Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 8

Вирезэсь панжи сисемеце пекстамо тешксэнть

1Зярдо Вирезэсь панжизе сисемеце пекстамо тешксэнть, менельсэнть весемесь каштмольсь. Истямо каштмолемась таргавсь пельчасошкань перть.2Теде мейле мон неинь Пазонть икеле стядо аштиця сисем ине ангелт. Эрьвантень макссть торамо.

3Сась лия ангел, кона кедьсэнзэ кирдсь сырнень сувтамо кедьге, ды стясь алтаренть ваксс. Ангелэнтень макссть ламо сувтамопель путомс Пазонь весе ломантнень озномаст марто сырнень алтаренть лангс, кона инязоронь озамо тарканть икелель.4Истя Пазонь ломантнень озномаст марто ангелэнть кедьстэ кепедевсь Пазонть икелев тантейстэ качадыця ладанонь качамо.5Ангелэсь саизе сувтамо кедьгенть, пештизе сонзэ алтаренть лангсто саезь толсо ды ёртызе мода лангс. Сестэ марявсть пурьгинень зэрть, сееремат, неявсть ёндолонь кивчкаемат ды кепедевсь модань сорнома.

Кото торамонь зэрть

6Сисем ангелтнэ, конат кирдсть сисем торамотнень, анокстасть эйсэст зэрнеме.

7Зэрнезевсь васенце ангелэнть торамось. Верде ёртозельть цярахман ды тол, верь марто човор, конат прасть моданть лангс. Ды палсь моданть колмотькс пельксэзэ, палсть чувтнэнь колмотькс пельксэст, ды палсь те таркастонть весе пиже тикшесь.

8Зэрнезевсь омбоце ангелэнть торамось, ды теке покштояк покш пандошка тол ёртозель иневедьс. Иневеденть колмотькс пельксэзэ теевсь верекс,9кулось иневедень эрицятнень колмотькс пельксэст ды каладсть иневедень венчтнень колмотькс пельксэст.

10Зэрнезевсь колмоце ангелэнть торамось. Менельстэ прась толонь пусмокс палыця покштояк покш теште. Сон прась весе лейтнень ды лисьмапрятнень колмотькс пельксэст лангс.11Те тештенть лемезэ Нартемкс. Ды весе ведтнень колмотькс пельксэст теевсть сэпейкс, прок нартемкс, ды ламо ломанть кулость те ведтенть, эдь те сэпей ведесь теевсь куловтыцякс.

12Зэрнезевсь нилеце ангелэнть торамось, ды колазель чипаенть колмотькс пельксэзэ, ковонть колмотькс пельксэзэ, тештнень колмотькс пельксэст. Сынст колмотькс пельксэст чополгадсть, чинть ды венть колмотькс пельксэст теевсть валдовтомокс.

13Мон неия ды мария, кода менель ёжова ливтиця лия ангелэсь сеересь виев вайгельсэ: «Зыян! Зыян! Зыян мода лангонь эрицятненень кадовикс торамотнень эйстэ, конатнесэ курок зэрнезевить колмо кадовикс ангелтнэ!»


предыдущая глава Глава 8 следующая глава