Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПЁТОРОНЬ ВАСЕНЦЕ СЁРМАЦ

Глава 4

Шкайть мархта од эряф

1Кода Христоссь кирдсь ронгонь маятамат, стане тиньге уледа анокт тянди, вдь ся, кие кирди маятамат эсь ронгонц лангса, лоткай пежень тиендемда.2И сяс лядыкс масторлангонь эряфонц сон ётафтсы аф ломанень визькс мяльхнень-арьсематнень коряс, а Шкайть мяленц коряс.3Ингольдень пингть тинь ни сатомшка эряде, кода Шкаень аф содай ломатть: тинь макссесть прянтень эрь кодама аф арушис, визькс мяльхненди (алятне аля мархта удомас, жувата мархта удомас, рдазу мяльс-арьсемас), тинь уледе симилакс, пекта вельф тетькикс и сюконякшнеде аф афкуксонь шкайхненди.4Сяс тяни, мзярда тинь оду аф тиенттяда Шкаень аф содайхнень мархта визьксонь тефт, синь дивандакшнихть тянди и сялдыхть эсонт кальдяв валса.5Но тейст сави панжемс эсь тевснон Сянь инголе, кие анок судендамс эряйхнень и кулофнень.6Сяс Пара кулясь пачфтьфоль кулофнендивок вага мес: эряльхть синь Шкайть мяленц коряс ваймопожфса, хуш синь ронгсна, кода лия ломаттнень ронгсновок, судендафтольхть куломас.

7Курок семботи сай пе. Сяс уледа смузю мяльса и валда пряса, и эста ульхтяда анокт озондомати.8Васенда, седи ваксста кельгода фкя-фкянь, сяс мес кельгомась вельхтяй лама пеже.9Уледа инжиень кельгикс, и тяда кропця лангозост.10Катк эрсь тинь эздонт покоди-лезды фкя-фкянди ся казнеса, конань тейнза максозе Шкайсь. Эста тинь, кода цебярь покодихне, видеста нолдасасть тевс Шкайть эрь кодама пароказненц.11Кда кие корхтай, катк сянь валонза кайгихть кода Шкайть валонза. Кда кие покоди-лезды, ся катк покоди-лезды ся вийса, конань тейнза макссесы Шкайсь. Катк сембонь тянь эса шнави Шкайсь Иисус Христость вельде. Тейнза шнама и азорксши сембе пингс! Аминь.

Маятамат Христости кемамать инкса

12Монь кельгомне, тяда диванда, мес тейнть сави ётамс толонь варчсематнень пачк; тянь эса аш мезевок дивандафты.13Меколанкт, кеняртькшнеда, мес тиньге явсасть Христость мархта марса Сонь маятаманзон. И мзярда панжеви Сонь иневалдоц, эста тинь карматада кеняртькшнема оцю кенярдемаса.14Кда тинь сялттядязь Христость лемонц инкса, эста тинь павазуфтада, сяс мес Иневалдонь Ваймопожфсь, лиякс мярьгомс, Шкайть Ваймопожфоц ащи тинь вельхксонт. Сят Сонь сялдсазь, а тинь Сонь шнасасть.15Кда кие тинь эздонт кирди маятамат эсь лангсонза, катк тя ули аф сянкса, мес сон ломанень шави али салай, али нинге кодама кальдяв тевонь тии, али кода ся, кие эсь шалхконц эцекшнесы лиянь тевс.16А кда кивок эздонт кирди маятамат сяс, мес сон христианин, ся катк тянкса аф визди, а шнасы Шкайть сянкса, мес тейнза максф каннемс тя лемть.

17Шкаень судть пингоц сась ни, и васенцекс судендавихть Сонь ломаненза. Арьседова, кда минь эздонк ушеды судендамась, эста кодама пе сатсыне сятнень, конат аф кулхцондсазь Шкайть Пара кулянц?18Кода сёрматф:
«Кда видексшинь ломанти ули стака идевомс,
сяльде мезе ули пежуфнень мархта и сятнень мархта,
конат мезькска аф лувсазь Шкайть?»

19Сяс сят, конат кирдихть маятамат Шкайть мяленц коряс, катк макссазь эсь пряснон Тииеньконь кядьс, и сяда товга аф лотксихть пара тевонь тиендемс.


*а 4:18 Притчи 11:31


предыдущая глава Глава 4 следующая глава