Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 18

Валвеляфкс кядень аф нолдай удавать колга

1Иисус азондсь тонафнихненди валвеляфкс, конань вельде ёрась няфтемс тейст, кода эряви най озондомс и аф прашендомс пичефксс:2«Фкя ошса ульсь судья, кона Шкайда ашезь пеле, ломаньда ашезь визде.3Сяка ошса эрясь удава, кона сидеста якась судьяти и корхнесь: "Лезтт тейне мумс видешить, араламак лангозон молида".4Аньцек судьясь ламос ашезь ёра тянь тиемс. Сяльде мярьгсь эстейнза: "Хуш мон Шкайдонга аф пелян, ломаньдонга аф виздян,5но тя удавась ваймамска ётка аф максы, араласа, лотказа сашендомда и машнефтемдон"».

6Азорсь мярьгсь: «Кульсасть, мезе корхтай аф виде судьясь?7Кали Шкайсь аф араласыне Эсь кочкафонзон, Тейнза шинек-венек эняльдихнень? Кали Сон аф эряскоды араламост?8Азондса тейнть: Сон лезды Эсь кочкафонзонды и курок! Но Ломанень Цёрась мрдамстонза муй кемама модать лангса?»

Валвеляфкс фарисейть и каяфксонь кочкайть колга

9Сятненди, кит лувондозь пряснон видексшиса эряй ломанькс, а лиятнень мезькска ашезь путне, Иисус азондсь тяфтама валвеляфкс:

10«Кафта ломатть сувасть Шкаень куду озондома: фкясь фарисей, омбоцесь каяфксонь кочкай.11Фарисейсь арась и озондсь эсь пачканза тяфта: "Шкай! Сюконян Тейть, мес мон аф стаман, кодапт лия ломаттне, салайхне-нельгихне, кяжень тиихне, усксевихне, али вов кода тя каяфксонь кочкайсь.12Поставан недяляти кафксть, макссеса кемонце пяльксть сембостон, мезе сатнян".13А каяфксонь кочкайсь ащесь ширеняса, нльне сельмонзонга пельсь кеподемс вяри; аньцек эрьхнезе мяштенц и корхтась: "Шкай! Ужяльдемак монь, пежу ломанть!"

14Азса тейнть, каяфксонь кочкайсь тусь кудозонза видексшинь ломанькс, но аф фарисейсь. Вдь эрсь, кие оцюлгофнесы эсь прянц, ёмлалгофтови, а кие ёмлалгофтсы эсь прянц, ся оцюлгофтови».

Иисус бславасыне иттнень

(Матф. 19:13-15; Марк 10:13-16)

15Иисусонди вятнесть-каннесть ёмла иднят – токафтолезе Сон тейст кяденц. Тонафниенза, тянь няезь, карнезь сашендомда.16Но Иисус серьгядезень малазонза иттнень, мярьгсь: «Катк иттне сашендыхть Тейне, тясть карне, сяс мес тяфтамста ащи Шкаень Оцязорксшись.17Видеста корхтан тейнть: кие идь лаца аф васьфтьсы Шкаень Оцязорксшить, ся аф сувави эзонза».

Козя оцюня

(Матф. 19:16-30; Марк 10:17-31)

18Оцюнятнень эзда фкясь кизефтезе Иисусонь: «Цебярь тонафты, мезе тейне тиемс пефтома эряфонь сатоманкса?»19Иисус мярьгсь тейнза: «Мес тон лемнесамак Монь цебярькс? Шкайда башка кивок аф цебярь.20Содасайть кошардомвалхнень: тят полафне пола, тят шавонда, тят сала, тят васькафне лиянь лангс, ванк аляцень и тядяцень мяльснон».21Сон мярьгсь: «Сембонь тянь пяшкотькшнеса одстокиге».22Тянь кулемста Иисус мярьгсь тейнза: «Нинге фкя аф сатни тейть, мик сембе уликс-пароцень и явк ашуфненди, и кармай улема козяшице менельса; сяльде сак и мольхть мельган».23Тянь кулемста оцюнясь пичедезевсь, сяс мес пяк козяль.

24Иисус няезе пичедеманц, мярьгсь: «Конашкава стака козятненди сувамс Шкаень Оцязорксшити!25Козя ломанти пяк стака сувамс Шкаень Оцязорксшити, сяда тёждя ишимти ётамс салмокс пиленява».

26Тянь кулиенза мярьгсть: «Кие эста идеви?»27Сон каршезост: «Мезе аф тиеви ломаттненди, ся тиеви Шкайти».

Иисусонь мельге молемать питнец

28Пётр мярьгсь: «Вов минь кадоськ семботь, мезеньке ульсь, и туме мельгат».29Иисус мярьгсь: «Видеста корхтан тейнть: эрсь, кие кадозе кудонц, али рьванц, али брадонзон, али тядянзон-алянзон, али идензон Шкаень Оцязорксшить инкса,30сянди тяниень пингть максови ламоксть сяда лама, а сай пингть – пефтома эряфсь».

Иисус тага азонды Эсь куломанц колга

(Матф. 20:17-19; Марк 10:32-34)

31Иисус сявозень ширеняв кемгафтува тонафниензон, мярьгсь тейст: «Вов, минь мольхтяма Иерусалиму, и тоса тиеви сембось, мезе сёрматф пророкнень вельде Ломанень Цёрать колга.32Сонь макссазь лия ломаньтналоннетнень кядьс, кармайхть пеедема лангсонза, сялдомонза, сельгондьсазь,33кармайхть пикссемонза и шавсазь; и колмоце шиня Сон вельмай кулофнень эзда».34Но тонафнихне азфть эзда мезевок ашесть шарьхкоде. Ня валхнень смузьсна кяшфоль эздост, синь ашезь шарьхкоде, мезень колга Иисус корхтай тейст.

Иисус пчкафтсы сокор анцить

(Матф. 20:29-34; Марк 10:46-52)

35Мзярда Иисус малаткшнесь Иерихонти, ки трваса озафоль сокор анци.36Сон кулезе: ваксканза ётай лама ломань, и кизефтсь: «Мезе тя тяфтамсь?»37Тейнза азозь: «Тя моли Назаретонь Иисуссь».38Эста сон кармась ювадема: «Иисус, Давидонь Цёрац, ужяльдемак монь!»39Инголе молихне карнезь юватькшнемда, аньцек сон сядонга кайгиста пешкодсь: «Давидонь Цёрац, ужяльдемак монь!»40Иисус лоткась и мярьгсь вятемс сонь малазонза. Мзярда сокорсь нежедсь Тейнза, Иисус кизефтезе сонь:41«Мезе мяльце тифтемс Монь кядьстон?» Ся мярьгсь: «Азор, тиемак меки няикс!»42Иисус мярьгсь тейнза: «Няйхть! Кемамаце пчкафтонзе тонь».43Сокорсь эстокиге кармась няема и, Шкаень шназь, тусь Иисусонь мельге. Сембе ломаттне, кит няезь тянь, азондсть Шкайти шнамань валхт.


*а 18:42 Тя валсь греконь кяльста нинге ётафневи кода: идензе.


предыдущая глава Глава 18 следующая глава