Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛТНЭНЬ ТЕВЕСТ

Глава 25

Павол веши кесарень суд

1Фест, прявтокс арамодонзо мейле колмо чинь ютазь, сыргась Кесариясто Ерусалимев.2Ерусалимсэ сонензэ састь попонь покш, евреень весемеде содавикс прявтт, ды ёвтызь тензэ чумондома валост Паволонь каршо.3Фестэнь икеле сынь пек энялдсть эсь мелест топавтомань туртов ускомс Паволонь Ерусалимев. Сынь арсесть Паволонь маштомс ки лангсо ютамстонзо.4Фест мерсь: «Павол пекстамо кудосо Кесариясо, монськак курок молян тов.5Кадык тынк эйстэ сетне, кить молевить, молить монь марто ды тосо ёвтасызь эсест чумондомаст, бути те ломанесь тейсь мезеяк берянь».

6Ерусалимсэ Фест ульнесь ансяк кеменьшка чить ды велявтсь Кесарияв. Омбоце чистэ сон озась судямо эзементь лангс ды кармавтсь эсензэ икелев ветямс Паволонь.7Паволонь ветизь. Еврейтне, конат састь Ерусалимстэ, арасть перьканзо ды кармасть чумондомонзо эрьва кодамо зыянов тевсэ, ансяк сыненст мейсэяк эзть кемекставт чумондоматне.8Эсь прянзо идемга, Павол мерсь: «Мон эзинь тее кодамояк зыян евреень Коенть каршояк, Пазонь кудонть каршояк, Римень кесаренть каршояк».9Фест еврейтненень савтомань кисэ Паволонь кевкстизе: «Ули-арась мелеть молемс Ерусалимев судонь кирдеме? Тосо тонь тевенть ветявлия монсь».10Павол мерсь: «Мон уш аштян кесарень судонть икеле, тесэ монь судямскак. Мон эзинь тее кодамояк зыян еврейтненень, тень тон парсте содасак.11Бути чуман, бути теинь мезеяк истямо, мезень кисэ монь эряви куловтомс, сестэ куловтомизь, мон каршо а молян. Ансяк бути евреень чумондоматне аволь видеть, сестэ киньгак арась виезэ максомс монь сынст кедьс. Мон вешан кесарень суд!»12Превспутыцянзо марто кортамодо мейле Фест мерсь: «Тон вешат кесарень суд, кесарентень кучтадызьгак».

Павол Агриппа инязоронть икеле

13Зярыя чинь ютазь, Кесарияв Фестэнь содавтомо сась Агриппа инязорось Вереника марто.14Сынь Фестэнь кедьсэ эрясть аволь вейке чи, ды лиссь кортамо Паволонь тевензэ коряскак. «Тесэ ули ломань, кона пекстамо кудос озавтозель уш Феликсэнь пингестэ», – ёвтнесь Фест Агриппанень.15«Зярдо мон Ерусалимсэлинь, евреень попонь покштнэ ды прявтнэ ливтсть каршонзо чумондома ды вешсть судямонзо.16Мон меринь тенст: римень коень-кирдань коряс ломаненть а судякшныть куломас, зярс сон а вастови чумондыцянзо марто ды а максови тензэ олячи идемс эсь прянзо чумондоманть эйстэ.17Зярдо сынь састь тей монь марто, мон, шкань апак таргсе, омбоце чистэнть озынь судямо тарказон ды ветявтия те ломаненть.18Зярдо чумондыцянзо стясть ды кармасть кортамо, сынь эзизь чумондо сонзэ вейкеяк истямо зыянсо, мезде мон арсекшнинь марямс.19Сынь ансяк пелькстасть-спорясть сонзэ марто эсест кемемаст коряс ды та-кодамо кулозь Иисусонь коряс, кона, Паволонь валонзо кувалт, ялатеке эри.20Мон эзинь сода, кодамо мельс прамс истямо тевсэ, ды кевкстия, ули-арась Паволонь мелезэ молемс Ерусалимев кирдемс судонть тосо.21Ансяк Павол вешсь кесарень суд ды энялдсь кадомс эсь прянзо теске ванстыця марто. Секскак мон кармавтынь кирдемс сонзэ пекстамо кудосонть кесарентень кучомазонзо».22Агриппа мерсь Фестнэнь: «Мелем ули эстень кунсоломс те ломаненть». «Ванды марясак», – мерсь Фест.

23Омбоце чистэнть Агриппа ды Вереника, весе каштанчисэст ды цивтёрдыця мазычисэст, совасть судямо кудос. Мартост ульнесть тёжань прявтнэ ды ошонь сехте содавикс ломантне. Фестэнь кармавтоманзо коряс совавтызь Паволонь.24Фест мерсь: «Агриппа инязор ды весе тесэтне! Икеленк ашти се, конань кисэ монь лангс пек лепштясть весе еврейтне Ерусалимсэ ды тесэ, Кесариясояк. Сынь пижнезь вешить пельдень маштовтомс сонзэ.25Мон жо а мукшнан эйстэнзэ кодамояк чумо, конань кисэ сонзэ эряви маштомс. Ды вана саинь мель кучомс сонзэ Римев, сон вешсь кесарень суд.26Ансяк монь арась мезеяк чумонзо невтемга, мезенть сёрмадомаль кесарентень. Секс мон ливтия сонзэ тынк икелев ды васняяк тонеть, Агриппа инязор. Сестэ, зярдо тон кевкстнесак сонзэ, монгак карман содамо, мезе сёрмадомс кесарентень.27Мон лован: ули авидекс кучомс пекстазенть Римев, чумонзо апак невте».


предыдущая глава Глава 25 следующая глава