Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 21

Довань максовкс

1Иисус вансь ярмаконь кирдемканть ёнов ды несь, кода сюпавтне кайсесть тов эсест казнест.2Сон несь кажов дова авинеяк, кона каясь пижень кавто ярмаккеть.3«Видестэ кортан тенк, – мерсь Иисус, – те кажов довась каясь сехте ламо весе каицятнеде.4Эдь весе сынь каясть Пазонтень ламочидест, довась вана каясь арасьчидензэ ды максызе весементь, мейсэ тензэ эрямаль».


Пазонь кудонть каладомась

5Перька аштиця ломантне кортазевсть Пазонь кудодонть: кодамо мазый кевстэ сон теезь ды кодат питней казнеть сонзэ мазылгавтыть. Тень кувалт Иисус мерсь:6«Сы истямо шка, зярдо весеместэнть, мезе тесэ тынь ней нетядо, а кадови кев лангс кевгак, весе ули калавтозь».


Васень тешкст

7Иисусонь тонавтницянзо кевкстнесть: «Тонавтыця, ёвтак тенек, зярдо те тееви? Ды кодамо тешксэнь коряс содави весе тень топавтомась?»8Сон тень каршо мерсь: «Ванодо, кияк аволидизь маня, эдь ламот сыть кекшезь Монь лементь ало ды кармить пряст ёвтамо: “Те Мон” эли “Шкась сась”. Илядо моле сынст мельга!9Зярдо марятадо кулят войнадо ды ломантнень кепедевемадо, илядо тандале. Тенень эряви улемс васняяк, ансяк те – зярс аволь песь».10Мейле Иисус поладынзе валонзо: «Раське кепедеви раськень каршо, мастор – масторонь каршо.11Таркань-таркань улить модань покш сорномат, сыть вачо иеть ды куломань ормат, менельсэнть кармить неявомо а чарькодевикс ды тандавтыця ине тешкст.12Неть зыянтнэнь самодост икеле тынк каршо кепедьсызь кедест ды кармить пансеменк. Тынк ветятадызь судямс синагогав ды ёрттадызь пекстамо кудос, стявттадызь инязортнэнь ды лия ветицятнень икелев Монь лементь кисэ.13Сестэ тынк туртов сы шка кортамс Мондень.14Кеместэ мельсэ кирдеде: икелепелев илядо арсе, кодамо валсо идемс эсь прянть.15Мон максан тыненк истят валт ды превть, конатнень каршо а кортазеви ды а цидярды вейкеяк тынк каршо молицятнеде.16Натой тетянк-аванк, лелянк-ялаксонк, роднянк-раськенк ды ялганк-оянк тынк макстадызь судямс прявтнэнень. Ды конань-конань тынк эйстэ маштсызь.17Монь лементь кисэ весеменень ультядо авечкевиксэкс.18Ансяк тынк прясто черьгак а пры.19Цидярдодо – ды идесынк эсенк ойменк пингеде пингень эрямос».


Ерусалимень калавтомась

20«Зярдо нетядо Ерусалименть перька ушмот, сестэ содадо: малавгадсь сонзэ калавтомань шкась.21Сестэ сеть, конат Иудеясо, оргодест пандо лангов, кие Ерусалимсэ, – оргодезэ тосто; кие ош маласо велетнесэ – ошов илязо сова.22Эдь састь кежень пандома читне ды топавтови весемесь, мезде ёвтазель Пазонь Сёрмадовкстнэсэ.23Кодамо стака ули сеть читнестэ пешксесэтненень ды потесэ эйкакшонь потицятненень! Эдь те масторонть учи виев майсема, неть Израилень ломантнень лангс валги Пазонь кежесь!24Веенст ломантне кулыть тородо, омбонстнэнь паньсызь полонс эрьва кодамо лия масторга. Ерусалимесь карми улеме чалгсезь лия раськетнесэ сеть шкатнес, зярс а прядови сынст шкаст».


Ломантнень Цёранть самось

25«Тандавтыця тешкст кармить неявомо тештнень, чинть ды ковонть лангсо. Мода лангсо раськетне кармить майсеме ды сорномо азарсь иневедень зэрнемадонть.26Ломантне теевить пельскулозекс мода лангс сыця зыянтнэде ды сынст эйстэ тандадомадонть. Эдь менелень вийтнеяк теить сорк.27Сестэ несызь, кода Ломантнень Цёрась сы пель лангсо эсь покш вийсэнзэ ды иневалдосонзо.28Зярдо те весе карми топавтовомо, тынь виемтинк рунгонк ды кепединк прянк – идеманк маласо!»

29Ды ёвтнесь Иисус сыненст истямо валвелявкс: «Варштадо инжир чувтонть лангс ды весе лия чувтнэнь лангс.30Зярдо сынь кармить пургондамо, тынь тынсь, тень неезь, чарькодтядо: кизэсь маласо.31Истя тесэяк: зярдо тынь несынк тень топавтоманть, сестэ чарькодтядо – Пазонь Инязорксчись маласо.32Видестэ кортан тенк: неень пингень ломантне ёмамо а кенерить, кода весе те топавтови.33Менелесь ды масторось ёмить, ансяк Монь валон а ёмить».


Уледе анокт!

34«Ванодо эсь мельганк: илядо сокоргавто эсь седеенк прясто пильгс совазь тантей ярсамос, иредемас ды эрьва чинь мелявксос. Сестэ те чись а сы тенк апак учо,35прок калонь кундамонь алтыма. Се чись стардсынзе весе мода лангсо эрицятнень.36Уледе свал анокт ды ознодо, кадык саты виенк шумбрасто ютамс весе неть сыця зыянтнэнь пачк ды арамс Ломантнень Цёранть сельмензэ икелев».

37Чить Иисус тонавтыль Пазонь кудосо, чокшне тукшныль ошсто Ойумарькс пандонть лангс ды ютавтыль тосо венть.38Ламо ломантне валске ланга сакшность Пазонь кудонтень Сонзэ кунсоломо.



предыдущая глава Глава 21 следующая глава