Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 26

Павелонь эсь прянь араламань корхтамац Агриппа оцязорть инголе

1Агриппа пшкядсь Павелонди: «Тяни корхтак тонць, аралак эсь пряцень!» Эста Павел кеподезе кяденц и ушедсь корхтама эсь прянц араламанкса:2«Агриппа оцязор, мон лувса эсь прязень павазукс, сяс мес тячи тейне максф тонь инголет араламс прязень сембе муворгофтоматнень эзда, конатнень повфтазь лангозон еврейхне.3А сембода пяк сяс, мес тон лац содасайть, кода евреень койхнень, стане пялькстомань кизефкснень. Сяс эняльдян тейть, кирдемшка мархта кулхцондомак монь.

4Монь эряфозень од пингстонкиге сявомок, кона ётнесь васенда ломаньтналозень ёткса Иерусалимса, содасазь сембе еврейхне.5Синь кунаркиге содасамазь монь и кемокстасазь, кда ули мяльсна: мон эрянь фарисейкс, кемамасонк инь стака тонафтомать коряс.6И тяни мон ащан судть инголе сянкса, мес надиян варамати, конань Шкайсь максозе минь аляньконди.7Минь кемгафтува юромоньке седиень путозь шинек-венек покодихть Шкайти, надияйхть Шкаень варамать пяшкодеманц лангс. Вчёк тя надиямать инкса, Агриппа оцязор, муворгофнесамазь монь еврейхне.8Мес тинь арьсетяда, кле тянди аш кода кемамс: Шкайсь вельмафнесыне кулофнень?

9Виде, инголи монга тяфта арьсень: тейне эряви сембе вийса тюремс Назаретонь Иисусть лемонц каршес.10Тяфта мон тиендень Иерусалимса. Тейне максфоль азорксши озксвятиень оцюнятнень эзда. Мон ламоц кемайхнень ёряйне пякстамгудга, а мзярда синь макссезь куломас, моньге вайгялезе ульсь шавихнень ширеса.11Сембе синагогава мон сидеста маятафтонь эсост, кошяряйне вихца сялдомс Иисусонь лемонц. Пяк оцю кяжса лаказь мон панцине синь нльне лия масторонь ошева».

Павел азонды Христость мархта васедеманц колга

12«Тяконь кувалма мон тунь Дамаск ошу, тейне максфоль озксвятиень оцюнятнень эзда азорксши и кошардомат, мезе тоса тиемс.13Шиньгучкать ки лангса, Агриппа оцязор, мон няень менельста валда, кона ульсь шида пяк сельмонь пидикс. Сон валдоптомань монь и мархтон молихненьге.14Минь сембе праме модать лангс, и мон кулень вайгяль, кона евреень кяльса корхтась тейне: "Савл, Савл, мес тон панят Эсон? Стака тейть молемс сялгомть каршес!"15Мон кизефтине: "Кият Тон, Азор?" Азорсь мярьгсь каршезон: "Мон Иисуссь, конань тон панцесак.16Но тяни стяк пильге лангс! Мон эвондань тейть ва мезенкса: тиемс тонь Эстейне покодикс и няфтикс-азондыкс сянь колга, мезе няеть, и сянь колга, мезе Мон нинге тейть няфтян.17Мон мяньфтте тонь пелькста, конат сайхть лангозт еврейхнень и лия ломаньтналхнень эзда, конатненди Мон тяни тонь кучте.18Кучте сельмоснон панжема, шобдать эзда валдти шарфтомост, Сатанать азорксшинц эзда – Шкайти. Мондейне кемамать вельде нолдавихть синь пежесна и максови тейст эсь пялькссна сембе иняруяфнень мархта марса".

19Сяс, Агриппа оцязор, тейне ашель кода аф кулхцондомс менелень няйфксть.20Васенда мон пачфтине Пара кулять Дамасконь и Иерусалимонь эряйхненди, сяльде марнек Иудеянь масторти и лия ломаньтналхненди: мон тердине синь кадомс пежеснон, шарфтомс Шкайти и тевса няфтемс Шкайти шарфтомаснон.21Вов тянкса еврейхне кундамазь монь Шкаень кудса и тяряфнесть шавомс.22Но Шкайть лездоманц вельде мон тячемс ащан кемоста пильге лангса, и няфтян-азондан сембонди: оцюфнендивок, ёмлатнендивок. Мон аф корхтан мезевок сяда башка, мезти пяшкодевома пророкнень и Моисеень азфснон коряс.23Лиякс азомс, Христости савсь маятамс и, кода кулофста васенце вельмафти, азондомс идемань валдть колга, кода Эсь евреень ломаньтналонцты, стане и лия ломаньтналхненди».

24Павел нинге корхтась эсь прянц араламанкса, мзярда Фест сязезе корхтаманц, ювадсь: «Тон ёньда лисеть, Павел! Вельф оцю содамошись шорязе пряцень».25«Мон ашень лисе ёньда, пара лувксонь Фест, – азозе Павел. – Монь валсон видеши и шумбра пря-ёнень мяль.26Сембось тя содаф оцязорти, сяс мон аф пелезь азса тянь тейнза. Мон содаса: сонь эздонза мезевок ашезь кяшев, сяс мес тя лиссь аф кодамовок шобда ужеса.27Азка Агриппа оцязор, тон кемат пророкненди? Содаса, кемат».28«Пяк ни курок ёрат эздон тиемс христианин», – мярьгсь Агриппа Павелонди.29«Курок – аф курок, мон озондан Шкайти, аф аньцек тон, но и сембе кулхцондыне тячи, аральхть монь лацон, виде, аньцек ня цинзерфтома», – мярьгсь Павел.

30Мзярда сон азозе тянь, оцязорсь стясь, мельганза стясть Феликс оцюнясь, Вереника и сембе мархтост сафне,31и лисемста синь корхтасть эсь ётковаст: «Аф тиенди тя ломанць мезевок стама, мезенкса максоволь куломати али кирдеволь цинзерса».32Агриппа мярьгсь Фестонди: «Улель кода нолдамс тя ломанть, кда сон афоль веше кесарень суд». Сяс оцюнясь арьсесь кучемс сонь кесарти.


предыдущая глава Глава 26 следующая глава