь тевсэнзэ, лиятнень лангс апак вано.5Эдь эрьванть ули эсь канстозо-сталмозо.

6Се, конань тонавтыть Пазонь валонтень, кадык максы весе эсь ули-паронзо эйстэ тонавтыцянзо туртовгак.7Илядо ильведевкшне-манявкшно: Пазонть зярдояк а манясак. Эдь мезе видят, секень нуят.8Се, кие топавты эсензэ пежетев обуцянь мельтнень, моли истямо ломань ёнов, кона види берянь паксяс ды нуи эйстэнзэ кулома-ёмамо. Се жо, кие топавты Оймеялтонь мельтнень, моли истямо ломань ёнов, кона види вадря паксяс ды нуи эйстэнзэ пингеде пингень эрямо.9Секскак паронь теемстэ а макссынек прянок сиземантень. Сестэ, бути а потатано те тевстэнть, эсь шкастонзо нутано паро сюро.10Истямо ладсо, зярс шкась ён, карматано тееме вадря весенень, ды кемиця ялгатнень туртов седеяк ламо.

Меельце вал

11Ней мон сёрмадан те пельксэнть эсь кедьсэнь. Несынк, кодамо покш буквасо!12А вана сеть, кить кармавтыть тынк тееме киськепень керявтома, бажить савтомс ломантненень. Сынь тень теить ансяк вана мекс: пелить Христосонь крёстонть кисэ пансематнеде.13Мик сетнеяк, кить теевтить керявтома, ялатеке а топавтыть Коенть. Тынк жо сынь арсить керявтомс ды шнамс эсест пряст тынк рунгонть эйсэ.14Неезэ Пазось, монь арась мелем шнамс прям мейсэяк, минек Иисус Христос Азоронть крёсттонть башка. Сонзэ вельде монень маряви теке крёст лангс вачкодезь-кулозь те мирэсь-масторось, ды монгак теке вачкодезян-кулозян те мирэнтень-масторонтень.15Эдь Христос Иисус марто вейсэндязь эрямосонть ялатеке, керявтозь ломанесь эли апак керявто. Эрявиксэсь ансяк – улемс Пазонь од теевксэкс.16Улезэ седейоймамо ды седеймарямо весенень, кить эрить те ветямовалонть коряс, ды Пазонь алкуксонь Израилентень!

17Кадык седе товгак кияк а канды-а теи монень сэредькст, секс мекс мон эсь рунгом лангсо Иисус Азоронть кисэ кандтнян тешкстнэнь-аржотнень.18Кемиця ялган, минек Иисус Христос Азоронть чанстесь улезэ тынк марто! Аминь.


предыдущая глава Глава 6 следующая глава