Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОСТОЛХНЕНЬ ТЕВСНА

Глава 25

Павел анай кесарень суд

1Фест, арамок оцюнякс тя аймакса, колма шида меле тусь Кесарияста Иерусалиму.2Озксвятиень оцюнясь и евреень инь содаф ломаттне макссть тейнза пеняцяма Павелонь лангс3и эняльдсть – тейст паронь тиеманкса – ётафтомс Павелонь Иерусалиму. Синь арьсесть ки кувалма шавомс сонь.4Но Фест мярьгсь каршезост: «Павел кирдеви пякстафста Кесарияса, ков курок монцьке молян.5Сяс, – поладозе Фест, – катк тинь вятиенте молихть мархтон и тоса няфтьсазь тя ломанть муворшинц, кда сон тись кодамовок зиян».

6Фест ащесь ётксост Иерусалимса аньцек кемоньшка ши, а сяльде тусь Кесарияв. Тоса омбоце шиня сон ни озась судендамань вастозонза и мярьгсь вятемда Павелонь.7Мзярда эвондась Павел, сонь перьфканза пуромсть Иерусалимста саф еврейхне, синь лихнесть каршезонза стака муворгофтомат пяк лама тевса, конатнень кемокстамс тейст ашель мезьса.8«Мон мезеньге зиян ашень тие аф евреень койть каршес, аф Шкаень кудть, аф кесарть», – аралась пря Павел.

9Фест ёрась таргамс эсь ширезонза еврейхнень, кизефтезе Павелонь: «Ули мяльце молемс Иерусалиму, коса мон судендалихтень сембе ня муворгофнематнень коряс?»10Павел каршезонза мярьгсь: «Мон ни ащан кесарть судонц инголе, коса и улезан судендаф. Мон ашень тие кодамонга зиян еврейхнень каршес, тянь тоньцке пяк лац содасак.11Кда мон муворуван мезьсовок, мезенкса мон максоман куломас, мон анокан куломс. Но кда синь муворгофтомасна аф виде, эста киндинге аф мярьгондеви максомс монь тейст. Мон анан кесарень суд!»12Фест семботь корхтазе-тиезе ёнень максыензон мархта, и меле пшкядсь: «Тон анат кесарень суд – кесарти и туят».

Фест азонды Агриппа оцязорти Павелонь тевонц колга

13Аф лама шида меле Кесарияв састь Агриппа оцязорсь и Вереника шумбрандафтомс Фестонь.14Сяс мес синь ащесть тоса лама ши, Фест азондсь оцязорти Павелонь тевонц колга: «Тяса ули фкя пякстаф, конань Феликс кадозе ваныень кядяла.15Мзярда мон улень Иерусалимса, евреень озксвятиень оцюнятне и ломаньтналонь оцюнятне макссть тейне пеняцяма лангозонза, вешихть судендамс сонь и максомс куломас.16Мон азыне тейст: римоннетне аф макссесазь муворгофтовить куломас, мзярс сон аф васеди шамада шамас муворгофтыхнень мархта и мзярс аф максови тейнза прянь араламань пинге и васта.17Мзярда синь састь тяза, мон, пингонь апак тарксек, омбоце шинякиге озань судьянь озамати и мярьгонь вятемс тя ломанть.18Муворгофтыенза стякшнесть и кармасть корхтама, но фкявок муворгофтомань туфталсна ашель, кодама мон учендонь.19Синь аньцек пялькстасть сонь мархтонза эсь кемамаснон и кати-кодама кулоф Иисусть инкса, конань колга Павел корхтась – Сон эряй.20Мон аф ламонь содаян тяфтама кизефксса, сяс мярьгонь тейнза: ули-аш мялец молемс Иерусалиму и тоса судса ванолезь тевонц?21Но сон вешсь эстейнза кесарень суд. И мон мярьгонь кирдемдонза сонь пякстафста, мзярс аф ильхтьса кесарти».22Агриппа мярьгсь Фестонди: «Моньге мялезе кулхцондомс тя ломанть». «Вандыёк кулхцондсак сонь», – пшкядсь каршезонза Фест.

Павел Агриппа оцязорть инголе

23Омбоце шиня Агриппа и Вереника састь тораматнень и кайгоматнень гайфса. Синь сувасть судонь пуромксти тёжянень оцюнятнень и ошень васень ломаттнень мархта. Фест мярьгсь вятемда Павелонь.24«Агриппа оцязорсь и сембе саф алятне! – азозе Фест. – Тинь няйсасть тя ломанть, конань кувалма сембе еврейхне, кода Иерусалимса, стане тясонга пшкятькшнесть мондейне и сембе синь ювадезь вешсть тейнза кулома.25Но мон сань мяльс, сон ашезь тие мезевок, мезенкса максоволь куломас. А сяс, мес сон сонць аназе кесарень судонц, мон срхкань ильхтемс сонь Август кесарти.26Но аш мезьс кундамска сонь колганза кесарезти сёрмадомста. Вов сяс вятине сонь тинь инголент, сембода пяк тонь инголет, Агриппа оцязор, ванолить тевонц и тяда меле мон содалине, мезе тяштемс.27Мон лувондса аф ёню тевкс ильхтемс пякстафть, а мезьса муворгофневи – аф азомс».


*а 25:13 Вереника ульсь Агриппа оцязорть сазороц.


предыдущая глава Глава 25 следующая глава