Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЕНЬ КОРЯС ЕВАНГЕЛИЯ

Глава 3

Иоанн Кстиндайсь аноклай ки Азорти

(Марк 1:1-8; Лук. 3:1-9; 15-17; Иоанн 1:19-28)

1Ся шитнень сась Иоанн Кстиндайсь и пачфнесь куля Иудеянь шавмодаса:2«Шарфтода Шкайти, сяс мес маладсь Менелень Оцязорксшись».3Иоанн ульсь ся, конань колга корхтась Исаия пророксь:
«Серьгядить вайгялец кайги шавмодаса:
"Аноклада Азорти ки,
видептесть Тейнза китнень-яттнень"».

4Иоаннонь щамоц ульсь ишимонь понаста, перьфксоц карксафоль шнань карксса. Ярхцамбялькс тейнза ульсть паксянь циледихне и вирень медсь.5Тейнза сашендсь пяк лама ломань Иерусалимста, сембе Иудеяста и Иордан ляйть перьфста.6Сон кстиндакшнезень ломаттнень Иордан ляйса, мзярда синь виденцякшнесть эсь пежесост.

7Сон ваны: кстиндама сашенды лама фарисейда и саддукейда, и мярьгсь тейст: «Пупай куень лефкст! Кие тонафтодязь тинь ворьгодемс Шкайть сай пингонь судонц эзда?8Эсь тевсонт няфтесть Шкайти шарфтомантень,9и тяда арьсе идемс прянтень валса: "Минь аляньке – Авраам". Корхтан тейнть: Шкайсь машты тиемс ня кефнень эзда Авраамонди итть.10Узерсь ащи ни шуфттнень юрснон ваксса: эрь шуфтть, кона аф канды цебярь имошт, керсазь и ёрдасазь толти.

11Мон кстиндатядязь тинь ведьса Шкайти шарфтомантень няфтеманкса, но мельган Молись мондедон вии. Мон аф кондястян кандомс Сонь сандалиянцка. Сон кармай кстиндамонт тинь Иняру Ваймопожфса и толса.12Сонь кядьсонза каймоц, и Сон понжафтсы сёроть тинголангса. Тозерть кочкасы утому, а ювть плхтасы аф мадонды толса».

Иисусонь кстиндамац

(Марк 1:9-11; Лук. 3:21,22)

13Эста Иисус сась Галилеяста Иорданть трвас Иоаннонь кядьста прянц кстиндафтома.14Иоанн тяряфнесь лоткафтомс Сонь и мярьгсь: «Тя Тейть эряволь монь кстиндамс, а Тон сать тейне?»15Но Иисус каршезонза мярьгсь: «Катк тяни ули тяфта; тейнек эряви тиемс ся, мезе ёрай эздонк Шкайсь». Эста Иоанн тяфта и тись.

16Кстиндамда меле Иисус эстокиге лиссь ведьста, и панжевсь Тейнза менельсь, и няезе Шкаень Ваймопожфть, кона гуляня лаца валгсь Сонь лангозонза.17И менельста кулевсь вайгяль: «Тя Монь кельгома Цёразе, Монь кенярдема вастозе».


*а 3:1 шавмода – пустыня

*б 3:2 Менелень Оцязорксши – Небесное Царство

*в 3:3 Исаия 40:3

*г 3:4 ишим – верблюд

*д 3:7 фарисей – тонафнеф еврей, кона кемоста ащесь Моисеень коенц ванфтоманц-кирдеманц инкса

*е 3:7 саддукей – озксвятиень оцюнять юромста еврей, кона ашезь кема аф ваймопожфненди, аф ангелхненди, аф кулофста вельмамати

*ж 3:10 имож – плод

*з 3:12 тинге – гумно

*и 3:12 утом – амбар

*к 3:12 юв – шелуха от колосьев


предыдущая глава Глава 3 следующая глава