Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 6

Ломанень Цёрась ваймамань шить лангса азор

(Матф. 12:1-8; Марк 2:23-28)

1Весть ваймамань шиня Иисусти савсь ётамс сёронь паксява. Тонафниенза сязендсть сёрапрят, мямордазь коморсост и ярхцасть.2Фарисейхнень эзда финцне мярьгсть тейст: «Мезенди тинь тиендьсасть сянь, мезе аф мярьгондеви тиендемс ваймамань шиня?»3Иисус каршезост мярьгсь: «Дяряй тинь ашесть лувонда, мезе тись Давид, мзярда вачсь сонцень пекоц и мархтонзотнень?4Сон сувась Шкаень куду и сявозень Шкайти кантф кшитнень, конатнень эзда, озксвятида башка, киндинге ашезь мярьгондев ярхцамс. Сон сонцьке ярхцась, ялганзонга андозень».5Иисус поладозе: «Ломанень Цёрась ваймамань шить лангсонга азор».

Иисус пчкафты ваймамань шиня

(Матф. 12:9-14; Марк 3:1-6)

6Омбоце ваймамань шитьке Иисус сувась синагогав и тонафтсь. Тоса ульсь фкя аля, конань види кядец коськоль.7Койти тонафтыхне и фарисейхне вешендсть туфтал муворгофтомс Иисусонь, сяс синь ванцть мельганза: кармай али аф пчкафтома ваймамань шиня.8Но Иисус содазень синь арьсемаснон, и мярьгсь коське кядь ломанти: «Стяк и арак сей, кучкати». Ся стясь и арась.9Эста Иисус мярьгсь тейст: «Мон кизефнетядязь тинь: мезе мярьгондеви тиемс ваймамань шиня, цебярь али кальдяв? Идемс эряфть али юмафтомс?» Синь кашт исть моле.10Сон ётафтозе ванфонц сембонь ланга, сяльде мярьгсь ся ломанти: «Венептьк кядцень». Ся тись стане; и сонь кядец пчкясь.11Койти тонафтыхне и фарисейхне тянь няемста лиссть эсьстост кяжть эзда. Синь кармасть эсь ётковаст латцемонза, мезе тиемс Иисусонь мархта.

Кемгафтува апостолхне

(Матф. 10:1-4; Марк 3:13-19)

12Ся шитнень Иисус куцсь панда лангс озондома, и ётафтозе марнек веть озондозь Шкайти.13Мзярда варьхмодсь, тердезень тонафниензон и кочкась ёткстост кемгафтува, конатнень лемдезень апостолкс, нят:14Симон, конанди путсь Пётр лем, Андрей – Симононь брадоц,15Иаков, Иоанн, Филипп, Варфоломей, Матфей, Фома, Алфеень цёрац – Иаков, Симон, конань лемнезь нинге Зилотокс,16Иаковонь цёрац – Иуда, и Иуда Искариот, кона меколи мисы Иисусонь.

Иисус тонафты и пчкафты ломатть

(Матф. 4:23-25)

17Иисус валгсь синь мархтост пандста и лоткась арся вастс. Тоза пуромфоль лама лия тонафнидонза, и пяк лама ломаньда, конат састь Иудеяста, Иерусалимста, Тир и Сидон ошнень оцюведь трвань аймакснон эзда.18Синь састь кулхцондомонза и урмаснон пчкафтома. Сашендсть аф ару ваймопожфонь колафневок, синьге пчксесть.19Сембе ломаттне ёрасть токафтомс кядьснон Иисусти, сяс мес Соньцтонза мольсь вий, кона пчкафнезень сембонь.

Кие павазу?

(Матф. 5:1-12)

20Сон варжакстсь тонафниензон лангс и кармась корхтама:
«Павазуфтада тинь, ашуфне,
сяс мес тинь Шкаень Оцязорксшить алотада.
21Павазуфтада тинь, тяни вачедотне,
сяс мес топоттяда.
Павазуфтада тинь, тяни авардихне,
сяс мес кенярттяда и рахатада.

22Павазуфтада тинь, мзярда Ломанень Цёрать инкса ломаттне афоледязь няе, паттядязь эсь ёткстост, сялттядязь и лувсазь лемонтеньге нильготьксокс.23Кенярдеда ся шиня и комотнеда кенярдемада, сяс мес сембонь тянь инкса тейнть ули пяк оцю казне менельса. Вдь прокс тяфта тиендсть пророкнень мархта ня ломаттнень алясна.24
Но кальдяв тейнть, козят,
вдь тинь ни сявость эсь кенярдемантень.
25Кальдяв тейнть, тяни вельф топоцьтот,
вдь тинь вачтада.
Кальдяв тейнть, тяни рахайхть,
вдь тинь карматада авардема и явсема.

26Кальдяв тейнть, мзярда сембе ломаттне кармайхть колгант цебярьста корхтама: стане тиендсть синь алясна аф афкуксонь пророкнень мархта».

Кельгость аф кельгиентень

(Матф. 5:38-48, 7:12)

27«Но тейнть, кулхцондыхненди, корхтан: кельгость душманонтень, тиендеда цебярь аф кельгиентенди.28Бславакшнесть сюдыентень и озондода сялдыентень инкса.29Кие эрьхттянза фкя щёкати, ладяк тейнза омбоцетьке; кие нельгсы лангстот вярдень щамцень, тят шорсе тейнза сявомс панарценьге.30Кядьстот эрь анайти макст, кие сявсь кядьстот, тяк ана меки.31Тиендеда ломаттнень мархта стане, кода мяленте синь тиендельхть мархтонт.

32Кельгондярясасть тинцень кельгиентень, кодама шнама тейнть тянкса? Вдь пежуфневок эсь кельгиснон кельгсазь.33Тиендярятада пара ся ломаттненди, конат тейнтьке тиендихть пара, кодама шнама тейнть тянкса? Вдь пежуфневок тяфта тиендихть.34Максондярятада пандомда сятненди, кинь кядьста надиятада сявомс меки, кодама шнама тейнть тянкса? Пежуфневок макссихть фкя-фкянди пандомда, содасазь, сяльде максови тейст меки тняра.35Но тинь кельгость душманонтень и тиендеда цебярь; эрти, кие анай кядьстонт пандомда, максода и тяда учсе меки пандома. Эста тейнть ули оцю казне, и тинь ульхтяда Инь Вярденнети идькс, сяс мес Сон цебярь аф пандыхнендинге, кяжихнендинге.36Уледа тиньге кельгозь ужяльдикс, кода кельгозь ужяльди тинь Алянте».

Тяда суденда

(Матф. 7:1-5)

37«Тяда суденда, и тиньге аф ульхтяда судендафт; тяда муворгофне киньге, тиньге аф ульхтяда муворгофтфт; ноляда ломанень шумот, тиньге шумонте нолдави.38Максседа, тейнтьке максови: цебярь ункстамаса, конань шерьфтьсазь, матрасазь и марасазь пряда вельф, и каясазь элезонт; сяс мес кодама ункстамаса тинць ункстатада, стамса ункстави тейнтьке».

39Иисус азондсь тейст нинге валвеляфкс:

«Вятневи али аф сокорти сокорсь? Кали аф кафцьке прайхть лоткс?40Тонафнись аф уленди тонафтыдонза оцю; ина эрсь, тонафнеманц аделамда меле, ули тонафтыенц лаца.

41Кода тон няйсак сардть кемай ялгацень сельмоса, но аф няйсак шочкть эсь сельмосот?42Ина кода мярьгат кемай ялгацти: "Ялгай! Эрька, таргаса сельмостот сардть", мзярда эсь сельмосот шочкть аф няйсак? Шамафксонь канни! Васенда таргак эсь сельмостот шочкть, эста няйсак, кода таргамс кемай ялгацень сельмоста сардть».

Шуфтсь содави иможензон коряс

(Матф. 7:17-20, 12:34,35)

43«Аш цебярь шуфта, кона кандоль кальдяв имож; и, меколанкт, аш кальдяв шуфта, кона кандоль цебярь имож.44Эрь шуфтсь содави иможензон коряс; аф кочксихть кумбаравста инжир, и аф кочксихть сялги тишеста виноград.45Цебярь ломанць эсь седиенц козяшиста лихти цебярь, а кяжи ломанць эсь седиенц козяшиста лихти кяж; вдь мезьда пяшксе ломанть седиец, ся и лиси кургстонза».

Валвеляфкс кафта кудонь путыхнень колга

(Матф. 7:24-27)

46«Мес тинь лемнесамасть Монь: "Азор! Азор!" и аф тиендьсасть, мезьс кошярятядязь?47Азса тейнть, кинь лангс шары эрсь, кие сашенды Тейне, кулхцондсыне валнень и тии коряваст:48сон шары кудонь путы ломаненди, кона шувсь крхка лотка и путсь кев лангс кудъюр. Мзярда кеподсь шадось и ведсь эрьхтсь ся кудть лангс, сон ашезь шерьфтев, сяс мес лац путфоль.49А кие кулхцондсыне валнень и коряваст аф тии – шары стама ломаненди, кона путсь модать лангс юрфтома куд. Мзярда лангозонза эрьхтсь ведь, сон эстокиге каладсь; и каладсь педа-пес».


*а 6:15 зилот – патриот, националист; шачема масторть и евреень кемамань койть инкса ащи

*б 6:17 арся васта (мода) – равнина


предыдущая глава Глава 6 следующая глава