Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ ОМБОЦЕ СЁРМАЦ КОРИНФ ОШЕНЬ КЕМАЙХНЕНДИ

Глава 2

1Сяс мон сань мяльс аф якамс ширезонт, самазень мархта тага афолень канда тейнть пичефкс.2Вдь кда мон кандан тейнть пичефкс, эста кие кеняртьфтсамань монь? Дяряй аф сят, кинди мон кандонь пичефкс?3Вага, мон сёрмадыне тейнть ингольдень сёрмать сяс, мес монь аш мялезе самстон колсемс седиезень сятнень инкса, конатнень инкса эряволь кеняртькшнемс. Мон пяк надиян: монь кенярдемазе – тя сембонь тиньге кенярдеманте.4Мон сёрмадыне тейнть ингольдень сёрмать аф азомшка оцю ризфонь и седиень сярятьфонь марязь, и лама сельмоведень пяярдезь. Сёрмадыне аф седиентень коламанкса, а содалесть, конашкава пяк мон тинь кельктядязь.

Пежень тиити шумонь нолдамась

5Кда кие эздонт кандсь тейне пичефкс, эста сон аф аньцек тейне кандсь, а сембонди тейнтьке, катк аф ламода, аш мялезе тянь касфнемс.6Тя ломанти саты ся наказамась, конань сон кирдезе-кандозе ламотнень тинь эздонт.7А тяни тейнть сяда пара нолдамс сонь шумонзон и ваймафтомс-кемокстамс сонь: афоль коське тя оцю ризфть эзда.8И сяс мон эняльдян тейнть: няфтесть тейнза эсь кельгомантень.9Тона ингольдень сёрмать мон сёрмадыне тейнть сяс, мес монь мялезель содамс: кода тейнть кирдевихть варчсематне и ульхтяда тинь кулхцондыкс сембоса али аф.10А кинь шумонц тинь нолдасасть, сянь шумонц монга нолдаса. Вдь кинь шумонц мон нолдайне, кда ульсь мезе тейнза нолдамс, ся шумоть мон нолдайне тинь инксонт Христость шамаликонц инголе,11тязалемазь васькафта Сатанась. Вдь тейнек содафт сонь кичкор мяленза.

Христость сяськиень молемасонза улемась

12Мзярда мон сань Троадав Христость колга Пара кулянь пачфтема, Азорсь келес панжезе инголен кенкшть покодемати,13но седиезе сяка ашезе мушенда вастонц, сяс мес тоса мон ашине му Тит кемай ялгазень. Сяс Троадань кемайхненди пара валонь азозь мон тунь Македонияв.

14Сюконяма Шкайти, кона фалу вятьсамазь минь Христость мельге – Сонь сяськиень молемасонза, и эрь вастова пачфнесы минь вельденк Христость колга содамошить, кона танцти шине лаца.15Вдь минь Христость танцти шинец, кона кеподи-моли Шкайти; тя шинеть марясазь сят, кит молихть идемань киге и сятка, кит молихть юмамань киге аду.16Финцненди – минь куломань шине, кона канды кулома, омбонцненди – эряфонь танцти шине, кона канды эряф. Ина кинди сафтови тяфтама оцю тевса покодемс?17Вдь минь аф ся ламотнень эзда, конат мишендьсазь Шкаень валть ярмаконь сатоманкса. Меколанкт, минь виде ваймот пачфнесаськ Шкаень валть, кода вал, кона максф Шкайть эзда. И минь тянь тиендьсаськ Шкайть сельминголе Христость виенц вельде.


*а 2:14 сяськиень молема – триумфальное шествие. Мзярда Римонь армиянь вятихне ушманцнон мархта и полонц сявфнень мархта мрдцесть тюремвастста сяськома мархта, эста ломаттне васьфнезь синь оцю кенярдемаса. Апостол Павел няезе эсь покодеманц и марнек эряфонц тяфтане: сон Христость ушманоц али Христости полонц сявфсь, кона моли Христость сяськиень молемасонза.


предыдущая глава Глава 2 следующая глава