Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙТНЕНЕНЬ СЁРМАСЬ

Глава 11

Кемема

1Кемемась – те кеместэ нежедема сень лангс, мезенть седейсэнек учотано, сень неемазо, мезесь ней а неяви.2Кемеманть вельде кезэрень ломантне савтыльть Пазонтень.

3Кемеманть вельде миненек чарькодеви: менельтне-мастортнэ ульнесть теезь Пазонть валонзо вельде, ды истямо ладсо весе неявиксэсь теезь анеявиксэнть эйстэ.

4Эсь кемеманзо коряс Авель кандсь Пазонтень Каинэнь аноксто седе паро анокс. Сон те кемеманть вельде савтызе Пазонтень кода видечисэ ломань. Пазось саинзе казнензэ ды теньсэ кемекстызе сонзэ видечинзэ. Те кемеманть вельде Авель нейгак корты, куш сонсь умок кулось.

5Эсь кемеманзо коряс Енок ульнесь саезь те масторлангстонть куломань апак сода. «Сон костояк эзь муеве, секс мекс сонзэ саизе Эстензэ Пазось». Те масторлангстонть саемадонзо икеле, – кода кортави-кемекстави эйстэнзэ –, сон савтыль Пазонтень.6Кемемавтомо киненьгак кодаяк а савтови Пазонтень. Эдь эрьвантень, кие сы Тензэ, эряви кемемс: Пазось эри ды казьсынзе сетнень, кить Сонзэ вешнить.

7Кемеманзо коряс Ной кунсолызе Пазонть икелев ёвтамонзо-панжоманзо седе, мезесь ульнесь зярс анеявиксэкс. Пазонть мелензэ ванозь, сон тейсь иневенч ды идизе эсь кудораськензэ. Эсь кемемасонзо сон невтизе-судизе те мирэнть-масторонть пежетевчинзэ ды максозель тензэ чумовтомочи кемеманть коряс.

8Кемеманзо коряс Авраам кунсолызе Пазонь тердеманть туемс се модантень, конань тензэ алтызе максомс Пазось. Сон тусь, куш сонськак эзь сода, ков моли.9Эсь кемеманзо коряс сон озась эрямо алтазь моданть лангс кода лия масторонь ломань. Тосо сон эрясь коцткудосо Исак ды Яков марто, конатненень мейле истя жо максозель се, мезенть алтызе Пазось.10Авраам учось истямо ош, кона ули путозь кеме юр лангс, ды конань архитекторокс ды теицякс ули Сонсь Пазось.11Кемеманзо коряс Сарраненьгак, кона ульнесь ачачтниця, максозель чачтома вий, куш сон уш сырельгак. Эдь Сарра ловсь: Пазось, алтамонь максыцясь, топавтсы Эсь валонзо.12Ды секс вейке сыре, кулома лангсо аштиця ломаньстэ чачтсть истя ламо эйкакшт-нуцькат, кода менелень тештне ды иневедь чирень алововикс чуварось.

13Те кемеманть марто весе неть ломантне кулостькак. Сыненст эзь ульне максозь се, мезенть алтызе Пазось, ансяк неизь сонзэ васолдо ды кенярдкшность тензэ. Эсест эйстэ сынь кортасть: сынь ансяк таркадо таркас якицят-пакицят ды ве ёндонь ломанть моданть лангсо.14Эдь сеть, конат истя кортыть, теньсэ невтить: сынь эсь тиринь масторонь вешницят.15Бути сынст пряст потсо улевель се масторось, конань кадызь, сестэ сынст, нама, сатоволь виест велявтомс мекев.16Арась, сынь бажасть седе паро масторонтень, лиякс меремс, менеленсентень. Секс Пазось а визделгали эйстэст ды мери тенст ловомс Сонзэ эсест Пазокс. Сон сыненст ошкак уш анокстась.

17Кемеманзо коряс Авраам максызе Исак цёранзо аноксокс, зярдо Пазось варчавтнесь сонзэ. Сон ульнесь анок кандомс аноксокс эсензэ вейкине цёранзо, конадонть Пазось уш максызе тензэ Эсь алтамонзо18ды икелев ёвтакшнось: «Тонь раськесь туи-рашты Исаконь пельде».19Эдь Авраам арсизе-ловизе: Пазонть ули виезэ, натой, кулозьстэяк вельмевтемс. Ды Исак велявтозельгак тензэ мекев теке кулозьстэ.20Кемеманзо коряс Исак чанстинзе-баславинзе Яковонь ды Исавонь, икелепелень эрямодост арсезь.21Кемеманзо коряс Яков куломстонзо чанстинзе-баславинзе Иосифень кавонест цёратнень, ды, эсь палканзо лангс нежедезь, сюконясь Пазонтень.22Кемеманзо коряс Иосиф, кулома лангсо улезь, ёвтась Израилень ломантнень Египетстэ лисемадост ды кармавтсь, мезе эряви теемс сонзэ ловажатнень марто.

23Эсь кемемаст коряс Моисеень тетянзо-аванзо кекшнесть эйсэнзэ колмо ковт чачомадонзо мейле. Сынь несть: эйдесь вельть мазый, ды эзть пеле инязоронь кармавтовксонть коламодо.24Эсь кемеманзо коряс Моисеень, зярдо сон кайсь-кепететсь, арасель уш мелезэ кандтнемс фараононь тейтеренть цёранзо лементь.25Сон кочкизе эсь мельсэнзэ Пазонь раськенть марто вейсэнь пиштеманть, аволь нурька шкас пежетьсэ седей витеманть-петеманть.26Сон сельмензэ кайсесь казненть лангс, кона учось сонзэ икелепелев, ды секскак ловсь покордамонть Пазонь кучовт Идицянть кисэ Египетэнь сюпавчитнеде седе питнейкс.27Кемеманзо коряс Моисей кадызе Египетэнть, инязоронть кежтнеде апак пеле. Сон теке эсь икелензэ несь анеявиця Пазонть ды секс цидярдызе весементь.28Кемеманзо коряс сон аравтызе-ютавтызе евреень Инечинть. Сон кармавтсь ваднемс верьсэ кенкштнень палмантнень ды пайметнень сень кисэ: куловтниця ангелэсь аволинзе маштне израиленсетнень васень цёра эйкакштнэнь.29Кемемаст коряс израиленсетне печтизь Якстере иневеденть теке коське таркава. Зярдо текень жо теиксэлизь египетэнсетне, сеть весе ваясть.

30Кемеманть вельде прась-каладсь Ерихононь ош пирявксось сисем чить перьканзо якамодо мейле.31Кемеманзо коряс Рахав, усксевиця авась, эзь ульне маштозь Пазонть каршо молицятнень марто вейсэ, эдь сон израилень салава кевкстницятнень-киведицятнень вастынзе кода эсь ялганзо.

32Мезе жо монень ёвтнемс седе тов? Шкам арась ёвтнемс Гедеондо, Варакто, Самсондо ды Евтайде, Давидтэ, Самуилдэ ды пазмарицятнеде.33Кемемаст вельде сынь изнясть раськеть-масторт, кемекстасть видечисэ эрямонть, сайсть сень, мезе алтась Пазось. Сынь пекстнесть-сёлгонесть левтнень кургост,34мадстнесть виев толт, идевкшнесть пшти тородо. Сынь ульнесть лавшот, – теевсть виевекс, кемельть тюремасо, тапсильть ятонь ушмот.

35Ульнесть ават, конатненень кулозь родняст-раськест максозельть мекев вельмевтезь. Лиятне жо эзизь сае олячинть, муцязь кулость, эдь сынст ульнесь мелест пачкодемс седе паро вельмемантень.36Лиятненень савсь кирдемс нарьгамот ды локшосо керямот, натой кшнинь терть ды пекстамо кудот.37Сынст чавность кевсэ, пилясть эйсэст чачков, муцясть, кулсесть тородо. Сынь яксесть-азгондсть ревень ды сеянь кедень оршамосо, кирдсть покш арасьчи, пансемат, муцямот.38Неть ломантне ульнесть вельть парт те масторлангонтень, яксесть-азгондсть чаво модава ды пандо ланга, эрясть кевботмарга ды мода лазовкска.

39Весе сынь кемемаст вельде савтыльть Пазонтень, ды ялатеке сынь эзть пачкоде алтазентень,40секс мекс Пазось арсесь минек туртов мезе-бути вельть седе паро. Сонзэ бажамозо ульнесь истямо: пачкодевельть неть ломантне асатыкстэмечис ансяк минек марто вейсэ.


*а 11:28 палмантне ды пайметне – косяки и перекладины


предыдущая глава Глава 11 следующая глава