Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 05

Иисус пурны Эсензэ перька васень тонавтницят

1Весть Иисус аштесь Геннисарет эрьке чиресэ. Пазонь валонть марямонзо кисэ ломантне эцесть малазонзо.2Иисус несь ведь чирестэ кавто венчт. Калонь кундыцятне лиссть венчстэ ды ёрвалесть алтымаст.3Иисус совась вейке венчентень, конась ульнесь Симононь, ды мерсь сонензэ аламодо уемс эрьке чирестэнть. Теде мейле Иисус, венчсэнть озадо аштезь, кармась тосто ломантнень тонавтомо.4Зярдо Иисус прядызе тонавтоманзо, мерсь Симоннэнь: «Уйть седе домка таркав ды каинк алтыманк калонь кундамга».5Симон каршонзо мерсь: «Тонавтыця, минь вень перть важодинек, ансяк мезеяк эзинек кунда. Ялатеке мон таго нолдасынь алтыматнень, Тон меремат кунсолозь».6Сынь истя тейстькак ды кундасть зняро калт, мик алтыматне кармасть сезневеме.7Сынь, кедьсэ аволязь, тердизь лездамо лия венчстэ ялгатнень. Сетне уйсть ваксозост ды пряс пештизь калсо кавонест венчтнень. Венчтне мик кармасть ваямо.8Тень неезь, Симон-Петра прась Иисусонь икелев кумажа лангс ды энялдозевсь: «Кадомак, Азором, эдь мон пежетеван!»9Истя ламо кундазь калтнэде Симон ды сонзэ лия ялганзо абунгадсть ды тандадсть.10Истя жо тандадсть Яков ды Иоанн, Зеведеень цёранзо, конат кундсесть калт Симон марто вейсэ. Иисус мерсь Симоннэнь: «Иля пеле, те чистэнть саезь тон кармат улеме Монень ломанень ветицякс, аволь калонь кундсицякс».11Сынь таргизь венчтнень эрьке чирентень, кадызь весементь ды тусть Иисус мельга.


Проказа ормасо сэредицянть ванськавтомась

12Иисус кодамо-бути ошсо вастсь ломань, кона прясто пильгс вельтязель проказа ормасо. Зярдо сон неизе Иисусонь, пульзясь икелензэ, сюконясь модас ды кармась энялдомо: «Азоро, улиндеряй мелеть, мон Тонеть ванськавтован!»13Иисус венстизе кедензэ, токизе сонзэ ды мерсь: «Ули мелем. Ванськадт!» Ормась нейке жо кадызе сэредицянть.14Иисус кармавтсь тензэ: «Вант, киненьгак теде иля ёвтне. Азё попнэнь ды ванкшновтык прят. Теде мейле ванськадомат кисэ кандт Пазонтень казне. Истя эряви теемс Моисеень Коень коряс. Теньсэ тон невтьсак ломантненень эсь шумбралгадомат».15Седеяк келейстэ сралесь Иисусто кулясь. Ламодояк ламо ломанть пурнавкшность Сонзэ перька – Сонзэ кунсоломо ды шумбралгалеме эсест орматнеде.16Иисус жо сеедьстэ тукшнось чаво таркав ды тосо ознокшнось.


Капернаум ошсо катардыцянь шумбралгавтомась

17Весть, зярдо Иисус тонавтсь, пуромозтнень ютксо Сонзэ кунсолость фарисейтькак ды Койс тонавтыцяткак, конат састь Галилеянь ды Иудеянь весе велетнестэ ды Ерусалимстэяк. Азоронь виесь ульнесь Иисусонь эйсэ, секскак Сон шумбралгавтсь сэредицятнень.18Зярыя цёрат ацамо лангсо кандсть Сонензэ мадезь ломань, кона сэредсь катар ормасо. Совавтыксэлизь сэредицянть кудос ды путыксэлизь Иисусонь икелев.19Ансяк кудосонть ульнесть пек ламо ломанть, секскак кандыцятне тов эзть соваво. Сынь кузсть кудонть лангс, калавтызь черепицянь вельтявксонть ды варяванть нолдызь сэредицянть ацамонек-мезнек ломантнень юткс, Иисусонь икелев.20Зярдо Иисус неизе сынст кемемаст, Сон мерсь сэредицянтень: «Оям, нолдазь тонь пежететь».21Фарисейтне ды Койс тонавтыцятне арсезевсть: «Кие те истямось? Мекс Сон истя Пазонть нарьги-покорды? Кинень, Паздонть башка, нолдавить пежетне?»22Иисус, сынст мельтнень содазь, кевкстинзе: «Мезекс тынь кирдтядо седейсэнк истят арсематнень?23Мезесь седе шождыне меремс: “Нолдазь тонь пежететь”, эли “Стяк ды якак”?24Истя тынь содадо, масторлангсо Ломантнень Цёранть ули азорксчизэ пежетень нолдамскак». Теде мейле пшкадсь катардыцянтень: «Кортан теть: стяк, саить ацамот ды азё кудов!»25Весень сельме икеле сэредицясь сеске стясь, саинзе ацамонзо ды тусь кудов, Пазонть шназь.26Покш абунгадома саинзе весень, сынь шнасть Пазонть ды тандадомань пачк кортасть: «Течи минь неинек акемевикс тевть!»


Иисус тердизе Левинь

27Теде мейле Иисус тусь ды неизе каявксонь пурныцянть Левинь. Сон озадоль каявксонь пурнамо кудонть вакссо. Иисус мерсь тензэ: «Мольть Монь мельга!»28Леви стясь, весементь кадызе ды тусь мельганзо.29Мейле Леви эсензэ кудосо анокстась Иисусонь туртов покш каванямо. Тосо ульнесть каявксонь ламо пурныцят ды лия инжетькак. Сынь весе вейсэ ярсасть-симсть.30Койс тонавтыцятне ды фарисейтне кежиявтозь кортасть Иисусонь тонавтницянстэнь: «Кода истя тынь каявксонь пурныця марто ды лия пежетев ломань марто вейсэ ярстадо-симтядо?!»31Иисус мерсь каршост: «Ормаменстиця эряви сэредицянень, аволь шумбра ломаннень.32Мон сынь тердеме велявтомс Пазонтень пежетевтнень, аволь видечисэтнень».


Постонь кирдемадо кевкстема

33Иисусонь кевкстизь: «Мекс Иоаннонь ды фарисейтнень тонавтницяст сеедьстэ постовить ды озныть, Тонсетне жо ансяк ярсыть ды симить?!»34Иисус мерсь тень каршо: «Арази кармавтовить постонь кирдеме свадьбань инжетне, зярс урьвакстыцясь мартост?35Сы шка, зярдо урьвакстыцясь ули саезь юткстост, сестэ, сеть читнестэ, сыньгак кармить постовамо».36Ды Иисус ёвтнесь сыненст валвелявкс: «Кияк ташто оршамос а панды коцтонь панкс, кона сезезь од оршамосто. Бути истя теят, сестэ колави од оршамоськак ды од коцтонь панксось а лади таштонтеньгак.37Од винаяк кияк а кайси ташто кедень кескавс. Бути истя теят, сестэ винась сезнесынзе кедень кескавтнень ды чуди масторов, кескавтнеяк ёмить.38Секскак од винанть эряви каямс од кедень кескавтнес. Сестэ ванстови теяк, тонаяк.39Ды киньгак, кона симнесь ташто винадо, а ули мелезэ симемс одто. Сон корты: “Таштось седе вадря”».



*а 5:2 алтыма – калонь кундамопель; сеть

*б 5:18 катар орма – паралич; катардыця – парализованный

*в 5:37 кедень кескав – бурдюк


предыдущая глава Глава 5 следующая глава