Слово Твое - светильник ноге моей и свет стезе моей

Библия на финно-угорских языках



Словарь

Выбрать язык

Книги Нового Завета

предыдущая главаследующая главас русским текстом

БИБЛИЯНЬ ВАЛКС

 

А

Аарон – Моисеень брадоц. Аарон ульсь Израилень васенце озксвятикс. Аньцек сон и сонь юромонь поладыенза покодсть озксвятикс и каннесть Шкайти озксказнет Израилень ломаньтналть инкса. 2 Моис. 29; Лук. 1:5; Евр. 5:4. Ванк: Левий.

Авель – Адамонь и Евань омбоце цёрасна. Сон кандсь Шкайти озксказне, кона тусь Шкайть мяльс, а озксказнесь, конань кандозе Каин брадоц, Шкайть мяльс ашезь ту. Тянкса Каин пяк кяжиясь и шавозе Авель брадонц. 1 Моис. 4:1-16; Матф. 23:35; Евр. 11:4; 12:24. Ванк: Каин.

Авраам – евреень ломаньтналть ушедыец, конань мархта Шкайсь ладясь соткс, и надияфтсь максомс тейнза мастор и пяк лама идьта-унокта. Сонь тяфта жа лемнесазь «кемайхнень алясна», сяс мес мзярда ашель мезень лангс надиямс, Авраам сяка ашезе юмафне надияманц, и кемась: Шкайти вийс коре пяшкодемс надияфтоманц. 1 Моис. 12:1-3; 15:1-6; 17:1-5; Рим. 4:16-25; Евр. 11:8-12. Ванк: Сарра.

Аллилуйя – евреень вал, кона ётафневи «шнасть Азорть». Тяда башка «аллилуйя» валсь азондови Шкайть шнамста. Ванк: Иоанн. няйфкс 19:1,3,4.

Алтарь – васта, коза путневсть Шкайти кантф озксказнетне. Жертвенник. Тяда башка Шкаень кудса ульсь ёмла алтарь, конань лангса плхнесть ладан. Матф. 5:23-24; Лук. 1:11; 1 Кор. 9:13.

Альфа и Омега – греконь алфавитса васенце и мекольце букватне. Тяфта Иисус лемнезе Эсь прянц. Иоанн. няйфкс 22:13.

Аминь – евреень вал, кона ётафневи «Виде тяфта!» али «Улеза тяфта!» Матф. 6:13; 1 Пётр. 4:11.

Ангел – греконь вал, кона ётафневи «кулянь канды». Библияса кулянь кандыкс лемневихть Шкайти покоди ваймопожфне. Тяфта жа улихть ангелхт, конат сувасть пежес и тяни покодихть Сатанати, а аф Шкайти. Матф. 1:20; 25:41
.Апостол – греконь вал, кона ётафневи «кучфсь». Васенце апостолкс Иисус Христоссь кочказень кемгафтува тонафниензон. Од Сотксса (в Новом Завете) Павел и кона-кона лия кемайхне тяфта жа лемневсть апостолкс. Матф. 10: 2-4; Рим. 11:13; 1 Кор. 12:28.

Арамеянь кяль – семитонь кяльхнень эзда фкясь, кона мала кунардонь евреень кяльть мархта. Иисусонь пингста еврейхне и Соньцке Иисус Христоссь корхтасть арамеянь кяльса.

Ареопаг – греконь вал, кона ётафневи «Аресонь губороц». Тя Афинань вярдень судсь, кона ащесь тя губорть лангса. Ареопагсь, лиякс, вярдень судсь вятезень тонафтомань, религиянь и прянь вятемань кизефкснень. Ап.т. 17:19.

Асия – тяса корхтави аф материкть колга, а Римонь аймакть колга, кона ащи Ёмла Асиять шинь стяма ширесонза. Тя аймакса ульсть тяфтама ошт: Ефес, Филадельфия, Колоссы. Тяниень пингть сон сувси Турциять пяльксозонза. Ап.т. 2:9; 2 Кор. 1:8.

Аф шапама кшинь ила – ила, кона моли сисем шит и сотф евреень очижить мархта. Ня шитнень мярьгондеви ярхцамс аф шапама кшида сяпи тише мархта, коста и тусь тя илать лемоц. Аф шапама кшинь илась ётафневи кода лятфнембяль ся пингть колга, мзярда еврейхне ворьгодсть Египетста, и ашесть кенере шорямс кшинди шапакс. Праздник опресноков. Матф. 26:17; Марк 14:1; Ап.т. 12:3.

Ахаия – Римонь масторть пяльксоц, кона ащи тяниень пингонь Грецияса. Сонь лангсонза ащесть тяфтама ошт: Афина, Коринф и Кенхрея. Ап.т. 18:12; 2 Кор. 11:10.

наверх

В

Ваал – кунардонь пингонь аф афкуксонь шкай, конанди сюконякшнесть хананейхне. Рим. 11:4.

Вавилон – кунардонь пингонь вии мастор, империя, кона азорондась ламоц лия масторхнень лангса. 7 векста Христость шачемдонза инголе Вавилонць сяськозе Иудеять и 70 кизос сявозень полонц сонь эряензон. Матф. 1:11; Ап.т. 7:43.

Вадема-кочкама – евреень койть коряс, мзярда ломанць путневсь меень-меень оцю покодемас, сонь прянц вадендезь елейса. Тянь вельде няфнезь: ватьф ломанць кочкаф оцю тевонди. Тя обуцять нолнезь тевс оцязоркс, озксвятиень оцюнякс али прорококс путомста. Помазание. Ап.т. 4:27; 9:22; Лук. 4:18; 2 Кор. 1:21. Ванк: Христос,Мессия.

Ваймамань ши – еврейхнень ваймамань шисна ульсь ёткшиста. Недялять сисемце шиц лемневсь Шкайти, сяс покодемс тя шиня афоль мярьгондев. «Шаббат» евреень валсь ётафтови кода «ваймама». Суббота. Матф. 12:1; Иоанн 19:31.

Валаам – Ташта Сотксонь (Ветхозаветный) пророк. Моавиянь оцязорсь Ваалак кошардозе Валаамонь сюдомс Израилень ломаттнень, но Валаам ашезе тие тянь, а меколанкт, бславазень синь. «Иоаннонди панчф няйфкс» книгаса азондови, кода Валаам макссь ёнь Ваалак оцязорти васькафтомс Израилень ломаттнень: сюконяльхть аф афкуксонь шкайхненди и усксевольхть лия тналонь аватнень мархта. 4 Моис. 22:5; 2 Пётр. 2:15, Иоанн. няйфкс 2:14.

Ведьгемонь шинь ила – сёронь урядамань ила, кона ётафневсь Очижида меле ведьгемонь шинь ётазь. Праздник пятидесятницы. Ап.т. 2:1.

Видексши1. кда корхтамс Шкайть колга, тя валть смузец тяфтама: Шкайсь фалу сембе тевсонза тиенди видексшить коряс, виде судть коряс и максф валонц коряс. Рим. 3:5; 2 Пётр. 1:1. 2. а кда корхтамс ломаттнень колга, эста тя валть смузец тяфтама: Иисус Христос кулось ломаттнень инкса и Tейнза кемайхненди максозе Эсь видексшинц. Тянь вельде кемай ломанць лувови аф муворукс и видекс Шкайть сельмоса. Праведность. Рим. 3:22; 2 Тим. 4:8.

Видексшинь ломанькс лувома – ётафтф греконь кяльста, валста, конань смузец «лувомс аф муворукс и видекс». Библияса тя валть смузец тяфтама: Вярдень Шкайсь нолясыне ломанть пежензон и лувсы сонь аф муворукс, стамкс, кодама сон ульсь пежес прамдонза инголе. Шкайсь эрть лувсы видексшинь ломанькс аньцек Иисус Христости кемамать вельде. Оправдание. Рим. 4:25; 5:9.

наверх

Г

Гоморра – Ванк: Содом.

Греконь кяль – Иисусонь эряфонц пингста тя кяльса корхтасть ламоц ломаттне, конат эрясть Модакучкань оцюведть перьфке ащи масторхнень эзга. Тяфта жа Од Соткссь (Новый Завет) меле сёрматфоль греконь кяльса.

наверх

Д

Давид – кунардонь Израильть омбоце оцязороц, Иисусонь атянь-атяц, сяс Иисусонь лама вастова лемнесазь Давидонь Цёракс. Ташта Сотксть коряс (по Ветхому Завету) Шкайть эзда кучф Идись лиси Давидонь юромста. Матф. 1:1; Лук. 1:32; Ап.т. 2:25.

Динарий – римонь сиянь ярмак. Иисусонь пингста тняра пандсть фкя шинь покодеманкса. Матф. 20:2; Марк 6:37.

Драхма – греконь сиянь ярмак. Драхмать питнец динарийть мархта фкя. Ап.т. 19:19.

наверх

Е

Евнух – петьф аля, кона покодсь оцязоронь кудса. Кастрат, скопец. Матф. 19:12; Ап.т. 8:27.

наверх

И

Иаков1. Исааконь и Ревеккань ульсть кафтасть цёрасна – Исав и Иаков. Васенцекс шачсь Исав, но аляснон бславамац максовсь Иаковонди, омбоце цёрати. Шкайсь макссь Иаковонди од лем – Израиль, сяс ломаньтналсь, кона лиссь сонь юромстонза, лемневи Израилень ломаньтналкс. 1 Моис. 25:26; Матф. 1:2. Ванк: Исав. 2. Заведеень цёрац, Иисусонь колма мала тонафниензон эзда фкясь. Матф. 4:21; 17:1. 3. Иисусонь брадоц. Матф. 13:55; Ап.т. 12:17; 15:13. 4. Алфеень цёрац, Иисусонь 12 тонафниензон эзда фкясь. Матф. 10:3.

Идемэвозь – греконь кяльста тя валсь ётафневи: «ся, кона муворгофни». Кяжи ваймопожфнень азорсна, кона сембе вийса най моли Шкайть каршес. Ломань ваймонь юмафни душман. Дьявол.

Идись – Шкайсь кучезе Эсь Цёранц, Иисус Христость Идикс масторлангти. Иисус Христоссь идезень ломаттнень пежеть кядялда, муворшить и наказамать эзда – пефтома пингонь куломать эзда. Спаситель.

Иеремия – пророк, кона эрясь 500 – 600 кизотнень Христость шачемдонза инголе. Матф. 2:17.

Иисус Христос – греконь кяльса тя лемсь кайги «Иесус», евреень кяльса – «Иошуа» и сонь смузец: «Азорсь идесамазь».

Илия – пророк, кона эрясь 800 кизотнень малава Христость шачемдонза инголе. Еврейхне Малахия пророкть валстонза содазь: Илия анокласы Мессиять саманц масторти. Мал. 3:22-24; Матф. 11:14.

Иневалда – Сёрматфксса тя валсь сидеста васьфневи валзюлмоса «Шкайть иневалдоц» и канни тяфтама смузь: Шкайсь инь оцю и Сон азорондай семботь лангса. Библияса азондови, кода Шкайть иневалдоц эвондакшнесь Израилень ломаттненди оцю валдса, толса и качамса. Иисус Христость эряфоц, Сонь дивань тевонза, а сембода пяк Сонь крёз лангса куломац и вельмамац няфнесазь Шкаень Цёрать иневалдонц. Слава Божия. Матф. 19:28; Фил. 4:19.

Иняру кош – кош, конань потмоса Израилень ломаньтналсь озонкшнесь Шкайти и каннесь Тейнза озксказнет, мзярс Соломон оцязорсь ашезь стяфта Иерусалимса Шкаень куд. Скиния. 2 Моис. 25:9; Евр. 8:2.

Иняру ломаттне, иняруфне – ломатть, конат кемайхть Шкайти и максозь эсь пряснон Шкайть (Христость) кядялу. Святые. Матф. 27:52; Рим. 1:7; 8:27; 1 Кор. 1:2; 2 Кор. 1:1; 9:12-13; Тит. 2:3.

Иоанн – 1. Иоанн Кстиндайсь – пророк, кона кучфоль азомс Христость саманц колга и анокламс Тейнза ки. Иоанн эрясь шавмодаса и тернезень ломаттнень каендамати и ведьса прянь кстиндафтомати. Сон кулось Иисусонь эряфонц пингста, Ирод оцязорть кядьтонза. Иоанн Креститель. Матф. 3:1; Иоанн 3:23. 2. Иисусонь тонафниец, 12 апостолхнень эзда фкясь, Заведеень цёрац и Иаковонь брадоц. Сон сёрмадозень Иоаннонь коряс Евангелиять, Иоаннонь колма сёрманзон и Иоаннонди панчф няйфксть. Матф. 4:21-22.

Ирод1. Ирод оцязорсь. Иудеянь оцязорсь (азорондась 37 – 4-це кизотнень Иисусонь шачемдонза инголе), конань мярьгоманц коряс Вифлеемса шавфтольхть сембе кафта кизонь цёрашабатне. Ирод оцязорсь одукс стяфтозе-кеподезе Иерусалимонь Шкаень кудть срафтомдонза меле. Матф. 2:1,16. 2. Ирод Антиппа. Ирод оцязорть цёрац. Азорондась Галилеяса Иисусонь шачемдонза инголе 4-це кизоста сявомок – Иисусонь шачемдонза меле 39-це кизоти молемс. Ирод Антиппа пякстазе пякстамгуду Иоанн Кстиндайть, а сяльде, рьванц мярьгоманц коряс, керфтозе сонь прянц. Тейнза вятнезь Иисусонь крёз лангс эськодемдонза инголе. Матф. 14:3,6; Марк 6:14; 16-18; 20-22. 3. Ирод Архелай. Ирод оцязорть цёрац. Сон азорондась Иудея, Самария и Идумея масторхнень лангса. Матф. 2:22. 4. Ирод Агриппа I. Ирод оцязорть унокоц, кона ульсь Иудеянь оцязоркс 41 – 44-це кизотнень Иисусонь шачемдонза меле. Сон шавозе Иаковонь, Иоаннонь брадонц, и ёрась шавомс Пёторонь, но Шкайсь ашезе макса тянь тиемс. Сонцень Ирод Агриппань шавозе Азорть ангелоц. Ап.т. 12:1-11,23. 5. Ирод Агриппа II. Ирод Агриппать I цёрац. Азорондась Иудеяса 48 – 100 кизотнень cамс. Агриппа II кизефнезе-судендазе апостол Павелонь и кучезе сонь Риму кесарти. Ап.т. 25:13; 26:2.

Исаак – Авраамонь цёрац, конань Сарра сиредембяльхть шачфтозе Шкайть надияфтоманц коряс. Авраам, Исаак и Иаков, Исааконь цёрац – нят Израилень ломаньтналть ушедысна. Матф. 1:2.

Исав – Исааконь и Ревеккань ульсть кафтасть цёрасна. Васенцекс шачсь Исав, омбоцекс Иаков. Исав ярхцамбяль шаванянкса мизе Иаковонди васенце цёракс улемань вастонц. Исаак алясна максозе эсь бславаманц аф Исавонди, кода васень цёрати, а Иаковонди, сяс сонь тналоц арась Шкаень кочкаф тналкс. Евр. 12:16. Ванк: Иаков.

Исаия – пророк, кона эрясь Иерусалимса 700 кизотнень Христость шачемдонза инголе. Исаиянь пророчестванза сембода крхкаста азондыхть Шкайть эзда кучф Идить колга, Христость колга. Матф. 12:17.

Иуда1. Иаковонь 12 цёранзон эзда фкясь. Иисус Христос ульсь Иудань юромста. 1 Моис. 35:23. 2. Иуда Искариот, Иисусонь 12 тонафниензон эзда фкясь, кона мизе Сонь. Матф. 10:4. 3. Иуда, Иисусонь нинге фкя тонафниец. Лук. 6:16. 4. Иуда, Иисус Христосонь брадоц. Матф. 13:55.

Иудея – Израильть (Римть кядяла улемста) лямбе ширдень аймакоц, конанди сувсесть Идумеянь, Самариянь модатне и Иудань панда лангонь модась. Матф. 2:1.

наверх

К

Каендама – мзярда ломанць няйсы эсь седисонза пеженц и каендай, мес тиендезе сонь. Эста сон сай мяльс шарфтомс тя пежеть эзда и лоткамс тиендемдонза. Тяда меле ломанць пшкяди Шкайти и ушеды эряма лиякс, Шкайть мархта и Сонь мяленц коряс, и тя лемневи каендамакс. Ванк: Шкайти шарфтома.

Каин – Адамонь и Евань васенце цёрасна, кона шавозе Авель брадонц. Ванк: Авель. 1 Моис. 4:1-16; 1 Иоанн. 3:12; Евр. 11:4.

Кальдявсь – тя Сатанать лия лемоц. Лукавый. 1 Иоанн. 2:13.

Каяфксонь кочкай – тя дацькянь кочкай ломань, сидеста еврей, кона кочксесь Римти дацькя эсь масторонь ломанензон кядьста. Еврейхне прокс ашезь кельге каяфксонь кочкайхнень, сяс мес лувондозь синь эсь масторснонды полафни ломанькс. Мытарь, сборщик налогов. Матф. 9:10; Марк 2:15.

Кемаень пуромкс – грекокс «экклесиа». Од Сотксса (в Новом Завете) тя валсь канни кафта мяльхть: 1. Иисус Христости кемайхнень пуромкссна, кона ульсь коса-бди фкя вастса. 2. Иисус Христости сембе кемайхне. Матф. 18:17; Ап.т. 2:47.

Кемай ялга – ломань, кона кемай Иисус Христости. Тяфтама лямбе и седиваксстонь ялгафтомась Шкаень валса лемневи «улемс брадкс-сазоркс Иисус Христосса». Брат/сестра во Христе. Матф. 5:22; Ап.т. 6:3.

Кемайхне – Ванк: иняруфне, иняру ломаттне.

Кемонце пялькссь – Шкаень куду максф казне, кона содаф еврейхненди Авраамонь и Иаковонь пингста сявомок. Койсь вешсь ломаттнень кядьста макссемс Шкайти кемонце пяльксть паксяста сембе кочкаф тозерснон эзда и сембе жуватаснон эзда. Десятина, десятая часть. Матф. 23:23; Лук. 18:12; Евр. 7:2.

Кесарь – тя Юлий Цезарень унокоц, конанди сон максозе эсь оцязорондамань вастонц. Меле кесарькс лемневсть Римонь сембе оцязорхне. Матф. 22:17; Лук. 20:25.

Киськопень керфтома – евреень кой, конань коряс эряви керфтомс кафкса шинь цёранять киськопенц. Киськопень керфтомась Израильса ульсь тяштьксокс ся сотксти, конань Шкайсь ладязе евреень ломаньтналть мархта. Обрезание. 1 Моис. 17:9-14; Лук. 1:59; Гал. 2:3.

Кой (Моисеень коец) – Шкайть коец, кона максфоль евреень ломаньтналти. Койкс еврейхне лувондсазь Моисеень вельде максф кемонь кошардомвалхнень али Моисеень вете книганзон. Койсь няфнесы, кодама Шкайть мялец евреень ломаньтналть колга и кода евреень ломаньтналти эряви эрямс. Закон, закон Моисеев. 1 Кор 14:21; Гал 4:21.

Койти тонафты – тя тонафнеф еврей, кона лац содазе Моисеень коенц и Шкайть эзда лия Сёрматфкснень. Койти тонафтыхне тонафнезь-ванондозь койть сембе ширде и тонафнезь ломаттнень тиендема койть коряс. Книжник, законник. Матф. 2:4; Марк 3:23; Лук. 23:10.

Крёз – кунардонь пингонь Римса крёз лангс эськодемась лувондовсь сембода визьксонь и сембода сяряди куломакс. Крёз лангс кучсезь сятнень, кит ульсть максфт куломас. Иисус Христос Азорсь эськотьфоль крёз лангс ломаттнень пежеснон нолдаманкса. Рим. 4:25; 1 Кор. 15:3; 1 Пётр. 2:24.

Кстиндама – тя ведьс навама. Од Сотксса (в Новом Завете) корхтави кафта кстиндамань колга: 1. Иоанн Кстиндайть кстиндаманц смузец ульсь пежень кадомаса, седиваксстонь мяльса оду аф тиендемс пежет и Шкайти прянь максомаса. Матф. 3:1-6. 2. Иисус Христосонь вельмамдонза меле кстиндамать смузец келемсь и крхкалгодсь: кода Иисус Христоссь кулось и вельмась кулофнень эзда, тяфта жа ломанць кстиндамать вельде кулы пежети и вельмай од эряфонди Иисус Христосонь мархта. Крещение. Матф. 3:6; Ап.т. 2:38; Кол. 2:12.

Кядень путома (киньге лангс) – Сёрматфксса кядень путомась васьфневи: 1. киньге бславамста; Матф. 19:13,15. 2. мзярда киньге путнезь кодамовок тевс кемаень пуромксса; Ап.т. 6:6; 13:3. 3. озондомста кядень путомать вельде Шкайсь макссезе ломанти Эсь Иняру Ваймопожфонц; Ап.т. 8:17; 19:6. 4. кодамовок сярядемада али урмада пчкафтомста. Марк 6:5; Лук. 4:40; Ап.т. 28:8. Рукоположение, возложение рук.

наверх

Л

Левиеннетне – нят Левиень уноконь-уноконза. Шкайсь кочказе Левиень юромонц покодемс Шкаень кудса. Шкаень кудса озксвятикс ульсть аньцек сят, кит лиссть Левиень юромста и Аарононь тналста. Сембе лиятне, кит ульсть Левиень юромста, но лия тналста, лезнесть озксвятихненди. Лук. 10:32; Иоанн 1:19.

Левий – Иаковонь кемгафтува цёранзон эзда фкясь. 1 Моис. 29:34; Евр. 7:9. Ванк: Иаков 1.

Лия тналонь ломатть – тяфта еврейхне лемнезь аф еврейхнень, конат исть сюконякшне фкя-тяка афкуксонь Шкайти, но кемасть и сюконякшнесть аф афкуксонь и эсь кятть тиф шкайняснонды. Язычники. Матф. 20:19; Ап.т. 15:12; Рим. 11:13.

Ломанень Цёра – тяфта Евангелияса Иисус Христос лемнезе Эсь прянц. Тя лемть вельде азондови – Сон ломань и сяка пингть Шкаень Цёра, Мессия, конань колга инголькиге азондсть Ташта Сотксонь (Ветхозаветные) пророкне. Сын Человеческий. Дан. 7:13; Матф. 8:20; 9:6.

Лот – Авраамонь брадонц цёрац. Содомть плхтамда инголе, Шкайсь идезе Лотонь и лихтезе тоста сонь и сонь семьянц. 1 Моис. 12:4; Лук. 17:28; 2 Пётр. 2:7.

наверх

М

Мелхиседек – Салим ошень оцязор, озксвяти, конанди Авраам максозе кемонце пяльксть тюремвастста сембе сявфть эзда. Сон бславазе Авраамонь. 1 Моис. 14:17-20; Евр. 5:6.

Менелень ОцязорксшиЦарство Небесное. Ванк: Шкаень Оцязорксши.

Мессия – Ванк: Христос.

Моисей – Израилень ломаньтналть вятиец, кона лихтезень синь Египетонь урешиста, пророк. Моисеень вельде Шкайсь максозень кемонь кошардомвалхнень и коень лия мярьгоматнень. 2 Моис. 2:11; Матф. 8:4; Лук. 9:30.

наверх

Н

Ниневия – кунардонь пингонь Ассириянь империять пряошец, коза Шкайсь кучезе Иона пророкть. Ионань кулянц марямда меле, тя ошень эряйхне каендасть и шарфтсть Шкайти. Иона 3:3; Матф. 12:41; Лук. 11:30.

Ной – Шкайти кемай аля, кона эрясь кунардонь пинкнень. Шкайть кошардоманц коряс Ной тись оцю венч, конань вельде сон эсь кудэряензон мархта идевсь оцюдонга оцю шадоть эзда, конань Шкайсь кучезе масторть лангс семботь ваяфтоманкса-машфтоманкса. Матф. 24:36-39.

наверх

О

Од Соткс – Библиять омбоце пяльксоц, коса азондови Иисус Христость шачеманц, эряманц и тонафтоманц колга, куломанц и вельмаманц колга, и васенце христиаттнень эряфснон колга. Новый Завет.

Озксвяти – Евреень озксонь вяти, Шкаень кудса покоди. Священник. Матф. 8:4; Евр. 8:6.

Озксвятиень оцюня – сембе озксвятихнень оцюнясна, кона вятезень озондомань и озксказнень кандома тевфнень Шкаень кудса и тяфта жа ульсь Оцю пуромксонь вятикс. Первосвященник. Матф. 2:4; Иоанн 18:19; Евр. 3:1.

Озондома – тя пшкядема Шкайти, и Сонь мархтонза корхтама. Сембе сяка, кода ломанць озонды: ськамонза али лама ломань мархта, кайгиста али эсь пачканза, эсь валсонза али тонафнеф валса, инь эрявикссь: лисель озондомась седипотмоста. Озондомста ломанць эняльди мезенксонга (Матф. 21:22), али каендай тиф пежензон инкса (1 Иоанн. 1:9), али шнасы Шкайть и сюконяй Тейнза (Матф. 15:31; 1 Кор. 15:57), и стак тов. Иисус тонафнезень ломаттнень озондома. Матф. 6:5-15. Васенце кемаень пуромкссь озондсь. Ап.т. 12:5. Молитва.

Осанна – евреень вал, кона ноляви Шкайть шнамста и Тейнза озондомста. Смузец шарьхкодема тяфта: «Идемак монь, лезтт тейне». Матф. 21:9,15; Марк 11:9.

Оцю пуромкс – еврейхнень вятиснон пуромкссна, кона ётафнесь-ванондсь судендамань тефтка. Сон ащесь сизьгемонь ломаньцта, ётксост ульсть озксвятиень оцюнят, ломаньтналонь оцюнят, койти тонафтыхть, фарисейхть, саддукейхть и лият. Синедрион. Матф. 5:22; Лук. 22:66; Ап.т. 4:5.

Очижи – тя шиня еврейхне тяштькснесазь Египетонь урешиста мянемаснон и ярхцамбяленди аноклакшнихть очижинь вероз. Христиаттне тя шить сотнесазь Иисусонь, Шкаень Верозть, маятаманц, куломанц и вельмаманц мархта. Пасха. 2 Моис. 12:11; Матф. 26:2; Марк 14:1.

наверх

П

Пеже – Шкайть мяленц каршес моли тефт и мяльхть. Грех.

Постонь кирдема, поставама – мзярошка пинге аф ярхцамс и кой-коста афи симомс, а тянь вастс али озондомс, али каендамс пеженкса, али максомс пря Шкайти. Библиянь пророкне корхтайхть: постсь кемоста сотф Шкайть мяленц коряс эряфть мархта. Ис. 58; Матф. 6:16-18; Марк 9:29; Ап.т. 13:2-3.

Пророк – тя ломань, кона пачфнесыне Шкайть эзда максф валхнень ломаттненди. Матф. 1:22, Лук. 11:48.

наверх

Р

Равви, раввуни – тяфта еврейхне пшкятькшнесть эсь тонафтыснонды. Тя евреень вал, конань смузец «монь инь оцюзе». Иоанн 1:38, 3:2, 4:31.

Ревекка – Исааконь, Авраамонь цёранц, рьвац. Исавонь и Иаковонь тядясна. 1 Моис. 22:23; 24:15; Рим. 9:10.

Рим1. Мастор, империя. 63-це кизоня Христость шачемдонза инголе Римсь сявозе Израильть эсь кядялонза и ладязень тоза вятикс эсь ломанензон. 2. Римонь империять пряошец.

наверх

С

Саваоф Азорсь – Шкаень лепнень эзда фкясь. Ётафневи кода «Ушмовиень Азор». Иак. 5:4; Рим. 9:29.

Саддукейхть – тя религиознай и политическяй группа, конань лувксс сувсесть озксвятихть и козя ломатть. Саддукейхне ашесть кема ангелхненди и куломда меле вельмамати. Матф. 3:7; Лук. 20:27; Ап.т. 23:6.

Самария – тяфта лемневсь масторське и пряошське. Самариясь ащесь Иудеять и Галилеять ёткса. Самариянь эряйхне ульсть лия тналонь ломаттнень мархта шоряф еврейхть. Синь сюконякшнесть Шкайти эсь койснон коряс. Еврейхне и Самариянь эряйхне ашесть ладя фкя-фкянь мархта. Матф. 10:5.

Самуил – Израилень судья и пророк (1130-це кизотнень Христость шачемдонза инголе). Самуил пророкть тумда меле Израильса ушедсть азорондома оцязорхне. Самуил вадезе-кочказе оцязоркс Саулонь, а меле Давидонь. 1 Оцяз. 1:20; Ап.т. 3:24; Евр. 11:32.

Сарра – Авраамонь рьвац, Исааконь тядяц. 1 Моис. 11:29; Евр. 11:11.

Сатана – дьяволть лемоц. Ванк: идемэвозь.

Синагога – эрь ошса, коса эрясть еврейхть, ульсь синагога. Евреень синагогаса ётафневсть озксвятемат, коса лувондозь Сёрматфксть, тонафнезь сонь ломаттненди и озондсть Шкайти. Матф. 4:23.

Синедрион – Ванк: Оцю пуромкс.

Сион – Иерусалим ошть и кой-мзярда марнек Израильть лия лемоц. Тяфта лемневи ся пандське, конань лангса ащи Иерусалимть пяльксоц. Матф. 21:5; 1 Пётр. 2:6.

Смирна – касыксонь танцти шине смола, конань эзда тиендсть надобьят-месть. Матф. 2:11; Марк 15:23.

Содом и Гоморра – кафта кунардонь ошт, конат ащесть Кулоф оцюведть ширеса. Ня ошнень эса эряй ломаттнень пежеснон инкса Шкайсь кучсь менельста толонь и палыкандоронь пизем, и плхтазень синь. 1 Моис. 19:24-25; Матф. 10:15; Лук. 17:29; Рим. 9:29.

Соломон – Давид оцязорть цёрац. Сон арась оцязоркс алянц меле (961 – 922-це кизотнень Христость шачемдонза инголе). Соломононь оцязорондама пингстонза Израилень масторсь пяк вииста кассь-козякодсь. Соломон оцязорсь стяфтозе васенце Шкаень кудть Иерусалимса. 2 Оцяз. 12:24; Матф. 1:6; Лук. 11:31.

Соткс – максф вал вельде кинь-бди мархта сотовома. Кепотьксонди, рьвяямань соткс. Сотксонь тиемста эрявихть кафта ширет, конатненди эряви фкя-фкянь инголе пяшкотькшнемс сотксонь ладямста максф валснон. Союз, завет, договор. Сёрматфксса соткссь, конань Шкайсь ладязе ломаттнень мархта, путневи васенце вастти, сяс мес сон кемоста сотф ломаттнень идемаснон мархта. Сембонь Кирди Шкайсь венепнесы Эсь лезды кяденц ломаттненди. Соткссь, конань Шкайсь ладязе Израильть мархта Моисеень вельде, лемневи ташта сотксокс. Эста Израильсь макссь Шкайти вал улемс кулхцондыкс Тейнза, надиямс Сонь лангозонза и кирдемс Сонь пара лувксса. Кда синь тиендезь тянь, эста Шкайсь ванфнезень синь. А кда синь ашезь тиенде тянь, Шкайсь наказакшнезень синь и тянь вельде мрдафнезень виде ки лангс. Од сотксть тиеманц колга лама корхтасть пророкне. Кода содаф, Иисус Христость куломанц и кулофста вельмаманц вельде Шкайсь ладясь од соткс ломаттнень мархта, и кемокстазе тянь Иисусонь версонза. Од сотксса Шкайсь нолнесыне минь пеженьконь и макссесы тейнек Эсь Иняру Ваймопожфонц. Тянь вельде минь ули мяленьке и виеньке кулхцондомс Шкайть. Ветхий завет, новый завет. 1 Кор. 11:25; Евр. 7:22; 8:13.

Сотксонь арзя – шуфтста тиф арзя, кона сембе ширде вельхтяфоль зрняса. Потмосонза ванфневсть кевонь седяфне, конатнень лангса сёрматфтольхть кемонь кошардомвалхне. Сотксонь арзять вастоц ульсь иняру кошть иняруда-иняру вастсонза, а Шкаень кудть стяфтомда меле, Шкаень кудть иняруда-иняру вастсонза. Сотксонь арзясь эсьсонза няфнезе Шкайть оцязоронь озама вастонц и Шкайть улеманц Израилень ломаньтналть ёткса. Ковчег завета. Евр. 9:4; Иоанн. няйфкс 11:19. Ванк: Шкаень куд.

Судонь ши – тя шиня Шкайсь кармай судендамонза сембе масторть Иисус Христосонь вельде. Тя ули Иисус Христосонь омбоцеда самац масторлангти. Библияса тя шись нинге лемневи «Азорть шиц» али «мекольдень шись». Матф. 10:15; 1 Пётр. 3:7.

Сядонь оцюня – Римса сяда ушманонь лангса оцюнясь. Сотник, офицер. Матф. 8:5; Марк 15:39.

Сяськиень молема – мзярда Римонь армиянь вятихне ушманцнон и полонц сявфнень мархта мртцесть тюремвастста сяськозь, эста ломаттне васьфнезь синь оцю кенярдемаса. Апостол Павел няезе эсь покодеманц и марнек эряфонц тяфта: сон Христосонь ушманоц али Христосонди полонц сявфсь, кона моли Христость сяськиень молемасонза. Триумфальное шествие. 2 Кор. 2:14.

наверх

Т

Талант – Иисусонь пингста Израильса инь питни ярмаксь. Питнец 6600 динария. Ся пингоня фкя талантонкса евреень ломанти эрявсь покамс 24 киза. Матф. 18:24; 25:15.

Ташта Соткс – Библиять васенце пяльксоц. Ташта Сотксса (в Ветхом Завете) азондови, кода кунардонь пинкнень Шкайсь тиезень менельхнень-масторхнень и кода Сон ладясь соткст Израилень ломаньтналть мархта. Сон максозе тейст Эсь коенц и 10 кошардомвалхнень, и надияфтсь кучемс тейст Иди, Мессия. Ветхий завет. Ап.т. 3:25; Рим. 9:4. Ванк: Соткс.

Тёжянень оцюня – Римса тёжянь ушманонь лангса оцюнясь. Командир, тысяченачальник. Марк 6:21; Ап.т. 21:32.

наверх

Ф

Фараон – тяфта лемнезь кунардонь пингонь Египетонь оцязорхнень. Ап.т. 7:10.

Фарисейхть – тонафнеф еврейхть, конат кемоста ащесть Моисеень коенц ванфтоманц-кирдеманц инкса и ся кошардоматнень, конат меле ульсть путфт Моисеень койти. Израилень ломаттнень ёткса синь азорксшисна ульсь пяк оцю. Матф. 3:7; Лук. 6:7; Ап.т. 5:34.

наверх

Х

Христос – тя валсь сявф греконь кяльста и сон фкя сяка евреень «Мессия» валть мархта, конань смузец «ватьф». Еврейхне ваденкшнезь вайса ся ломанть прянц, кона кочксевсь оцязоркс. 1 Оцяз. 1:39. Тянкса Давидонь и сонь юромонь поладыензон кармасть лемнемост Ватьфокс. Тя валсь, лиякс мессия валсь, кемоста сотф Сетьмошинь канды Оцязорть мархта, конань колга инголькиге азондсть пророкне. Ис. 9:1-7. Иисусть лемнесазь Христоскс, али Мессиякс, сяс мес Сон кочкафоль тиемс Шкайть сембодонга оцю тевонц: идемс Сонь ломаньтналонц пежеснон эзда и тянь вельде пяшкодемс Шкаень надияфтоматнень.

наверх

Ш

Шкаень Вероз – Еврейхне эсь койснон коряс пежеснон нолдафтоманкса каннесть Шкайти озксказненди афсатыксфтома вероз али сявань лефкс. Христость лемнесазь Шкаень Верозкс, сяс мес Сон максозе Эсь прянц крёз лангса куломас, и Сонь вероц валовсь сембе ломаттнень пежеснон нолдаманкса. Агнец Божий. Иоанн 1:29; 1 Кор. 5:7.

Шкаень куд – куд, коса еврейхне каннесть озксказнет и ётафнесть озксвятемат. Ся вастти, коса ащесь алтарсь, сувсесть аньцек озксвятихне. Кудбялькссь, кона ульсь Шкаень кудть пирьфсонза, явфоль кафтова: иняруда-иняру васта и иняру васта. Иняруда-иняру вастти сувсевсь аньцек озксвятиень оцюнясь, и аньцек весть кизоти: кандомс озксказне ломаньтналть пежензон инкса. Иняруда-иняру вастсь явфоль иняру вастть эзда котфонь перяфксса. Храм. Матф. 4:5; 27:51.

Шкаень Оцязорксши – тя Шкайть оцязорондамац. Шкайсь тиезе сембе масторть, и Сон тя масторть Судьяц и сембе пингонь Оцязороц. Виде, тяни масторса пяк лама кальдявда и пежеда, и ломаттне сидеста арьсихть: тя масторса азорондай Сатанась, кона моли Шкайти каршек. Но Сёрматфксса корхтави: сай стама пинге, мзярда Шкайть Оцязорондамац тя масторлангса кармай няевома сембонди. Эста сят, кит ульсть Шкайть лангс надияйкс и Тейнза кемайкс, сувайхть Сонь Оцязорксшизонза, лиякс мярьгомс, кармайхть азорондама Сонь мархтонза. Иисус Христос лама тонафтсь Шкаень Оцязорксшить колга. Царство Божие. Матф. 4:23; Лук. 17:20-21.

Шкаень Цёра – тяфта лемневи Иисус Христоссь. Сын Божий. Матф. 3:17; Иоанн 11:27.

Шкайти шарфтома – тя седиень пичефкс тиф пежетнень инкса, седиваксстонь каендама, мес тиендить синь, и эняльдема Шкайти лездомс кадомс ня пежетнень и максомс вийхть эрямс Шкайть мяленц коряс. Матф. 3:8. Ванк: каендама.

наверх


предыдущая глава словарь 1 следующая глава