Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

РИМ ОШОНЬ КЕМИКУРОНТЕНЬ ПАВОЛОНЬ СЁРМАЗО

Глава 8

Од эрямо Пазонь Оймеялтонть ветямонзо коряс

1Истя, сетнень, кить Христос Иисус марто вейсэндязь, эрить аволь колазь обуцянть коряс, а вана Оймеялтонть коряс, Пазось ней мейсэяк а судясынзе.2Эдь Пазонь Оймеялтонь коесь, кона максы эрямо сетненень, кить максызь пряст Христос Иисуснэнь, олякстомтымим монь пежетень ды куломань койденть.3Те эзь тееве Моисеень Коентень, кона лавшоль минек колазь обуцянть чумонзо коряс, тень теизе Пазось. Кода анокс пежетенек кисэ Сон кучизе масторлангс Эсензэ Цёранзо, кона молиль пежетев ломань ёнов. Истя Сон Христосонь рунгосонть судизе ломанень пежетенть.4Сон тень теизе сень кисэ: топавтомс миненек Коень виде вешематнень, эдь минь эрятано Оймеялтонть коряс, аволь уш колазь обуцянок коряс.5Кить эрить эсест колазь обуцяст коряс, сеть арситькак колазь обуцяст бажамотнень коряс. Кить эрить Оймеялтонть коряс – сеть арситькак Оймеялтонь бажамотнень коряс.6Колазь обуцянь бажамотне ветить куломас, Оймеялтонь бажамотне ветить эрямос ды седейоймамос.7Истямо ладсо, колазь обуцянь бажамотнень коряс эрицятне теевить Пазонть ятокс-душманокс: сынь а максыть пряст Пазонь Коенть алов, ды сыненст сон а максовияк.8Ломантнень, конатне эрить колазь обуцяст коряс, арась виест савтомс Пазонтень.

9Ансяк тынь эрятадо Оймеялтонь бажамотнень коряс, аволь колазь обуцянк коряс, бути, нама, тынк эйсэ эри Пазонь Оймеялтось. Кинь эйсэ арась Христосонь Оймеялтось, се аволь Сонзэ.10Бути Христос тынк эйсэ, сестэ рунгось кулозь пежетентень, а вана оймеялтось эри видечинтень.11Пазось вельмевтизе кулозьстэ Иисусонь. Ды бути тынк эйсэ эри Сонзэ Оймеялтось, сестэ самай те Пазось, кие вельмевтизе кулозьстэ Христосонь, тейсынзе эрицякс тынк кулыця рунгонккак Эсензэ Оймеялтонть вельде, кона эри тынк эйсэ.

12Истя, кемиця ялган, минь долгсотано, ансяк аволь минек колазь обуцянть икеле: миненек а эряви теемс сонзэ бажамотнень коряс.13Эдь бути тынь карматадо эрямо колазь обуцянть коряс, сестэ кулотадо-ёматадо. Бути Оймеялтонть вийсэ куловтсынк пежетев тевенк, сестэ карматадо эрямо.

14Весе, кинь вети Пазонь Оймеялтось, Пазонь эйкакшт.15Оймеялтось, кона тыненк максозь, те аволь урексчинь оймеялт, кона кармавтовлидизь тынк одс пелезь эрямо. Мекевланк, тыненк максозь Оймеялт, кона тынк теидизь Пазонь эйкакшокс! Те Сон сыргавты эйсэнк тердеме Пазонть: «Абба! Тетяй!»16Сонсь Пазонь Оймеялтось кемевти минек седейёжонтькак: минь Пазонь эйкакштано.17Ды бути минь Сонзэ эйкакштано, сестэ миненек истя жо максови Сонзэ алтавт чанстямось-баславамось. Те сюпав чанстямонть Пазось макссы миненек Христос марто вейсэ. Эдь бути минь Христос марто пиштяно-майсетяно, сестэ явсынек Сонзэ инексчинтькак.

Миньгак карматано улеме Пазонь инексчисэнть

18Мон кеман: минек неень шкань пиштематне мезекскак а лововить се инексчинть коряс, кона панжови тенек ды учи эйсэнек.19Пазонь весе теевксэсь покш седейризкс марто учи, зярдо Пазось апак кекше невтьсынзе-яволявтсынзе Эсь эйкакшонзо.20Пазонь весе теевксэсь понгсь пиштеманть-ёмамонть алов – аволь эсь мелензэ коряс. Тень истя аравтызе Пазось кемезь-нежедезь се лангс:21Сонзэ теевксэськак ули олякстомтозь ёмамонь-наксадомань урексчистэ ды явсы Пазонь эйкакшонь олячинть ды инексчинть.22Минь содатано: Пазонь весе теевксэсь те шкас кувси ды пишти прок чачтомсто ава.23Ды кувси аволь ансяк Пазонь теевксэсь, истя жо миньгак, конатненень максозь Оймеялтось, кода Пазонь пельде васенце казне. Миньгак оймесэнек кувсетяно се шканть учозь, зярдо Пазось сайсамизь минек кода Эсь эйкакшонзо ды рунгонек-мезнек олякстомтсамизь куломанть эйстэ.24Минь идезтяно – те минек кеме седейнежедьксэнек. Бути минек седейнежедькс марто учомась уш топавтоволь, сестэ а мезекс улевель те учомась. Кие жо седейнежедькс марто учни сень, мезенть уш неи!25Ды бути минь нежедтяно-кемтяно мезе-бути лангс, кона зярс анеявикс, сестэ минь учотанояк сонзэ цидярдозь ды кеместэ.

26Ды тесэ Оймеялтось сы тенек лездамо: эдь минь лавшотано ды а содатано, кода эряви тенек озномс. Сестэ Оймеялтось Сонсь озны-энялды минек кисэ кувсематнесэ, конат а ёвтавить валсо.27Ды Пазось, кона чарькодьсынзе минек седеенек, соды, мезде арси Оймеялтось, секс мекс Оймеялтось озны-энялды Пазонь ломантнень кисэ Пазонь меленть коряс.

28Минь содатано: весемесь велявты парокс сетненень, кить вечксызь Пазонть, ды конатнень Сон тердинзе Эсь мелензэ-арсеманзо коряс.29Те сеть, конатнень Пазось кочкинзе умок, зярдо сынь арасельтькак, ды аравтынзе улемс Эсь Цёранзо ёнов молицякс. Истямо ладсо, Сонзэ Цёрась карми улеме васенцекс ламо ялакстнэнь-сазортнэнь ютксо.30Конатнень Пазось аравтынзе, сетнень тердинзеяк; конатнень тердинзе, сетнень ловинзе чумовтомокскак; конатнень ловинзе чумовтомокс, сетнень марто явизе инексчинзэяк.

Пазонь вечкемась

31Мезе эно ёвтамс весе тень коряс? Бути Пазось минек кисэ, сестэ кинь ули виезэ аштемс минек каршо?32Киньгак арась! Эдь Пазось эзизе жаля мик Эсь Цёранзояк, конань максызе куломас весень минек кисэ. Бути Сон максызе эсь Цёранзо, сестэ Сон миненек макссы весементь лиянтькак!33Кинень чумондовить Пазонь кочкавтнэ? Киненьгак! Эдь Сонсь Пазось сынст ловинзе чумовтомокс!34Кинь эно ули виезэ сынст судямс? Киньгак! Эдь Христос Иисус кулось, ды те допрок аволь весе: Сон кулозьстэ вельмевтезьгак ды ней ашти Пазонть вить кедензэ ёно ды озны-энялды минек кисэ!35Кие эно минек явсамизь Пазонь вечкеманть эйстэ? Паряк, пиштемат, стакачить, пансемат, вачочи, арасьчи, пелемачи, кулома..?36Сёрмадовкссо ёвтазь:
«Тонь кисэ минь свал кулома лангсо,
минек ловить ревекс, конатнень ветить пеель алов».
37Ансяк весе неть стакачитнестэ минь листяно ине изницякс Сень вийсэ, Кинень минь вечкевинек.38Мон кеман: мезеяк – куломаськак, эрямоськак, ангелтнэяк, менелень лия прявтнэяк, вийтнеяк, неень пингеськак, сыця пингеськак,39верце вийтнеяк, алце вийтнеяк ды Пазонь кодамояк лия теевксэськак – а явсамизь минек Пазонь вечкеманть эйстэ, кона тенек невтезь минек Христос Иисус Азоронть вельде!


предыдущая глава Глава 8 следующая глава