Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 18

Вавилонось лондадсь!

1Мейле мон неия, кода менельстэ валги лия ангел. Сонзэ ульнесь покш азорксчизэ, ды модась валдомгадсь сонзэ иневалдонь сияждомасонть.2Сон серьгедсь виев вайгельсэ:
«Лондадсь, лондадсь Вавилонось, оштнэнь ютксто ине ошось!
Сон теевсь эрямо таркакс идемевстненень
ды эрьва кодамо аванькс оймеялтнэнень,
пизэкс эрьва кодамо аванькс ды нулгодькс нармунтненень.
3Эсензэ ускурямосонзо сон симдинзе
Пазонь инекежень винадонть весе раськетнень.
Масторлангонь инязортнэ ускурясть сонзэ марто,
ды мода лангонь микшницятне-рамсицятне
ламолгавтсть эсест сюпавчист сонзэ апештявиця бажамотнень кувалт».

4Ды мон маринь менельстэ лия вайгель. Сон кортась:
«Монь раськем, кадык Вавилононть!
Иля вадневе сонзэ пежетнесэ.
Сестэ сонзэ лангс кучозь чумонь пандоматне а прыть тонь лангс.
5Эдь сонзэ пежетнень пандось эль токи менельс,
ды Пазонть мельс ледсть весе сонзэ зыянов тевензэ.
6Тейнеде те авантень истямо зыян,
кодамо сон тейнесь лиятненень,
ды пандодо тензэ кавксть седе ламо весе сонзэ тевтнень кисэ.
Секе кечентень, конасонть сон анокстакшнось симемапель лиятнень туртов,
каядо эстензэ кавксть седе виев вина!
7Зяро сон каштангалесь ды эрясь певтеме сюпав эрямосо,
зняро жо максодо тензэ пиштемат ды ризнэмат!
Эдь сон эсь пачканзо корты:
“Мон аштян инязоронь озамо таркасо теке инязорава!
Мон аволь дова, ды ризксэсь зярдояк а пры монь лангс!”
8Вана мекс апак учо ве чистэ прыть лангозонзо весе апаротне:
куломань ормась, малавиксэнь куломась ды вачочись.
Ды сонзэ пултасызь толсо, эдь Азоро Пазось,
кона сонзэ судизе, виевдеяк виев».

9Ды весе масторлангонь инязортнэ, конат певтеме сюпав эрямосо эрясть сонзэ марто ускурязь, кармить авардеме ды лайшеме сонзэ кисэ, зярдо несызь качамонть толбандястонть, косо сонзэ пултыть.10Ве пеле аштезь ды тандадозь сонзэ пиштематнеде, сынь кармить кортамо:
«Вай! Вай! кодамо покш зыянось тонеть,
Вавилон, ине ды виев ош!
Апак учо, сельгень прамс,
стардынзеть чумонь пандомась!»

11Ды масторлангонь микшницятнеяк-рамсицятнеяк авардить ды лайшить сонзэ кисэ, эдь ней кияк а рамси сынст микшнемапелест, конатнень ютксо12сырне, сия, питней кевнеть, ведьэрьгинеть, човине лияназонь ды парсеень коцт, чопода якстере ды валдо якстере коцт, тантейстэ качадыця чувтт; слононь ловажасто, питней чувтосто, бронзасто, кшнистэ ды мраморсто теезь эрьва кодат теевкст;13корица, лият тантей чинень нолдыцят, ладан* ды мира ды фимиам, вина, ойумарень ой, почт ды товзюро; скалт, реветь, лишметь, крандазт, уреть ды ломанень ойметь.

14Микшницятне-рамсицятне лажныть:
«Вай! ёмась весе ули-парось,
конанень пек бажась тонь оймесь!
Весе тонь сюпавчись ды сияждомась кадыдизь тонь,
ды сынст зярдояк а велявтсыть!»

15Микшницятне-рамсицятне, конат микшнесть те весементь ды сюпалгадсть Вавилон ошонть кувалт, кармить аштеме ве пеле, сонзэ пиштематнеде тандадозь, ды авардемань ды лайшемань пачк кармить кортамо:16
«Вай! кодамо покш зыянось тонеть, ине ош!
Тон ульнить оршазь човине лияназонь,
чопода якстере ды валдо якстере коцтсо,
мазылгавтозь цивтёрдыця сырнесэ,
питней кевнесэ ды ведьэрьгинесэ!
17Ды весе те тонь сюпавчись апак учо, сельгень прамс, ёмась-арась!»

Иневенчень весе ветицятне ды иневедьга уицятне, иневенчсэ весе важодицятне ды иневедьлангонь микшницятне аштесть ве пеле.18Зярдо неизь сонзэ палома качамонть, сынь мезе вий сеересть: «Зярдояк арасель истямо ош, кона араволь сэрцек те ине ошонть ваксс!»19Ризксэнь невтемга сынь почолесть пряст пульсэ, авардемань ды лайшемань пачк сеересть:
«Вай! Вай! кодамо покш зыянось тонеть, ине ош!
Весе, кинь улить иневедьсэ иневенчест,
сюпалгадсть сонзэ сюпавчинть кувалт.
Ды вана апак учо, сельгень прамс, сон теевсь чаво таркакс!»
20«А вана тон, менель,
кенярдт сонзэ лондадоманть кувалт!
Кенярдодо, Пазонь весе ломантне,
апостолтнэ ды пазмарицятне!
Эдь весе те беряненть кисэ,
конань тейнизе тынк туртов те ошось,
истя жо судизе Пазось!»

21Мейле пек виев ангелэсь кепедсь ведьгевень покш яжамо кевень покшолмасо кев, ёртызе сонзэ иневедьс ды мерсь:
«Истямо вийсэ Пазось вырновттанзат, Вавилон, ине ош!
Ды тон зярдояк уш а кармат улеме!
22А кармить уш гайгеме тонь эйсэ седямонь ды морамонь вайгельть,
кияк уш а марясынзе арфань, нудеень ды торамонь вайгельтнень.
А кармить улеме эйсэть пенчень-ваканонь,
чакшонь-пачалгонь теицяткак.
Ведьгевень яжамо кевень увтонтькак кияк уш а марясы.
23Лампа валдонтькак тоньсэть кияк уш а несы;
урьвакстыця ды венчиця од ломантнень вайгелест
кияк уш а марясынзе.
Тонь микшницятне-рамсицятне ульнесть масторлангонь чирязокс,
ды эсеть мунямот-орожиямот вельде
тон манчить весе масторлангонь раськетнень!»

24Истя Пазось пандызе Вавилононтень чумонзо: сонзэ кедензэ ваднезь куловтозь пазмарицятнень ды Пазонь ломантнень верьсэ. Сон чумо масторлангонь весе куломатнесэ!


предыдущая глава Глава 18 следующая глава