Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ ВАСЕНЦЕ СЁРМАЗО

Глава 2

Христос – минек кисэ валонь каиця

1Тиринь тякинеть! Мон тень сёрмадан тыненк пежетьс а совамонк кисэ. Бути кие ялатеке сови пежетьс, минек Тетянть икеле ули кисэнек валонь каиця – Иисус Христос, кона теи видечинть коряс.2Сон минек пежетнень нолдыцясь ды аволь ансяк минектнень – весе масторлангонь пежетнень нолдыцясь.3Бути минь эрятано Пазонь кармавтовкстнэнь коряс, те алкукскак невти миненек: минь парсте содасынек Пазонть.4Кие корты: «Мон парсте содаса Пазонть», – ансяк сонсь ялатеке а эри Сонзэ кармавтовкстнэнь коряс, се кенгелиця, ды видечи эйсэнзэ арась.5Кие эри Сонзэ валонть коряс, сень эйсэ Пазонь вечкемась алкуксокс топавтовсь. Тень кувалт алкуксокс содави миненек: минь Пазонть эйсэ.6Кие корты: «Мон эрян-аштян Пазонть эйсэ», – эрязо истя, кода эрясь Христос.

7Вечкевикс ялган! Сёрмадан тенк аволь од кармавтовкс, мекевланк, ташто кармавтовкс, конань тынь содасынк ушодксстонь саезь. Те ташто кармавтовксось – куля, конань тынь маринк ушодксстонть саезь.8Ды ялатеке сёрмадан тенк од кармавтовкс, ды сонзэ алкуксчись неяви ней Христоссо ды тынк эйсэяк: эдь чоподачись поты, ды алкуксонь валдочись уш валдомты.9Кие корты: «Мон эрян валдосо», – ансяк сонсь ялатеке кеж кирди эсензэ кемиця ялганзо лангс, се течинь чис чоподасо.10Се, кие вечксы эсензэ кемиця ялганзо, эри-ашти валдосо, ды сонзэ эйсэ арась мезеяк истямо, конась кармавтоволь пупордямо.11Се, кие кеж кирди кемиця ялганзо лангс, – се чоподасо аштияк, чоподасо якияк ды а соды, ков сон моли, эдь чоподась сельмензэ сокоргавтынзе.12
Сёрмадан тенк, тиринь тякинеть:
тынк пежетенк нолдазь Сонзэ лементь кувалт.
13Сёрмадан тыненк, сыретне:
тынь содасынк Сонзэ, кона ульнесь ушодкссто саезь.
Сёрмадан тыненк, одтнэ:
тынь изнинк Апаронть.
Сёрмадан тенк, эйдинеть:
тынь содасынк Тетянть.
14Мон сёрмадынь тыненк, сыретне:
тынь кармиде содамо Сонзэ, кона ульнесь ушодкссто саезь.
Мон сёрмадынь тыненк, одтнэ:
тынь виевтядо
ды тыньсэнк эри-ашти Пазонь валось,
ды тынь изнинк Апаронть.
15Илядо вечке те пежетев масторлангонть ды сеньгак, мезе те масторлангсонть. Кие вечксы истямо масторлангонть, сеньсэ арась таркине Тетянтень вечкеманть туртов.16Эдь весе, мезе те масторлангсонть, – ломанень колазь бажамотне, сельмень визькс мельтне ды эрямонь каштанчись – те весемесь моли пежетев масторлангстонть, аволь Тетянть пельде.17Ды те масторлангось весе эсензэ визькс мельтнень марто прядови, ансяк Пазонь мелень топавтыцясь эри пингеде пингес.

Антихристэсь эли Христосонь каршо молицясь

18Эйдинеть! Ды вана сась прядовома шкась. Тынь мариде: сы Антихристэсь. Ды вана ней лиссть лангс уш ламо антихристт, ды теньсэ чарькодтяно: сась прядовома шкась.19Сынь лиссть минек ютксто, ансяк минекекс сынь зярдояк арасельть. Бути сынь улевельть минекекс, сестэ сынь ковгак а тукшновольть юткстонок. Минек эйстэ сынст туемась невти: весе сынь аволь минекть.20Тыненк максозь Иневаньксэнть пельде Оймеялтонь вийсэ вадема, ды тынь содасынк весементь.21Мон сёрмадан тыненк аволь секс, буто тынь а содасынк видечинть. Мекевланк, сёрмадан секс, мекс тынь содасынк сонзэ ды содасынк сеньгак: кодамояк кенгелямо а рашты видечистэ.22Кенгелицясь – кие истямось? Кенгелицясь – се, кона а лови Иисусонь Христосокс. Ломанесь, кона а кеми Тетянтеньгак, Цёрантеньгак, – те антихрист.23Кона а кеми Цёрантень, сень арась Тетязояк; кона апак сёпо кеми Цёрантень, сень ули Тетязояк.24Истя, эрязо-аштезэ эйсэнк се, мезе тынь мариде ушодксстонть саезь. Бути тынк эйсэ свал эри-ашти се, мезе тынь мариде ушодксстонть саезь, сестэ тыньгак свал эрятадо-аштетядо Цёранть ды Тетянть марто сюлмавозь.25Ды те улияк Христосонь алтавт казнесь миненек – те пингеде пингень эрямось.

26Вана тень мон сёрмадынь тыненк сетнень кувалт, конат снартыть пурдавтомс тынк виде кистэнть.27Тынк эйсэ, ялатеке, свал эри-ашти те Оймеялтонь вийсэ вадемась, конань тыненк максызе Иневаньксэсь, ды секскак тыненк а эряви лия тонавтыця. Те самай вадемась тонавты тынк весементень. Сон пачти тыненк видечинть ды зярдояк а кенгели. Секскак тееде истя, кода Сон тынк тонавты: эрядо-аштеде свал Христосонь марто сюлмавозь.

Пазонь эйкакшт

28Ды ней, тиринь тякинеть, эрядо-аштеде свал Христосонь марто сюлмавозь. Ды сестэ, зярдо Сон сы, минь карматано аштеме Сонзэ икеле апак пеле, ды сестэ миненек а сави визькс марто туемс сельмензэ икельде Сонзэ самсто.29Тынь содасынк Сонзэ кода видечинь коряс теиця, – истя тынь чарькодьсынк сеньгак: эрьвась, кона эри видечинь коряс, чачозь Пазонть эйстэ.


предыдущая глава Глава 2 следующая глава