Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙХНЕНДИ СЁРМАСЬ

Глава 8

Од Сотксонь Озксвятиень оцюнясь

1Минь азфоньконь эзда инь оцюсь тя: минь ули тяфтама Озксвятиень оцюняньке, кона озась менельса инь оцю Шкайть оцязоронь озама вастонц види ширесонза.2Сон покоди Озксвятиень оцюнякс иняру вастса, афкуксонь иняру кошса, конань стяфтозе Шкайсь, а аф ломанць.3Эрь озксвятиень оцюнясь путневи казнень и озксказнень каннема; сяс тянь лаца миньге Озксвятиень оцюняньконди эряволь мезевок кандомс озксказнекс.4Кда Сон илядоль модать лангса, эста Сон афоль уле кодамовок озксвятикс, сяс мес тяса ни улихть ломатть, конат койть коряс каннихть Шкайти казнет.5Синь покодемасна иняру кошса – аньцек кепотькс и цильф менеленнеть эзда. Вдь Моисеенди, мзярда Сон ушедозе иняру кошть тиеманц, азфоль: «Ватт, семботь тик ся кепотьксть коряс, кона няфтьфоль тейть панда пряса».6Но Иисусти максф покодемась сяда оцю мода лангонь озксвятихнень покодемаснон коряс. Тяконь лаца сяда цебярь ся соткссь, конаса Иисус тевонь якафты Шкайть и ломаттнень ёткса, сяс мес сонь юрозонза путфт Шкайть сяда цебярь надияфтоманза.

7Улендяряль васенце соткссь афсатыксфтома, эста вастозонза афоль эряв вешендемс лия.8Но Шкайсь корхтай Эсь ломаньтналонцты муворшиснон няфтезь:
«Кулхцондода, сайхть шит, – корхтай Шкайсь,
– мзярда Мон тиян од соткс
Израилень и Иудань ломаттнень мархта.
9Тя соткссь ули аф стама,
кодама сон ульсь тинь алянтень мархта ся пингть,
мзярда Мон сявине синь кядьта и лихтине Египетонь масторста.
Вдь синь ашезь кирде Монь мархтон сотксть,
и тянкса Мон шарфтонь эздост, – корхтай Азорсь.
10Вага соткссь, конань тиса Израилень ломаттнень мархта
тона шитнень меле, – корхтай Азорсь,
– Мон путсайне Эсь койнень синь мялезост
и сёрмадсайне синь седиезост;
и карман улема тейст Шкайкс,
а синь улихть Тейне ломаньтналкс.
11И эста кивок аф кармай тонафтома эсь маластонц
и эсь брадонц тяфтама валса: "Маласта содак Азорть"
– сяс мес сембе, ёмланек-оцюнек, кармайхть содамон Монь.
12Вдь Мон кельгозь ужяльдьсайне синь,
нолдасайне синь аф видешиснон
и аф лятфтасайне оду синь пежеснон и койфтома тевснон».

13Мзярда Сон корхтай «од соткс», тяфта няфнесы васенце сотксть таштомоманц. Ся, мезсь эрязе эсь пингонц и таштомсь, курок юмай.


*а 8:2 кош – скиния, шатёр, палатка; иняру кош – тя стама кош, конань потмоса Израилень ломаньтналсь озонкшнесь Шкайти и каннесь Тейнза озксказнет. Синь каннезь тя кошть мархтост эрь вастова, мзярс якасть-шяясть шавмодава.

*б 8:8-12 Иеремия 31:31-34


предыдущая глава Глава 8 следующая глава