Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 6

Иисусонь тонавтницятне сезнить сюропрят оймсема чистэ

1Васенце оймсема чистэ Инечинь омбоце чиденть мейле савсь Иисуснэнь ютамс тонавтницянзо марто сюро паксява. Сонзэ тонавтницятне кармасть сезнеме сюропрят, мерькамо сынст коморсост ды ярсамо сюродонть.2Кой-конат фарисейтнеде кевкстизь сынст: «Кода истя тынь оймсема чистэ тейтядо сень, мезе а мереви теемс те чистэнть?!»3Иисус мерсь сынст каршо: «Тынь, нать, эзиде ловно седе, мезе тейсь Давид инязорось, зярдо сон ды сонзэ мартонзотнеяк вачомкшность?4Сон совась Пазонь кудос, саинзе Пазонть икелев путозь кшитнень ды ярсась, куш неть кшитнеде, попто башка, киненьгак а меревиль ярсамс. Давид макссь те кшиденть сетнененьгак, конат ульнесть сонзэ марто».5Мейле Иисус поладсь: «Ломантнень Цёрась оймсема чинть лангсояк азоро!»


Коське кедь ломань

6Лия оймсема чистэ Иисус сась синагогав ды тонавтсь. Тосо ульнесь цёра, конань вить кедезэ коськезель.7Койс тонавтыцятне ды фарисейтне вешнесть тувтал Иисусонь чумондомс. Секскак сынь пштистэ вансть Иисус мельга: шумбралгавты-арась Сон оймсема чистэ?8Иисус, сынст арсематнень содазь, мерсь коське кедь ломанентень: «Стяк ды листь куншкав». Тонась стясь ды лиссь куншкав.9Сестэ Иисус мерсь мельганзо ваныцятненень: «Мон кевкстнян тынк, мезе мереви теемс оймсема чистэ? Паро эли берянь? Идемс ломанень эрямонть эли ёмавтомс? Сынь жо чатьмонсть».10Сон варштась пертьпельга весень лангс ды мерсь коське кедентень: «Венстик кедеть». Се венстизе, ды кедезэ теевсь шумбракс, омбоценть кондямокс.11Тень неезь, Койс тонавтыцятне ды фарисейтне азаргадсть ды кармасть эсь ютковаст кортнеме-арсеме, кодамо зыян теемс Иисуснэнь.


Кемгавтово апостолт

12Неть читнестэ Иисус мольсь пандо лангс озномо ды ютавтызе тосо весе венть, Пазнэнь ознозь.13Чинь лисема шкасто Сон тердинзе Эсензэ тонавтницятнень, кочкась юткстост кемгавтово ды путынзе апостолокс.14Вана сынст лемест: Симон, конанень Иисус путсь лем – Петра; Андрей, Симононь ялаксозо; Яков, Иоанн, Филип, Бартоломей,15Матвей, Фома, Алфеень Яков, Симон, конанень мерильть Зилот,16Яковонь Иуда ды Искариотонь Иуда, кона мейле миизе Иисусонь.


Иисус шумбралгавты ды тонавты ломанть

17Иисус валгсь апостолтнэнь марто пандонть прясто ды лоткась валаня таркас. Тосо пурнавозельть ламо Сонзэ тонавтницянзо ды ламо лия ломанть весе Иудеястонть, Ерусалимстэ ды иневедь чирень Тирэнь ды Сидононь оштнэстэ.18Сынь састь Иисусонь кунсоломо ды эсь ормадост шумбралгадомо. Иисус шумбралгавтынзе сетненьгак, конат майсесть аванькс оймеялтнэде.19Эрьвась перьканзо аштицятнеде бажась токамс Иисусонь, секс мекс Сонзэ эйстэ мольсь вий, конась шумбралгавтсь весень.20Иисус варштась тонавтницятнень лангс ды кармась кортамо:
«Уцяскавтадо тынь, конатне чарькодить эсь кажовчист Пазонть икеле,
эдь тынк ули Пазонь Инязорксчинк.
21Уцяскавтадо тынь, течинь вачотне:
Пазось тынк андтадызь.
Уцяскавтадо тынь, течинь авардицятне:
тынь карматадо кенярдозь пейдеме.

22Уцяскавтадо тынь, зярдо Ломантнень Цёранть кувалма тынк лангс кирдить кеж, зярдо тынк панить ломантне эсест ютксто ды покордыть, зярдо тынк лементькак нулгодстить.23Се чистэнть кецядо ды мик верев кирнявтнеде кенярдомадонть: менель лангсо тыненк те ули сюпавдояк сюпавсто пандозь! Кода ней теить тынк марто неть ломантне, истя сынст покштятнеяк тейнесть пазмарицятнень марто.24
Тыненк жо, сюпавтненень, карми улеме покш зыян,
эдь тыненк уш педе пес максозель эсь уцясканк.
25Покш зыян сы тыненк, неень шкань пешксечисэ
эрицятненень:
тынь карматадо эрямо вачочисэ.
Покш зыян тыненк, ней пейдицятненень:
тынь карматадо ризнэме ды авардеме!

26Покш зыян карми улеме тыненк, зярдо весе тынк шныть! Истя жо сынст покштятнеяк шнасть кенгелиця пазмарицятнень».


Вечкеде эсенк душмантнэнь

27«Тыненк жо, кить Монь кунсолыть, кортан: вечкеде эсенк душмантнэнь, тееде паро сетненень, конат тынк лангс кирдить кеж.28Чанстядо сетнень, конат сюдыть эйсэнк, ды ознодо сетнень кисэ, конат тынк покордыть.29Бути кие риштятанзат чамаумарь ланга, – аравтык омбоцентькак. Ланга оршамопелень нельгицянтень максык алга панароткак.30Эрьвантень, кие тонь кедьстэ веши, макст. Ды бути кие сайсы мезентькак тонь кедьстэ, иля веше мекев.31Тееде ломантнень туртов ансяк сень, мезе тынк меленк коряс, эряви теемс тенст эсенк туртов.32Бути тынь вечксынк ансяк сетнень, конат вечктядызь тынк, сестэ мейсэ тынк питнейчись?! Эдь пежетев ломантнеяк вечкить эсест вечкицятнень.33Бути тейтядо паро ансяк тыненк паронь теицятненень, сестэ мейсэ тынк питнейчись?! Пежетев ломантнеяк истя тейнить.34Бути тынь макснетядо мезе-бути долкс ансяк сетненень, конатнень пельде учотадо мекев пандома, сестэ мейсэ тынк питнейчись?! Эдь пежетевтнеяк макснить долкс вейкест-вейкест туртов, зярдо содыть: мекев пандсызь максозенть питнензэ.35Тынь тееде мекевланк: вечкеде эсенк душмантнэнь, тееде паро, макснеде долкс сень, мезе вешить, ды илядо учо мекев пандома. Сестэ тыненк ули сюпавдояк сюпавсто пандозь ды тынь алкукс ультядо эйдекс Верепазонтень, конась чевте седей паронь стувтыцятнень туртовгак ды зыянонь теицятнень туртовгак.36Уледе истямо седеймарицякс, кодамо седеймариця тынк Тетясь».


Илядо судя лиятнень

37«Илядо судя лиятнень – ды тынккак Пазось а судятадызь. Илядо чумондо киньгак – ды тынккак Сон а чумондтадызь. Олякстомтодо чумосто – ды Сонгак тынк чумосто олякстомтадызь.38Максодо – ды тыненккак максови Пазонь пельде пешксе онкссо: эцезь, матразь ды пряс пештязь онкссо Сон каи тынк панар элезэнк. Кодамо онкссо онкстатадо, истямосо тыненккак онкстазь ули».39Иисус ёвтнесь сыненст истямо валвелявкс: «Арази ветяви сокоронтень сокорось? Кавонест, нать, а прыть латкс?40Тонавтницясь а эрси тонавтыцядонзо седе покш. Ансяк тонавтнеманть прядозь, сон ули тонавтыцянзо кондямокс.41Кода тон сардыненть несак малавиксэть сельместэ, бути эсеть сельместэ чочконть а редясак?42Эли, кода мерят эсеть малавиксэть туртов: “Седейбельксэм, эрьга таргаса сельместэть сардыненть”, бути а редясак чочконть эсеть сельместэ? Чачонь полавтниця! Таргик васняяк эсеть сельместэ чочконть, ды сестэ несак, кода таргамс малавиксэть сельместэ сардыненть».


Чувто ды умарть

43«А эрси паро чувто, кона максоволь берянь умарть, ды а эрси берянь чувто, кона максоволь паро умарть.44Эрьва чувтось содави умарензэ кувалт. Эдь кодоркс куракшсто а кочксить инжирт ды пурьгине палакссто а сезнекшнить винаумарть.45Вадря ломанесь эсензэ седей потмонь сюпавчистэнть ливтни паро; берянь ломанесь эсензэ седей потсто ливтни апаро. Мезде ломаненть пештязь седеезэ, се лисни сонзэ кургстояк».


Кудонь кавто путыцят

46«Мекс тынь мертядо монень: “Азоро! Азоро!” – ды ялатеке а тейтядо сень, мезес Мон кармавтан эйсэнк?47Ёвтаса тенк, кинь ёнов моли эрьвась, кона сакшны Монень, кунсолы Монь валон ды топавты эйсэст.48Сон моли кудонь путыця ёнов, кона кудонь теемстэ чувсь домка латко ды путызе кудонзо кевень юронть лангс. Секскак, зярдо сыргась чудиведесь ды эшкевсь те кудонтень, сон эзь сявордово: кудось путозель кев лангс.49Кона жо кунсолы Монь валтнэнь ды ялатеке а топавты эйсэст, моли истямо ломань ёнов, кона путызе кудонзо юртомо, видьстэ мода лангс. Ды зярдо чудиведесь эшкевсь те кудонтень, сон сеске допрок каладсь».



предыдущая глава Глава 6 следующая глава