Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 28

Павел Мелитса

1Идевомда меле, сят, кит ульсть Павелонь мархта, содазь: усиять лемоц Мелит.2Тостонь эряйхне пара мяльса и седишкава васьфтемазь минь. Синь крьвястсть оцю толмар и тердемазь ваксозонза эжема, сяс мес мольсь пизем и ушеса пяк кельмоль.3Павел кочкась кядьнучке тарад и кармась ёрямост толти, тя ёткть тараттнень ёткста лиссь равжа пря куй и, араламок псида пря, пезфтась Павелонь кядьс.4Мзярда тостонь эряйхне няезь Павелонь кядьса нюрьги равжа пря куйть, кармасть корхтама фкя-фкянди: «Тя алясь, улема, ломанень шави! Няк, идевсь оцюведьса юмамада, но кяжень пантфты шкайавась аф ёрай кадомдонза шиса».5Но Павел шукадезе равжа пря куйть толти и куйть пупаманц эзда тейнза ашезь ара кодамовок кяльдяв.6Сембе учендсть сонь кядец таргози али сон прай тяниёк кулофста. Куватьс учсемада меле синь няезь, Павелонь мархта кодамовок кальдяв аф лисенди, сяс полафтозь колганза мяльснон и кармасть корхтама: сон шкай.

7Аф ичкозе ся вастть эзда ульсть Публиень, усиянь васенце ломанть, кудонза-паксянза. Сон пара мяльса сявомазь эсь пялонза и колма шит минь инжиендаме тоса.8Публиень аляц васта лангсоль, сяс мес сон сярядсь псиурмаса и пекурмаса. Павел сувась ширезонза, путомок лангозонза кядензон, озондсь и пчкафтозе сонь.9Тяда меле усиянь лия ломаттневок, кит сярядсть, сашендсть Павелонди, и сон пчкафнезень синь.10Синь кода маштсть, стане няфтезь тейнек эсь пара мяльснон, кандсть лама казне и, мзярда минь срхкаме кис, синь максозь мархтонк сембе эрявиксть.

Павел пачкоди Риму

11Колма ковонь ётазь минь туме Александриянь «Диоскуры» лемса оцю венчса, кона ётафнезе тялоть тя усияса.12Пачкодеме Сиракузы ошу, тоса ащеме колма шит.13Тоста минь пачкодеме Ригия ошу, а шида меле уфазевсь лямбе ширдень варма, тяфта минь омбоце шиня ни улеме Путеол ошса.14Тоса минь васедеме кемай ялгатнень мархта, конат эняльдсть тейнек лядомс ширесост недялянди. Тоста минь туме ялга Риму.

15Римста кемай ялгатне, кодак кульсть саманьконь колга, лиссть каршезонк. Финцне васьфтемазь Аппиень мишендема-рамсема вастть ваксса, омбонцне Колма Инжиень Куттнень ваксса. Синь няемстост Павел сюконясь Шкайти и сонь ваймопожфоц эреклась.

16Мзярда минь пачкодеме Риму, сядонь оцюнясь максозень пякстафнень Римонь ушмовятить кядялу. Павел нолдафоль эрямс башка кудса мельганза ваны ушман мархта.

Павел Римса

17Колма шида меле Павел серьгядезень эсь ширезонза тостоконь еврейхнень оцюняснон, и кодак сят састь, сон мярьгсь тейст: «Ялгане! Хуш мон мезевок ашень тие ломаньтналоньконь али аляньконь койснон каршес, сембе сяка монь кундамазь Иерусалимса и максомазь римоннетнень кядьс.18Синь кизефнемазь монь и ёрамазь нолдамс, вдь кодамонга муворши, мезенкса максоволень куломас, монь мельган ашезь мув.19Еврейхне ульсть пяк тянь каршес, и тейне савсь анамс кесарень суд, но ёфси аф ломаньтналозень муворгофтоманкса.20Вов мес мон серьгядедязь тинь, мялезе няемс тинь и корхтамс мархтонт. Вдь мон каннесайне ня цинзерхнень ся надиямать инкса, конаса эряй Израилень ломаньтналсь».21Сят каршезонза мярьгсть: «Тейнек ашезь са Иудеяста тонь кувалмат кодамовок сёрма, и кивок тоста сафнень эзда ашезь канда кодамовок куля и ашезь аза колгат мезеньге кальдяв.22Но минь мяленьколь эздот содамс, мезе тонць арьсят, сяс мес минь кулендеме, кле, сембе вастова молихть тя сектать каршес».

23Синь корхтасть Павелонь мархта, и ладяф шиня нинге сяда лама еврей пуромсь кудти, коса сон эрясь. Сенем валдонястокиге илядти самс Павел корхнесь мархтост, панчсезе Сёрматфксть смузенц, и сявомок Моисеень койста и пророкста няфнесь-азондсь тейст Шкаень Оцязорксшить колга. Тянь вельде сон ёрась вятемс синь Иисусти кемамати.24Финцнень кемафтозь сонь валонза, а омбонцне исть кема.25Эсь ётковаст марстонь кялень апак мук, синь кармасть тушендома. Павел мярьгсь тейст: «Лац азозе Иняру Ваймопожфсь минь атянь-атяньконди Исаия пророкть вельде:26
"Архт ся ломаньтналти и азк:
Тинь пилеса кульсасть и аф шарьхкодьсасть;
тинь сельмоса карматада ванома и аф няйсасть.
27Сяс мес калготкстомсть ня ломаттнень седисна,
стакаста кулихть синь пилесна
и сёлговсть синь сельмосна вага мезенкса:
афольхть няе синь сельмосна, афольхть куле синь пилесна,
афоль шарьхкоде синь седисна, афольхть шарфта Тейне
и афолине пчкафта синь".

28Сяс улеза содаф тейнть: Шкаень идемать колга кулясь кучф ни лия ломаньтналхненди и синь кульсазь сонь».29Мзярда Павел азозе тянь, еврейхне, эсь ётковаст пялькстазь, тусть.

30Павел эрясь мянь кафта кизот сивотьф кудса и васьфнезень пялонза сембонь, кит сашендсть тейнза.31Сон мезьдонга аф пелезь и перяфксонь аф содазь азондсь Шкаень Оцязорксшить колга и тонафтсь Иисус Христос Азорть колга.


*а 28:3 равжа пря куй – гадюка, ехидна

*б 28:16 ушмовяти – военачальник

*в 28:26-27 Исаия 6:9-10


предыдущая глава Глава 28 следующая глава