Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКОНЬ КОРЯС ЕВАНГЕЛИЯ

Глава 12

Ломанде, кона максызе винаумарькс пирензэ сиведезнень

1Иисус кармась кортамо тенст валвелявкссо:

«Ве ломань озавтсь винаумарькс пире, пиризе пирявтсо, чувсь умарень чемерямо латко, тейсь ванстома башня ды сиведсь пиренть мельга якицят. Сонсь тусь лия масторов.

2Сась умарень кенерема шка, сон кучизе важонзо винаумарь пирень мельга якицятнень кедьстэ умарень таликанзо саеме.3Сынь сонзэ кундызь, чавизь ды кучизь мекев чавонь кедть.

4Таго азорось кучсь тенст лия важо, сынь сеньгак прянзо порксызь кевсэ ды нарьгазь нолдызь.5Сон таго лията кучсь, сень маштызь. Лия кучозтнень марто тейсть истя жо: конань чавизь, конань маштызь.6Сонзэ кадовсь ансяк вечкема вейкине цёразо. Меельце пелев сонзэяк кучизе тенст, арсезь: “Паряк монь цёранть эйстэ визделгадыть”.7Пиренть мельга якицятне мерсть вейкест-вейкест туртов: “Те буень поладыцязо, адядо, маштсынек сонзэ, сестэ сонензэ кадовиця ули-парось ули миненек”.8Сонзэ кундызь, маштызь, винаумарь пирестэнть уловонзо ушов ёртызь.

9Мезе теи тенст пирень азорось? Сон сы, маштсынзе винаумарькс мельга якицятнень ды пиренть макссы лиянень.10Арази тынь эзинк ловно тень Сёрмадовксстонть:
“Се кевесь, конань ёртызь кудонь теицятне,
теевсь ужонь-уголонь кирдиця юр кевекс.
11Тень теизе Азорось,
ды миненек сон неяви тамашакс”?»

12Сынь чарькодсть: те валвелявксонть Иисус ёвтнизе сындест. Секс сынь вешнесть, кода Сонзэ кундамс, ансяк пельсть ломантнеде. Мейле кадызь Сонзэ ды тусть.

Кесарнень каявкс

13Сынь кучизь конат-конат фарисейтнень ды Иродонь ломантнень Иисусонь вал лангсо кундамо.14Сеть састь тензэ, кортыть: «Тонавтыця, минь содатано, Тон кортат ды теят видестэ, киненьгак савтомадо а арсят ды кодамояк ломань а яват. Тон видестэ тонавтат Пазонь кинтень. Ёвтака, эряви-арась Римень кесарнень каявкс пандомс? Эряви миненек пандомс сонзэ эли а эряви?»15Иисус пачк несь сынст аванькс седеест, мерсь тенст: «Мекс снартнетядо-варчавтнетядо Эйсэнь? Кандодо Тень динар ярмак, ванса».16Сынь кандсть, Сон кевкстинзе: «Кинь чамась ды лемесь сонзэ лангсо?» Сынь мерсть Тензэ: «Кесарень».17Иисус каршост мерсь: «Максодо кесарнень кесаренсенть, а вана Пазонтень – Пазонсенть». Весе тусть неть валтнэнь лангсо дивсезь.

Урьвакстомадо ды кулозьстэ вельмемадо

18Састь Иисуснэнь зярыя саддукейть, конат кулозьстэ вельмемантень а кемильть, ды кевкстизь Сонзэ:19«Тонавтыця, Моисей сёрмадсь миненек Койсэнть: “Бути урьвакстозь ломанесь кулы эйкакштомо ды кадови низэ, сестэ кулозенть ялаксозо саезэ эстензэ те нинть полакс, ды сынь чачтост эйкакш. Истя те эйкакшось ули ловозь кулозь лелянть эйкакшокс”.20Ульнесть сисем лелят-ялакст. Васенцесь урьвакстсь ды кулось, эйкакшт эзь кадо.21Нинзэ саизе омбоцесь, сонгак кулось, эйкакшт эзь кадо; колмоценть мартояк истя теевсь.22Истя сайнизь сонзэ никс весе сисемнест, ансяк кияк эйкакшт эзь кадо. Весемеде мейле кулось ниськак.23Сестэ, зярдо сынь кулозьстэ вельмить, конанень эйстэст ули сон никс? Эдь сон весе сисемнест туртов ульнесь никс».

24Иисус каршост мерсь: «Нама, тынк тапи-човори Сёрмадовкстнэнь ды Пазонь виенть а содамось!25Зярдо кулозьстэ вельмить, а кармить урьвакстнемеяк, мирденень лиснемеяк. Вельмезтне кармить эрямо кода менельсэ ангелтнэ.26Тынь, нама, содатадо кулозьстэ вельмемадо. Арази тынь эзинк ловно палыця куракштонть Моисеень книгасто ёвтнеманть? Тосо Пазось мерсь Моисейнень: “Мон Авраамонь Пазан, Исаконь Пазан ды Яковонь Пазан”.27Лисни, Пазось эрицятнень Паз, аволь кулозтнень. Ванан, тынь пек тапавтадо-човорявтадо».

Сехте покш кармавтовксось

28Койс тонавтыцятнестэ вейкесь маризе сынст пелькстамост ды каршост Иисусонь валонь парсте ёвтамонть, мольсь ваксозонзо ды кевкстизе Сонзэ: «Конась весе кармавтовкстнэнь эйстэ сехте эрявиксэсь?»29Иисус мерсь каршонзо: «Весе кармавтовкстнэнь эйстэ сехте эрявиксэсь вана те: “Кунсолок, Израиль! Азорось, минек Пазось – вейкине Азорось.30Вечкть Азоронть, эсь Пазот, весе седейсэть, весе оймесэть, весе превсэть-содавкссот, весе вийсэть”. Те васенце кармавтовксось!31Омбоце кармавтовксось сонзэ кондямо: “Вечкть малавиксэть, кода эсь прят”. Лия нетнеде башка седе покш кармавтовкс арась».

32Койс тонавтыцясь мерсь Иисуснэнь: «Те вадрясто ёвтазь, Тонавтыця! Тон видестэ мерить: Пазось вейкине, ды Сондензэ башка лия паз арась.33Сонзэ вечкемс весе седейсэ, весе превсэ, весе оймесэ, весе вийсэ ды малавиксэтькак вечкемс, кода эсь прят, те пултамонь анокстнэдеяк ды Пазнэнь лия казнетнедеяк седе ламо».34Иисус неизе превейстэ каршонзо валонь ёвтамонть ды мерсь тензэ: «Тон Пазонь Инязорксчиденть аволь васолат». Теде мейле киньгак эзь сато смелчизэ макснемс Тензэ кевкстемат.

35Пазонь кудосо тонавтомсто Иисус мерсь: «Кода истя Койс тонавтыцятне кортыть: Пазонь кучовт Идицясь – Давидэнь цёра?36Ансяк сонсь Давид Пазонь Оймеялтонть ветямонзо коряс ёвтась:
“Азорось мерсь монь Азоронтень:
Озак Монь вить кедь ёнов,
зярс Мон а тейсынь Тонь душманот
пильгеть путома таркакс”.
37Сонсь Давид мери Тензэ Азоро. Кода сестэ Сон ули тензэ цёракс?» Ламо ломантне мельспаросо кунсолость эйсэнзэ.

38Тонавтомсто Иисус кортась тенст: «Ванстодо прянк Койс тонавтыцятнеде. Сынь вечксызь кувака оршамосо якамонть ды ошкужосо мартост шумбракстнеманть,39синагогасо – икеле таркатнесэ озадо аштеманть, каванямо кудосо – васенце таркатнес озамонть.40Сынь нельгить доватнень кудост, ды пряст невтемань кисэ кувать озныть. Истятнэ седеяк стакасто судязь улить!»

Довань максовкс

41Мейле Иисус озась ярмаконь кирдемканть каршо ды вансь, кода ломантне каясть ярмактнень. Ламо сюпавтне кайсесть ламонь-ламонь.42Сась ве кажов дова авине ды каясь пижень кавто ярмаккеть, весемезэ ве трёшник.43Иисус тердинзе эсь тонавтницянзо, мерсь тенст: «Видестэ кортан тенк: те кажов довась каясь ярмаконь кирдемкас сехте ламо весе путыцятнень эйстэ.44Весе каясть ламочидест, сон вана каясь арасьчидензэ ды максызе весе, мезезэ ульнесь, мейсэ тензэ эрямаль».


предыдущая глава Глава 12 следующая глава