Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ ГАЛАТИЯНЬ КЕМАЙХНЕНДИ

Глава 2

Павел васеди лия апостолхнень мархта

1Сяльде, кемнилие кизода меле, мон тага якань Иерусалиму Варнавань мархта. Мархтонк сявоськ Титоньге.2А молень сяс, мес тейне панжезе Шкайсь: эряви молемс тов. Тоса сятненди, конат лувовсть содавикс оцюнякс, мон башка васедемста азондыне ся Пара кулять, конань пачфнеса лия ломаньтналхненди. Мон тяфта тиень сянкса: стак афоль юма ингольдень и тяниень покодемазе.3И мезе? Синь Титоньге, кона ульсь монь мархтон, ашезь кошарда киськопень керфтома, хуш сон и грек.4А керфтомань кизефксть кеподезь аф афкуксонь кемайхне, конат салава эцесть минь ёткозонк. Синь яксесть-ванондсть минь мельганк и ся воляшить мельге, конань тейнек максозь Христос Иисусонь вельде. Синь ёрасть меки сувафтомс минь Моисеень койть урексшинц алу.5Но минь анцяй пингоняска ашеме макса пря тейст: ванфтовоза Пара кулять видешиц тинь кядьсонт.

6А сят, кит лувовсть содавикс оцюнякс кемаень пуромксса – тейне сембе сяка кодама синь оцюнят, вдь Шкайть инголе сембе фкат – монь кядьстон лия мезевок ашесть веше.7Меколанкт, синь няезь, Шкайсь монь лангозон путозе тевть – пачфнемс Пара кулять лия ломаньтналхненди, кода и Пёторонь лангс – пачфнемс еврейхненди.8Вдь Ся, кие лездсь Пёторонди покодемс апостолонь тевса еврейхнень ёткса, Ся тейненге лездсь покодемс лия ломаньтналхнень ёткса.

9Иаков, Кифа и Иоанн, конатне лувовсть кемаень пуромксонь юркс-нежекс, содазь тевть, кона тейне максфоль Шкайть пароказненц коряс. Эста синь венептезь кядьснон тейне и Варнаванди, кода марстонь тевонь тии ялганди. Минь саме фкя мяльс: тейнек молема лия ломаньтналхненди, а тейст молема еврейхненди.10Аньцек синь эняльдсть тейнек аф юкснемс лездомс Иерусалимонь ашуфненди, мезе мон оцю мяльса и тиендян.

Павел апрякасы Пёторонь Антиохияса

11Мзярда Пётр сась Антиохияв, мон сельмозонза апрякайне: сон вятезе прянц аф стане, кода эряволь.12Инголи сон ярхцась лия ломаньтналонь кемайхнень мархта. А мзярда састь Антиохияв Иаковонь ломаненза, Пётр ушедсь абонкшнема и явсь лия тналонь кемайхнень эзда, сяс мес пельсь киськопень керомать инкса ащи еврейхнень эзда.13Тяфта сонь лацонза шамафксонь канникс пряснон вятезь ляды кемай еврейхневок, нльне Варнававок шоворсь ёткозост.14Мзярда мон няине, синь аердсть виде киста, шарфтсть Пара кулять видешинц эзда, эста сембонь ингольде азыне Пёторонди: «Кда тон, шачемас коре еврейсь, эрят лия ломаньтналоннетнень лаца, а аф евреень лаца, эста мес кошярясак лия ломаньтналоннеть эрямс евреень лаца?»

Видексшись максови кемамать вельде

15Минь шачемас коре еврейхтяма, а аф лия тналонь пежу ломаттяма, кода тейст и мярьгихть.16Но минь содасаськ: ломанць Шкайть инголе лувови видексшинь ломанькс аньцек Иисус Христости кемамать вельде, а аф Моисеень койть коряс тиф тефнень вельде. Сяс миньге кемаме Иисус Христости вага мес: мяленьке арамс видексшинь ломанькс Христости кемамать вельде, а аф тефнень вельде, конат тифт койть коряс. Вдь тиендемок койть кошардоманзон коряс, кивок аф лувови видексшинь ломанькс Шкайть инголе.17Минь мяленьке арамс Шкайть инголе видексшинь ломанькс Христость мархта сотовомать вельде. А кда сембе сяка минь минценьге лувсамазь пежу ломанькс, эста лисенди – Христос лезды пежети касомс? Афтонга аф!18Кда мон одукс карман стяфтомонза сянь, мезе мзярда-бди калафтонь, эста мон монць няфтьса – мон колайне койть.19Мон койть вельде кулофан койти, и сяс мон тяни эрян Шкайть инкса. Мон Христость мархта марса эськотьфан крёзти,20и эрян ни аф монць, а Христоссь эряй эсон. И мзярс мон эрян тя ронгса, мон эрян кемазь Шкаень Цёрати, кона кельгомань монь и максозе Эсь эряфонц монь инксон.21Мон аф шарфтан Шкаень пароказнеть эзда. Вдь кда видексшись ломанти максови койть вельде, эста Христоссь кулось стакащемда.


предыдущая глава Глава 2 следующая глава