Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТВЕЕНЬ КОРЯС ЕВАНГЕЛИЯ

Глава 28

Иисус вельмесь!

1Оймсема чиде мейле, недлячистэнть ашолгадома шкане, састь калмонть варштамо Магдалань Мария ды омбоце Марияськак.2Ды апак учо теевсь модань покш сорнома: те истя Азоронть ангелэсь валгсь менельстэ. Сон сась калмонтень, сявордызе совамо таркастонть кевенть ды озась лангозонзо.3Сонзэ чачозо ёндолонь цитнемань кондямоль, оршамонзо ловонь кондят ашольть.4Ванстыцятне эйстэнзэ истя тандадсть, натой кармасть сорномо ды прасть теке кулость.5Ангелэсь мерсь аватненень: «Илядо пеле: мон содан — тынь вешнетядо крёст лангс вачкодезь Иисусонь.6Сон арась тесэ: Сон вельмесь, кода кортакшнось. Садо ванынк тарканть, косо Азорось ульнесь.7Азёдо седе курок ды ёвтадо тонавтницянстэнь: “Сон вельмесь ды тынденк икеле моли Галилеяв. Тосо тынь несынк Сонзэ”. Кирдеде мельсэнк, мезе мон ёвтынь тыненк».8Аватне капшазь лиссть калмостонть, тандадозь ды кенярдозь, чиезь ношкстасть Иисусонь тонавтницянстэнь ёвтамо.9Зярдо сынь мольсть Сонзэ тонавтницянстэнь ёвтамо, апак учо сынст вастынзе Сонсь Иисус ды мерсь: «Шумбрачи!» Сынь чийсть Тензэ, кутмордызь пильгензэ ды модас празь сюконясть Тензэ.10Сестэ Иисус мерсь тенст: «Илядо пеле! Азёдо ды ёвтадо Монь малавикс ялгатненень: кадык молить Галилеяв, тосо сынь Монь несамизь».

Ванстыцятнень ёвтамось

11Аватнень туемадо мейле калмонь ванстыцятнень эйстэ зярыятне совасть ошонтень ды ёвтнесть попонь покштнэнень весемеде, мезе ульнесь.12Сетне пурнавсть прявтнэнь марто вейсэ ды тейсть ладямо. Сынь макссть ванстыцятненень ламо ярмакт13ды мерсть: «šвтадо: “Веть, минек удома шкане, састь тонавтницянзо ды салызь уловонзо”.14Мариндеряй теде прявтось, минь сонзэ кортасынек, тынк чумонк арась, идетядызь».15Ванстыцятне саизь ярмактнень ды тейсть истя, кода тонавтозельть. Те ёвтнемась еврейтнень юткова истя келейстэ срадсь, натой течис эри.

Иисусонь кармавтоманзо тонавтницятненень

16Кевейкее тонавтницятне тусть Галилеяв, пандо пряс, ков Иисус мерсь тенст молеме.17Зярдо неизь Сонзэ, сюконясть Тензэ, ансяк конат-конат эйстэст кавтолдсть.18Иисус мольсь малазост ды кармась кортамо тенст: «Монень максозь весе азорксчись менель лангсояк, масторлангсояк.19Секскак, азёдо ды тееде весе раськетнестэ Монень тонавтницят, нававтодо эйсэст Тетянть, Цёранть ды Иневанькс Оймеялтонть лемсэ20ды тонавтынк сынст кирдеме весементь, мезе Мон тенк кармавтынь. Ды содадо: Мон улян тынк марто свал, пингенть прядовомс». Аминь.


предыдущая глава Глава 28 следующая глава