Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЕНЬ КОРЯС ЕВАНГЕЛИЯ

Глава 27

Иисусть вятьсазь Пилатонди

(Марк 15:1; Лук. 23:1,2; Иоанн 18:28-32)

1Валдашкодомшовор сембе озксвятиень оцюнятне и ломаньтналонь оцюнятне эсь ётковаст корхтамста састь мяльс шавомс Иисусонь.2Синь сотнезь Сонь, лихтезь тоста и максозь Римонь оцюняти Понтий Пилатонди.

Иудать куломац

(Апост. т. 1:18,19)

3Мзярда Иуда, Иисусонь мииец, няезе: Иисус судендаф куломас, сон каендась и мрдафтозе сиянь колмогемонь ярмакть озксвятиень оцюнятненди и ломаньтналонь оцюнятненди,4и мярьгсь: «Мон сувань пежес, мийне аф муворуть». Но синь тейнза корхтайхть: «Кодама минь тевоньке? Тя тевсь тонне».5Эста Иуда ёрдазень ярмакнень Шкаень кудть кияксонцты, лиссь и пондазе прянц.

6Озксвятиень оцюнятне кочказь ярмакнень и мярьгсть: «Койть коряс ня ярмакнень аш кода путомс Шкаень кудть ярмаконзон ёткс, сяс мес инксост валфоль вер».7Синь корхтасть эсь ётковаст и састь мяльс рамамс ня ярмакнень лангс сяканянь тиендить паксянц лия масторонь ломаттнень калмама вастонди.8Сяс и тячити самс ся вастсь лемневи Веронь Паксякс.9Тяфта пяшкодевсть Иеремия пророкть вельде азф валхне:
«Синь сявозь сиянь колмогемонь ярмакть
– питнеть, конань путозь Сонь инксонза Израилень ломаттне,
10и рамазь лангозост сяканянь тиендить паксянц,
кода кошардомань Азорсь».

Иисус Пилатонь инголе

(Марк 15:2-5; Лук. 23:3-5; Иоанн 18:33-38)

11Иисус ащесь Пилат Римонь оцюнять инголе и ся кизефнесь эсонза: «Тон еврейхнень Оцязорснат?» «Тя тон тяфта корхтат», – мярьгсь каршезонза Иисус.12А мзярда озксвятиень оцюнятне и ломаньтналонь оцюнятне муворгофнезь Сонь, Сон каршезост мезевок изь корхта.13Эста Тейнза корхтай Пилат: «Дяряй Тон аф кульсак, мзяра муворгофнема лангозт таргасть?»14Но Иисус каршезонза фкявок вал ашезь аза, мезсь пяк дивандафтозе Пилатонь.

Иисусонь куломас судендамац

(Марк 15:6-15; Лук. 23:13-25; Иоанн 18:39-19:16)

15Римонь оцюнять ульсь коец Очижинь иласта нолнемс пякстафнень эзда фкять, сянь, кинь кочксезь ломаттне.16Ся пингть нинге пякстафоль сембонди содаф Вараввась.17Мзярда ломаттне пуромсть, Пилат кизефтезень синь: «Кинь ёратада кядьстон нолдафтомс: Вараввань али Иисусть, кона лемневи Христоскс?»18Вдь Пилат содазе: Иисусонь максозь сонь кядезонза сельмонь каямать инкса.

19Мзярда Пилат озафоль судендама вастозонза, сонь рьвац кучсь тейнза вал: «Мезевок тят тие тя Видексшинь Ломанти, сяс мес тячи онстон мон лама сталма кирдень Сонь инксонза».20Но озксвятиень оцюнятне и ломаньтналонь оцюнятне корхтазь ломаттнень нолдафтфтомс Вараввать, а Иисусонь максфтомс шавомс.21Пилат оцюнясь кизефтезень синь: «Кинь ня кафттнень эзда тинь мяленте нолдафтомс кядьстон?» «Вараввать!» – ювадсть ломаттне.22Пилат корхтай тейст: «А мезе тейне тиемс Иисусть мархта, кона лемневи Христоскс?» Сембе каршезонза ювадсть: «Эськотьк Сонь крёзти!»23Пилат кизефнесыне: «Мезень кальдяв Сон тись?» Ломаттне нинге сядонга пешкодсть: «Эськотьк Сонь крёзти!»

24Пилат няйсы: мезевок тейнза аф тиеви, аньцек сядонга пяк кепси ломанень кяжсь. Сон кантфтсь ведь, ломаттнень ингольде штазень кядензон и мярьгсь: «Мон аф муворуван тя Видексшинь Ломанть куломаса. Ваность тинць».25Сембе ювадсть каршезонза: «Катк Сонь вероц ули минь лангсонк и минь шабаньконь лангса!»26Эста Пилат нолдазе тейст Вараввань, а Иисусонь мярьгсь пикссемс и эськодемс крёз лангс.

Ушматтне пеетькшнихть Иисусонь лангса

(Марк 15:16-20; Иоанн 19:2,3)

27Тяда меле Пилатонь ушманонза вятезь Иисусонь оцюнять кудс и пуроптозь перьфканза сембе ушман ялгаснон.28Синь каяфтозь лангстонза щамонзон и щафтсть шобдаза-якстерь тюсса щам.29Сяльде кодасть сялги тишеста каштаз, щафтозь прязонза, а види кядезонза макссть нюдинь байдек и ушедсть лангсонза пеетькшнема. Прашендсть инголенза плманжа лангс и рахсезь корхтасть: «Ульхть шумбра, еврейхнень Оцязорсна!»30Синь сельгондсть лангозонза, сявозь кядьстонза байдекть и пикссезь Сонь пря ланга.31Мзярда топодемс рахсесть лангсонза, синь каяфтозь лангстонза якстерь щамть, щафтозь меки Сонцень щамонзон и сявозь крёз лангс эськодемс.

Иисусонь крёз лангс эськодемац

(Марк 15:21-32; Лук. 23:26-43; Иоанн 19:17-27)

32Ошста лисемста синь васьфтсть Киринеянь ломань, конань лемоцоль Симон. Синь кошардозь сонь кандомс Иисусонь крёзонц.33Мзярда синь састь ся вастти, конань лемнезь Голгофакс, лиякс мярьгомс, Пряпакарь вастокс,34синь макссть Иисусонди симомс сяпе мархта шоряф винада. Сон варжазе и ашезь карма симома.

35Иисусонь крёз лангс эськодемада меле ушматтне каясть жерьба и вельденза явозь эсь ётковаст щамонзон,36и озасть ванфтомонза.37Прянц вельхксс повфтасть сёрматфкс, коса азфоль мезьса Сон мувору: «Тя Иисус, Еврейхнень Оцязорсна».38Иисусонь мархта крёз лангс эськотьфтольхть кафта салайхть-шавихть, фкясь види кядь, омбоцесь кержи кядь ширезонза.

39Вакска ётайхне сялдозь Иисусонь и прянь шуказь корхтасть:40«Эх, Шкаень кудонь срафты и колма шиста меки тии! Идек Эсь пряцень. Кда Тон Шкайть Цёрацат, валк крёзть лангста!»41Тяконь лаца Иисусонь лангса рахсесть озксвятиень оцюнятне, койти тонафтыхне, ломаньтналонь оцюнятне и фарисейхне. Синь корхтасть:42«Лиятнень идекшнезень, а Эсь пряц аф идеви! Кда Сон Израилень Оцязорсь, катк тяни валги крёзть лангста и эста минь Тейнза кематама.43Сон надиясь Шкайть лангс, катк Шкайсь Сонь и идесы, кда Тейнза Сон эряви. Вдь Сон лемнезе Эсь прянц Шкаень Цёракс».44Тяконь лаца Сонь сялдозь салайхне-шавихневок, конат эськотьфтольхть мархтонза крёз лангс.

Иисусонь куломац

(Марк 15:33-41; Лук. 23:44-49; Иоанн 19:28-30)

45Котоце частста сявомок вейхксоце частти молемс сембе масторть вельхтязе шобдась.46Вейхксоце частть малава Иисус кайгиста ювадсь: «Или́, Или́! Лама́ савахфани́?» – кона шарьхкодеви: «Шкаезе, Шкаезе! Мес Тон кадомайть Монь?»47Тянь кулемста тоса ащихнень эзда кой-конат мярьгсть: «Сон Илиянь тернесы».48Эстокиге фкясь эздост ласьксь, сявсь ведьбангоняд, начфтозе шапама винаса, ашкодозе байдек пес и ёразе симдемс Иисусонь.49Лядыхне корхтасть: «Ожу, ванцаськ, сай али аф Илиясь идемонза!»50Иисус тага кайгиста пешкодсь, и ваймоц лиссь.

51Эстокиге Шкаень кудса котфонь перяфкссь сязевсь кафтова, вярде алу; шерьхкозевсь модась и лазовсть кевбанттне.52Панжевсть калмотне; ламоц иняру ломаттнень ронгсна вельмасть53и лиссть калмоста. Иисусть вельмамдонза меле, тусть иняру ошу, коса синь няезь лама ломань.

54Мзярда сядонь оцюнясь и сят, кит мархтонза ванфтозь Иисусонь, няезь модать шерьхкоманц и сембонь, мезе лиссь, синь пяк эводсть и мярьгсть: «Тя Ломанць афкукс ульсь Шкайть Цёрац!»

55Тоса тяфта жа ульсть ламоц аватне, конат мольсть Иисусонь мельге Галилеяста самстонза и лезнесть Тейнза. Синь ванцть семботь лангс ичкозде.56Ётксост ульсть Магдаласта Мария, Иаковонь и Иосиень Мария тядясна и Зеведеень цёранзон тядясна.

Иисусонь калмамац

(Марк 15:42-47; Лук. 23:50-56; Иоанн 19:38-42)

57Илять сась Иосиф, Аримафея ошень козя ломань. Сонга ульсь Иисусонь тонафниец.58Сон мольсь Пилатонди и аназе Иисусонь ловажанц. Эста Пилат мярьгсь максомс.59Иосиф сявозе ловажать, ашкодозе ару иляназонь котфс60и калмазе сонь эсь од калмозонза, конань аф кунара шувфтозе кевбандс. Калмос сувама вастти сон веляфтсь оцю кев и тусь.61Тоса ульсь Магдаласта Мария и омбоце Мариясь. Синь озафтольхть калмоть каршеса.

Пилат максы ванфтыхть Иисусонь калмонцты

62Омбоце шиня, ваймамань шиста, Пилатонди састь озксвятиень оцюнятне и фарисейхне63и мярьгсть: «Азор! Минь лятфтаськ, кода тя васькафнись нинге шиса улемстонза мярьгсь: "Колма шида меле Мон вельман".64Сяс мярьк ванфтомс калмоть колмоце шить самс, афток сайхть веть Сонь тонафниенза и саласазь ловажать, и сяльде кармайхть корхтама ломаттненди: "Сон вельмась кулофста". И мекольце васькафнемась ули сядонга кальдявкс васенцеть коряс».65Пилат корхтай тейст: «Вага тейнть ванфтыхть. Арда и ванфтость калмоть стане цебярьста, кода машттада».66Синь мольсть, путсть кевть лангс тяштькс, и кадсть калмоть ваксса ванфтыхть.


*а 27:2 Понтий Пилат ся пингоня ульсь путф Римть эзда оцюнякс Иудеяса.

*б 27:9-10 Захария 11:12-13

*в 27:27 ушман – воин, солдат

*г 27:29 каштаз – венец

*д 27:48 ведьбангоня – губка

*е 27:51 котфонь перяфкс – тяса: эчке котф, конань мархта Шкаень кудса явфневсь иняруда-иняру вастсь; завеса.

*ж 27:53 Иняру ошсь – тя Иерусалимсь.


предыдущая глава Глава 27 следующая глава