Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНДИ ПАНЧФ НЯЙФКС

Глава 11

Кафта азондыхть-кемокстайхть

1Тейне макссть манда, кона шарсь модань ункстама байдеконди, и мярьгсть: «Архт и ункстайть Шкаень кудть и алтарть, и эсонза сюконяйхнень.2А Шкаень кудть ушестонь пирьфонц тяк унксне, сяс мес сон максф лия ломаньтналхненди. Синь кармайхть тапсемонза иняру ошть нильгемонь кафтува ков.

3Мон максан Эсь колган кафта азондыхть-кемокстайхть, и синь ризнамань щамса кармайхть пророчендама тёжянь кафта сятт кодгемонь ши».4Ня азондыхне-кемокстайхне – кафта вайшуфтт и валдоптомань кафта кирдемат, конат ащихть масторлангонь Шкайть инголе.5Кда кивок тяряфты тиемс тейст кальдяв, эста синь кургстост лиси тол и нильсыне синь душманцнон; тяфта ули шавф эрсь, кие арьси тиемс тейст кяж.6Тейст максф азорксши пякснемс менельть: пизем аф туй модать лангс снярс, мзярс синь кармайхть пророчендама. Тяфта жа тейст максф вий тиемс веттнень веркс и кучемс модать лангс эрь кодама зиян, мзярксть ули мяльсна.

7Мзярда синь аделасазь пачфнемс Шкайть эзда максф валть, потмаксфтома томбаста кеподи кяжи жувата; сон кармай тюрема мархтост, сяськсыне синь и шавсыне.8Синь ловажаснон кадсазь оцюдонга оцю ошень ульцяса, коса эськотьфоль минь Азороньке. Тя ошть пророкне лемнесазь Содом али Египет.9Колма пяле мархта ши эрь кодама тналонь, юромонь, кялень и масторонь ломаттне кармайхть ванома ня ловажатнень лангс и аф макссазь синь калмамс.10Кафта пророкнень куломасна арай кенярдемакс масторлангса эряйхненди, сяс мес ня кафттне синь маятафтозь. Масторлангонь эряйхнень сявсыне кеняртькшнема, синь кармайхть ётафнема илат и кучсема фкя-фкянди казнет.

11Но колма пяле мархта шида меле сувась пророкнень потмозост эряфонь ваймопожфсь Шкайть эзда, и синь меки стясть пильге лангс. Оцюдонга оцю пелема сявозень сембонь сятнень, кит ванцть лангозост.12Кафта пророкне кульсть менельста кайги вайгяль, кона корхтась тейст: «Кеподеда тяза!» И душманцнон сельмингольдест синь кеподсть ковол лангса менели.13Эстокиге тиевсь оцюдонга оцю модашерьхкома, и срафтфоль ошть кемонце пяльксоц. Модашерьхкомать эзда шавовсь сисем тёжятть ломань, а лядыхнень сявозень пелема и синь азсть шнама менелень Шкайти.14Омбоце кальдявсь ётась, но курок сай колмоце кальдявсь.

Сисемце торамать торамац

15Сисемце ангелсь торазевсь – и менельса кайгозевсть вии вайгяльхть, конат корхтасть:
«Масторлангонь оцязорксшись
ётась Азороньконь и Сонь Мессиянц кядялу!
Азорсь кармай азорондама пефтома пингс!»

16И комсь нилие атятне, конат озадотольхть Шкайть инголе оцязоронь озама вастсост, прасть комада и сюконясть Шкайти.17Синь мярьгсть:
«Сюконятама Тейть, Азор, Сембонь Кирди Шкай,
кона ули, ульсь фалу и кона сай.
Сюконятама Тейть,
сяс мес Тон нолдайть тевс Эсь оцюдонга оцю вийцень
и кармать оцязорондама.
18Лия ломаньтналхне лаказевсть кяжса,
но сяка Тонь кяжце сась.
Сась пинге судендамс кулофнень
и каземс казнеса Тонь покодихнень – пророкнень,
а тяка лаца сембе иняруфнень,
сембе сятнень, кит ванцазь Тонь мяльцень, ёмланек-оцюнек.
Сась пинге машфтомс сятнень,
кит юмафнесазь-арафнесазь масторлангть».

19Менельса панжевсь Шкаень кудсь и тоста няевсь Шкаень сотксонь арзясь. И ёндолхне кфчиесть, кулевсть вайгяльхть, торасть атяпне, тиевсь модашерьхкома и прась оцю цярахман.


*а 11:3 1260 ши – тя 42 ков али 3,5 кизот.


предыдущая глава Глава 11 следующая глава