Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

КОРИНФ ОШОНЬ КЕМИКУРОНТЕНЬ ПАВОЛОНЬ ОМБОЦЕ СЁРМАЗО

Глава 3

Од вейсэньлувонь важотне

1Арази миненек эряви таго тынк икеле шнамс эсь прянок? Эли жо эрявить миненеккак, кода кой-кона лиятненень, кемевтиця сёрмат тынк туртов эли тынк пельде? Нама, аволь.2Минек кемевтиця сёрмась – те тынь тынсь! Сон сёрмадозь минек седейтнес, сон весенень содавикс ды эрьвантень ловновикс.3Парсте неяви: тынь ультядояк се сёрмась, конань сёрмадызе Христос минек важодеманть вельде. Сон сёрмадозь эриця Пазонть Оймеялтсо, аволь черниласо, ды ломантнень седейс, аволь кевень лаз лангс.

4Минь истя кортатано вана мекс: минек ули Пазонть лангс кемемачинек, конань максызе тенек Христос.5Мон а кортан, буто минь минсь мезекс-бути маштовтано ды миненек эстенек мезе-бути тееви. Арась, минек маштомачись максозь Пазонть пельде.6Те Сон теимизь минек маштовиксэкс, улемс од вейсэньлувонь важодицякс. Те вейсэньлувонть юрсо ашти Оймеялтось, аволь сёрмадозь Коесь. Эдь Коесь канды кулома, Оймеялтось жо кази эрямо.

7Уш Коень коряс важодемаськак, кона канды кулома ды конань кармавтовкстнэ сёрмадозельть кевень лаз лангс, сияждсь покш иневалдосо. Куш те иневалдось ульнесь прядовиця-ёмиця, ялатеке израилень ломантне эзть ваново Моисеень сияждыця чаманзо лангс.8Сестэ седеяк покш иневалдосо сияжды Оймеялтонь коряс важодемась!9Ды бути натой Коень коряс важодемась, кона вети судямос, сияждсь истямо иневалдосо, сестэ ламодо седе покш иневалдосо сияжды се важодемась, кона вети Пазонть икеле чумосто лисемас!10Сонзэ иневалдось истямо аёвтавикс покш, мик вакссонзо чополгады се, мезесь икеле ульнесь пек сияждыцякс.11Эдь бути уш прядовицясь-ёмицясь сияждсь иневалдосо, сестэ ламодо седе пек сияжды зярдояк апрядовицясь-аёмицясь!

12Зярдо минек ули истямо кеме седейнежедьксэнек, сестэ минь кортатанояк апак кекше ды апак пеле.13Минь а тейтяно Моисей ладсо, кона вельтямосо кекшнесь эсь сияждыця чаманзо секс: аволизь нее Израилень ломантне прядовиця-ёмиця сияждоманть пензэ.14Ялатеке сынст превест-седеест кевензазельть. Секскак течинь чис те вельтямось ашти лангсост Коенть ловноманть кунсоломсто, ды сон саеви ансяк Христос вельде.15Истя, нейгак, Моисеень Коенть ловномсто, те вельтямось ашти сынст седеест лангсо.16Ансяк зярдо ломанесь велявты Азоронтень, сестэ те вельтямось саеви-ёртови лангстонзо.17Азорось – те Оймеялт, ды косо Азоронть Оймеялтось, тосо олячи.18Истя, весе минь, конат чамань апак кекше вантано Азоронть иневалдонь сияждоманть лангс, кода зеркалань пачк, ультяно лиякстомтозь. Ультяно теезь Сонзэ ёнов молицякс ды сияждыцякс яла седеяк пек цивтёрдыця валдосо. Тень теи Азорось, кона Оймеялт.


*а 3:3 кевень лазт – скрижали. Сынст лангсо сёрмадозельть Пазонь кемень кармавтовкстнэ.


предыдущая глава Глава 3 следующая глава