Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЭФЕС ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 4

Христосонь Кемикуронть вейсэньксчизэ

1Тень кувалт мон, кона пекстазь тюрьмасо Азоронть кисэ, энялдан тенк: эрядо се сэрей тердеманть алкуксонь питнензэ содазь, конасонть тынк тердидизь Пазось.2Свал уледе сэтьметь, чевте седейть ды цидярдыцят. Вечкезь кирдеде вейкенк-вейкенк коронзо.3Весе вийсэнк бажадо ванстомс Оймеялтонь максовт вейсэньксчинть ды кемекстадо сонзэ ладямонь сюлмавкссо.4Ули ансяк вейкине Рунго ды вейкине Оймеялт, истя жо вейкине седеень нежедемаськак, конанень тынк тердидизь Пазось.5Азорось вейкине, кемемась вейкине, нававтомаськак вейкине.6Ули ансяк вейкине Паз, весень Тетя, кона весень лангсо покш, важоди весень вельде ды весень эйсэ.7Весенень жо миненек, эрьвантень башка, максозь чанстень казне, конань Христос сюпавсто кази Эсь онксонзо коряс.8Секскак Пазонь Сёрмадовкссонть ёвтазь:
«Сон кепедевсь верев, ветинзе мартонзо полонсотнень,
Сон макссь казнеть ломантненень».

9“Кепедевсь” валось тесэ невти вана мезе: Сон икеле валгонеськак мода потс, тоначис.10Лисни: алов валгицясь Секе, кона кепедевсь весе менельтнедеяк верев, весементь Эсензэ эйсэ пештямга.11Те Христос казизе-аравтызе, кинень улемс апостолокс, кинень пазмарицякс, кинень Кенярксов кулянь пачтицякс, кинень кемикуронь ветицякс-ваныцякс ды тонавтыцякс.12Тень Сон теизе вана мекс: анокстамс Пазонь весе ломантнень важодема тевентень, Христосонь рунгонть эли Кемикуронть кастомантень-кемекстамонтень.13Истя минь весе пачкодтяно вейсэньксчис кемемасо ды Пазонь Цёранть чарькодемасо. Сестэ минь теевтяно вийс совазекс, Христосонь кондямо ломанекс, конатнень эрямост карми улеме пряс пештязь Сонзэ эйсэ.14Сестэ минь уш а карматано улеме пиже эйкакшокс, конатнень ведьвелявкс ладсо тарги-уски ды варма ладсо канды эсь мельганзо эрьва кодамо тонавтома, ды конатнень ёжов ломантне ёроковсто манчить-ильведстить.15Мекевланк, карматано эрямо видечинь ды вечкемань коряс. Сестэ минь карматано весемесэ яла седе пек вейсэндявомо-совавомо Христоснэнь. Сон Пря ды16вейсэнди весе рунгонть, кона эзнензэ-санонзо вельде кеместэ сюлмазь вейс. Зярдо эрьва пельксэсь топавты эсензэ тевензэ, сестэ весе рунгось касы ды кепети-кемексты вечкеманть вельде.

Христос марто од эрямо

17Истямо ладсо, вана мезть мон кортан, вана мезе лангсо Азоронть лемсэ аштян-кирдеван: уш илядо ветя прянк Пазонь а содыцятнень ладсо, конатнень превест-арсемаст чавот-стякот.18Сынст превест чополгавтозь, арась мелест содамс Пазонть. Сынь допрок кевензавтызь седеест, секскак васолот Пазонь максовт эрямодонть.19Сынст оймест теевсть ёжовтомокс, сынь каизь пряст рунгонь визькс мельтнень топавтомас ды кодаяк а пештевить эрьва кодамо аваньксэнть теемадо.20А вана тыненк максозель допрок аволь тень кондямо тонавтома Христосто.21Видечись – Сонзэ эйсэ. Тынь, нама, марсиде Сондензэ ды тынк тонавтыдизь, кода Сонзэ ломанть.22Тынк тонавтсть ёртомс икелень эрямо лувонть, конасонть эрясь тынк эйсэ ташто ломанесь, кона колызе-ёмавтызе эсь прянзо манчиця визькс мелень бажамотнесэ.23Одкстомодо эсь мельсэнк-превсэнк ды оймесэнк.24Оршаводо-вельтяводо од эрямонь лувсо, теке од ломаньсэ, кона теезь Пазонть кондямокс ды кона эри алкуксонь видечисэ ды Пазонть туртов алтазь эрямосо.

25Секскак, лоткадо кенгелемадо ды эрьвась кортадо видечи вейкенк-вейкенк туртов, эдь весе минь – вейкине рунгонь пелькст.26Натой, кежиявтомстояк илинк совавтне прянк пежетьс. Кадык тынк кежтне мадить-оймить чивалгомадо икеле.27Илядо кадо варине Идемевсентень!28Кие икеле салась, се кадык лотки саламодо ды лезэвстэ важодезэ: кадык эсь кедьсэнзэ теи тевензэ, ды улезэ сонзэ мезе максомс сененьгак, кие арасьчисэ.29Илязо лисе тынк кургосто кодамояк зыянов вал, ансяк вадря валт, конат лезэвть кемемань касомантень ды кандыть паро кунсолыцятненень.30Илядо ризнэвте Пазонь Иневанькс Оймеялтонть, конаньсэ тынь тешкстазтядо олячис идема-менстема чинтень.31Допрок кадынк эрьва кодамо ацирьгалеманть, кеженть, абунгалеманть, пижнеманть ды сялдоманть-покордамонть лия зыянонть марто вейсэ.32Уледе вейкенк-вейкенк туртов вадрякс, седеймарицякс, простнеде-нолдтнеде вейке вейкенень чумонк, кода Пазоськак нолдынзе тынк пежетенк Христосонь кувалт.


предыдущая глава Глава 4 следующая глава