Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ КОРЯС ЕВАНГЕЛИЯ

Глава 3

Иисус и Никодим

1Фарисейхнень ёткса ульсь ломань, лемоцоль Никодим. Сон еврейхнень оцюняснон эзда фкясель.2И вов сон сась Иисусти веть и мярьгсь: «Равви! Минь содасаськ, Тон Шкайть эзда кучф тонафтыят. Вдь тяфтама тяштькст, кодапт Тон тиендят, киндинге аф тиевихть, аф улендяряй мархтонза Шкайсь».3Иисус каршезонза пшкядсь: «Видеста корхтан тейть: кие аф шачи одукс, вярде, сянди аф няеви Шкаень Оцязорксшись».4Никодим корхтай Тейнза: «Кода сиредембяльхть ломанць одукс шачи? Дяряй меки сувави тядянц потмос и оду шачеви?»

5Иисус азозе: «Видеста корхтан тейть: кие аф шачи ведьста и Ваймопожфть эзда, ся аф сувави Шкаень Оцязорксшити.6Ломаньцта шачфсь – ломань; Ваймопожфста шачфсь – ваймопожф.7Тят диванда сянди, мезе Мон мярьгонь тейть: тейнть шачема одукс, вярде.8Вармась уфай коза мялец, сувоманцка марясак, а аф содасак, коста сай и ков туй: тяфта уленди эрть мархта, кие шачсь Ваймопожфста».

9Никодим кизефтезе: «Кода тянди улема?»10Иисус тянь каршес мярьгсь: «Тон Израильть тонафтыецат, и тянь аф содасак?11Видеста корхтан тейть: минь корхтасаськ сянь, мезть содасаськ, и азондсаськ сянь, мезть няеськ; а тинь минь валоньконь аф путсасть седизонт.12Мон корхтань масторлангонь тефнень колга, и тинь аф кематада, – а кода ина кематада, кармандярян корхтама менельстонь тефнень колга?13Кивок ашезь куценде менели, аньцек менельста саф Ломанень Цёрась, менельса улись.

14И кода Моисей кеподезе куйть шавмодаса, тяфта ули кепотьф вяри Ломанень Цёраське, вага мезенди:15эрсь, кие кемай Тейнза, афоль юма-ара, а сатолезе пефтома пингонь эряфть.16Вдь Шкайсь сяшкава кельгозе масторлангть, нльне максозе фкя-тяка Цёранц, вага мезенди: афоль юма-ара Эзонза фкявок кемайсь, а сатолезе пефтома пингонь эряфть.

17Шкайсь кучезе Эсь Цёранц масторлангти аф судендамс масторлангть, а Эсь Цёранц вельде идемс сонь.18Тейнза кемайсь аф судендави, а аф кемайсь судендаф ни, сяс мес ашезь кема Шкаень фкя-тяка Цёрати.19Вов мезьса судендамась: валдсь сась масторть лангс; но ломаттненди сяда пяк кельговсь шобдась валдть коряс; сяс мес тевсна ульсть кяжихть.20Вдь эрь кяжи тевонь тиись пяк аф кельгсы валдть и аф моли валдти, сяс мес пели, няевихть кяжи тевонза.21А видешить коряс эряйсь моли валдти, няевоза: сонь тевонза тифт Шкайть мяленц коряс».

Иоанн Кстиндайсь азонды Иисусонь колга

22Тяда меле Иисус тусь тонафниензон мархта Иудея мастору. Сон тоза лоткась мархтост аф ламос и кстиндась ломатть.23Иоаннга кстиндась Енонса, Салимть маласа, сяс мес тоса ламоль ведьта; и ломаттне сашендсть тоза и кстиндафтсть пря.24Тя ульсь Иоаннонь пякстамгуду сёлгомда инголе.

25Иоаннонь тонафниенза эста пялькстасть еврейхнень мархта аруяфтомань койхнень колга.26Синь састь Иоаннонь ширес и мярьгсть тейнза: «Равви! Ся, кона ульсь мархтот Иорданть тона ширеса и конань колга тон азондоть, вага Сон кстиндай, и сембе молихть Тейнза».

27Иоанн мярьгсь каршезост: «Ломанти мезевок аф сявови эсь лангозонза, кда тейнза аф ули максф менельста.28Тинь тинць эсь пилесонт кулесть, мезе азонь: "Мон аф Христоссь, но мон кучфан Сонь инголенза".29Ся рьвяяйсь, кинь ули рьвяняц, а рьвяяйть ялгац, кона ащи вакссонза и кулхцондсы сонь, кенярдезь кенярди, марямок рьвяяйть вайгяленц. Монга тяфта кеняртькшнян, и тяни тя кенярдемась пяшкодезе марнек седиезень.30Тейнза касома, а тейне ёмлалгодома.

31Ся, кона сай вярде, ащи вяре сембонь лангса; а ся, кона масторлангста – масторлангонне, и корхтай масторлангонь тефнень колга. Ся, кона сай менельста, ащи вяре сембонь лангса.32Мезе Сон няйсь и марясь, сянь колга и азонды; и кивок ашезе пута седизонза Сонь азондоманц.33Кие путсы седизонза Сонь азондоманц, ся кемокстасы: Шкайсь корхтасы видеть.34Ся, конань кучезе Шкайсь, азонды Шкаень валхт; вдь Шкайсь макссесы Ваймопожфть апак ункснек.35Алясь кельгсы Цёранц и семботь путозе Сонь кядялонза.36Кие кемай Цёрати, сянь ули пефтома эряфоц; а Цёрати аф кулхцондысь аф няйсы эряфть, но Шкайть кяжец кадови сонь лангсонза».


*а 3:8 Греконь «пнеума» валть кафта смузенза: «варма» и «ваймопожф».


предыдущая глава Глава 3 следующая глава