Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ПАВЕЛОНЬ СЁРМАЦ КОЛОССЫ ОШЕНЬ КЕМАЙХНЕНДИ

Глава 2

Эряф Христосса

1Монь мялезе: содалесть тинь, кодама стака тюрема мон вятян тинь инксонт и Лаодикия ошень кемайхнень инкса, и сембонь сятнень инкса, конат вестеньге ашезь няенде монь шамазень.2Тянь семботь мон тиендьса, сяс мес мялезе кемокстамс тинь седиентень и сотомс тинь фкя-фкянь мархта кельгомань сотксса. Эста тинь пачкоттяда сембода крхка и питни шарьхкодемати: тинь карматада содамонза Шкайть салавашинц – Христость.3Сонь эзонза кяшфт сембе смузьшинь и содамошинь козяшитне.4Тянь корхтаса сянь инкса: кивок афоледязь васькафта тинь лестяй вал вельде.5Катк монь ронгозе аф мархтонт, но ваймозе мархтонт. Мон кеняртькшнян, мзярда няйса тинь марса ащемантень и тинь кеме кемамантень Христости.

6Тинь куледе Христос Иисус Азорть колга и нолдасть Сонь эсь седиезонт, сяс эряда мархтонза марса.7Кемокстасть унксонтень Христосса и касода-кеподеда Сонь эсонза. Катк кемамась, конанди тинь тонафтфтада, виензай эсонт и катк седиенте фалу ули пяшксе сюконямада.

8Ванода, кивок афоледязь вяте тинь кундамас ломанень эрь кодама тонафтоматнень и шава васькафнематень вельде, конатнень юрсна ащихть аф Христосса, а ломанень кунардонь обуцятнень эса и тя масторонь вяти вийхнень эса.9Вдь Христость ронгсонза Шкайть сембе пяшксешиц.10Тиньге ули пяшксешинте Христость эса, кона сембе оцюнятнень и азорксшитнень лангса прясь.

11Сонь эсонза тинь керфтада, аньцек аф ломанень кядьса тиф киськопень керомаса, а Христость керомаса, конань вельде ломанть лангста валхтови пежеть виец.12Тинь калмадязь Сонь мархтонза кстиндамаса и вельмафтодязь Сонь мархтонза, сяс мес тинь кемаде Шкайти, кона Эсь вийсонза вельмафтозе Христость кулофнень эзда.13Инголи тинь уледе кулофт коень коламантень и киськопень аф керфтомантень инкса. Но Шкайсь тиедязь тинь эряйкс марса Христость мархта. Сон нолдазень минь сембе пеженьконь.14Минь повоме шумос коень аф топафтоманкса, но Шкайсь нардазень минь шумоньконь. Сон сявозе минь шумоньконь мархта кагодть, кона ульсь тейнек каршек, и крёз лангс эськодемать вельде тя кагодсь юмафтозе эсь виенц.15Шкайсь сявозе вийть оцюнятнень и азорхнень кядьста, эрь кодама ваймопожфнень эзда, и сембонь ингольде сувафтозень синь визьксс, мзярда Христос няфтезе Эсь сяськоманц синь лангсост.

Христос и ломанень кардаматне

16Тяфта, катк кивок аф судендатядязь тинь сянкса, мезьда ярхцатада али сиптяда, ётафнесасть али аф ётафнесасть евреень илатнень, ковонь шачематнень и ваймамань шитнень.17Тя сембось аньцек цильф сянди, мезти эряви самс, а афкуксшись – тя Христоссь.18Тясть макссе судендамс эсь прянтень стама ломаттненди, конат атказакшнихть эрь шинь эряфть эзда, сяс мес ёрайхть няфтемс эсь пряснон сятявкс, конат сюконякшнихть ангелхненди и корхнихть аньцек эсь няйфксснон колга. Ня шава мяльхне-арьсематне тиендьсазь тяфтама ломаттнень вярьге прянь кандыкс.19Синь аш соткссна Христость мархта, Прять мархта, конань эзда сембе ронгсь сотови и кемокстави эзнетнень и саттнень вельде, и касы Шкайть мяленц коряс.

20Кда тинь кулоде Христость мархта и тяни эрятада воляшиса тя масторть вяти виензон эзда, эста мес тинь эрятада кода тя масторонь ломаттне и кирттяда тяфтама кардамада:21«Тяк сяве!», «Тят ярхца!», «Тяк тока!»?22Нят аньцек ломанень кардамат и тонафтомат. Эсост корхтави сянь колга, мезсь юмай тевс нолдамада меле.23Тя кардаматне аньцек няевихть смузюкс. Синь вятихть аф афкуксонь сюконямас Шкайти, шама лангонь сятявшис и ронгонь маятафтомас, но мезьсонга аф лездыхть. Синь аньцек вятихть ронгть топафтоманцты.


*а 2:8 масторонь вяти вийхне – стихии мира

*б 2:19 эзне – сустав

*в 2:19 сан – сухожилие

*г 2:21 Еврейхнень ульсь лама койдост, конат корхтасть тейст: кда синь кармайхть ярхцама сяда, мезсь аф мярьгондеви, эста синь улихть аф аруфт и аф маладовихть Шкайти. Колоссы ошса васькафни тонафтыхне мярьгондсть Христости кемайхненди тяфта: «Кда тинь ули мяленте эрямс Шкайть мяленц коряс, эста тейнть эряви топафнемс ня евреень койхнень».


предыдущая глава Глава 2 следующая глава