Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 20

Павол моли Македонияв ды Грецияв

1Ломантнень кепедевеманть оймамодо мейле Павол тердинзе Иисусонь мельга молицятнень, ёвтась тенст кемекстыця валт, сюконясь ды тусь Македонияв.2Сон ютынзе сеть таркатнень ды кемицятненень ламо кортась истямо валсо, конат кемекстасть сынст оймест. Истя сон сась Грецияв,3косо ульнесь колмо ковт. Зярдо сон венчсэ туиксэль Сирияв, еврейтне анокстасть сонзэ маштомонзо. Теде марязь, Павол сайсь мель мурдамс таго Македониянь трокс.4Сонзэ марто вейсэ тусть Асиянь видьс Пиррэнь цёразо Сопатра Беройя ошсто, Аристарк ды Секунд Фессалоникасто, Гай Дербестэ, Тикик ды Трофим Асиясто ды Тимофей.5Сынь ютасть икелев ды учость эйсэнек Троадасо.6Минь жо покш венчсэ сыргинек Филиппасто Ламбамсто сюкоронь покшчиденть мейле ды вете чинь ютазь вейсэндявинек мартост Троадасо. Тосо ульнинек сисем чить.

Павол вельмевтьсы Эвтикень

7Оймсема чинь чокшнестэ, чинть валгомадо мейле, минь пурнавинек кшинь синдеме. Павол пурнась сыця чистэнть ки лангов, кортнесь весень марто пелевес.8Вере нупальсэнть, ков минь пурнавинек, палсть ламо лампат.9Вальма лангсо озадоль од ломань, лемезэ Эвтик. Паволонь кортамсто од ломанесь нуваземсь ды удомсто прась колмоце кудонть сэрьстэ алов. Кепедемстэ редизь: сон кулозель.10Павол валгсь, комась од ломаненть вельксс ды кутмордызе сонзэ. «Илядо мелявто, – мерсь Павол, – сон жив!»11Павол таго кузсь вере нупальс, косо пурнавозельть весе, синтризе кшинть ды ярсась мартост. Сон кувать, малав валскес, кортась пурнавозтнень марто ды мейле тусь эсь кияванзо.12Од ломаненть ветизь кудов живстэ, ды тень эйстэ весе пек кеняргадсть.

Троадасто Милетэв уемась

13Минь озынек покш венчс ды туинек Ассов, косо Павол вейсэндявиксэль миненек. Сон эсь мелензэ коряс Ассов кинть ютызе ялго.14Ассосо сон вастымизь, озась минек венчентень, ды минь туинек Митилинав.15Омбоце чистэ минь таго ведьга туинек тосто седе тов ды пачкодинек Киосос. Чинь ютазь минь ульнинек Самоссо, ды Трогиллияв совамодо мейле таго чинь ютазь пачкодинек Милетэв.16Павол сайсь мель вакска ютамс Эфесэнть, Асиясо а кирдевемга. Сон пек капшась, бути те топавтови, кенеремс Ерусалимев Ведьгеменце чинь покшчинтень.

Павол корты Эфесэнь кемикуронь прявтнэнь марто

17Милетстэ Павол кучсь Эфесэв кулянь пачтиця, кемицянь куронь прявтнэнь тердемга.18Зярдо тонат састь, сон мерсь тенст: «Тынь тынсь содатадо, кода мон эринь мартонк Асияв самодон мейле васенце чистэнть саезь.19Мон сэтьместэ ды ламо сельведь марто важодинь Азоронтень. Мон эзинь вано варчавтнематнень лангс, конатнень монень савсь кирдемс еврейтнень зыянов арсематнень кувалма.20Мон эзинь стувто мезеяк эрявиксэнть эйстэ, мезде монень кортамаль тенк. Мекевланк, кортынь апак кекшне весемень икеле ды тонавтынь тынк кудосто кудос яказь.21Мон пек тердинь еврейтнень ды гректнень, пежетест кадозь, велявтомс Пазонтень ды кемевемс минек Иисус Христос Азоронтень.

22Ней вана, Оймеялтонть кармавтомасо сюлмазь, молема тень Ерусалимев, кадык а содангак, мезе тосо учи эйсэнь.23Ансяк вейкеде содан: эрьва ошсонть Иневанькс Оймеялтось корты монень пекстамо кудодо ды пиштемадо, конатне монь учнить.24Ялатеке мон эсь эрямом мезекскак а путан, а пелян куломадояк. Монень эряви ансяк кеняркс марто ютамс эсь ким ды парсте прядомс важодеманть, конань максызе монень теемс Иисус Азорось, – пачтямс Кенярксов кулянть Пазонь чанстеденть.

25Мон эринь тынк ютксо, ёвтнинь тыненк Пазонь Инязорксчиденть. Ней вана содан: кияк тынк эйстэ монь зярдояк мейле а несамам.26Секс мон течи яволявтнян: бути кияк тынк эйстэ моли ёмамос, монь теньсэ чумом арась.27Эдь мон свал тенк ёвтнинь Пазонть весе мелензэ-арсевксэнзэ, мезеньгак апак стувто.

28Ванодо эсенк мельга ды весе стаданть мельгаяк, конанень Иневанькс Оймеялтось путыдизь ваныцякс. Ванстодо Азоронть ды Пазонть кемикуронзо, конань Сон Эсь верензэ питнесэ рамизе-идизе Эсензэ туртов.29Мон содан: туемадон мейле тыненк сыть азарсь верьгизт, конат стаданть а жалясызь.30Тынсенк юткстояк лисить ломанть, конат кармить кенгелеме, виде кинть лангсто кемицятнень эсь мельгаст саемга.31Секс илядо удо ды кирдеде мельсэнк, кода мон колмо иень перть чинек-венек апак лотксе сельведь марто тонавтынь тынк.

32Ней вана кемиця ялган, мон кадтадызь тынк Пазонть мелявтыця кедензэ лангс ды Сонзэ чанстенть эйстэ кулянтень. Те кулянть ули виезэ кемекстамс тынк ды максомс тенк алтазь вадря таликанть Пазонь весе ломантнень ютксо.33Мон эзинь бажа саеме эсень туртов киньгак пельде а сия, а сырне, а оршамопель.34Тынсь содатадо, вана неть кедтнесэ мон тринь-андынь эсь прямгак, ялгатненьгак.35Теньсэ мон невтинь тенк: вана истя, важодезь, эряви лездамс кажовтненень ды мельсэ кирдемс Иисус Азоронть валонзо. Сон Сонсь мерсь: “Седе уцяскав максыцясь – аволь саицясь”».

36Тень ёвтазь, Павол весемень марто пульзясь кумажа лангс ды ознось.37Весе авардсть, кутморясть Паволонь ды палсесть эйсэнзэ.38Сынст сехте пек ризнэвтизь сонзэ валонзо: «Тынь монь зярдояк мейле а несамизь». Ды теде мейле кемиця ялгатне Паволонь ильтизь покш венченть видьс.


предыдущая глава Глава 20 следующая глава