Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЕНЬ КОРЯС ЕВАНГЕЛИЯ

Глава 9

Иисус пчкафтсы параличса колафть

(Марк 2:1-12; Лук. 5:17-26)

1Эста Иисус озась венчти, уезе меки эрьхкть и пачкодсь ся ошти, коса эрясь.2И вов, Тейнза кандсть ацам лангса сяряди, кона колафоль параличса. Мзярда Иисус няезе кемамаснон, мярьгсь сярядити: «Тят пеле, цёрай, тонь пежетне нолдафт».

3Эста койти тонафтыхнень эзда кой-конат арьсесть: «Тя ломанць рахси Шкайть лангса».4Но Иисус шарьхкодезень синь арьсемаснон и мярьгсь: «Мес тинь тяфта кальдявста арьсетяда?5Мезсь сяда тёждя азомс: "Тонь пежетне нолдафт" али: "Стяк и якак"?6Но тяни содасть: Ломанень Цёратьмодать лангса ули азорксшиц нолямс пежет». Эста Иисус мярьгсь параличса колафти: «Стяк, сявк ацамцень и архт эсь кудозт».7Ся стясь и тусь эсь кудозонза.8Тянь няемста сембе дивандасть и кармасть шнамонза Шкайть, кона макссь ломаттненди тяшка азорксши.

Иисус тердьсы Матфеень

(Марк 2:13-17; Лук. 5:27-32)

9Сяда тов молемста, Иисус няйсь ломань, кона озадоль каяфксонь кочкама вастть ваксса. Сонь лемоцоль Матфей. Иисус корхтай тейнза: «Мольхть Монь мельган». Матфей стясь и тусь Иисусонь мельге.

10Мзярда Иисус ярхцась Матфеень пяле, тоза састь ламоц каяфксонь кочкайхне и лия пежуфне и озасть фкя шра ваксс Иисусонь и Сонь тонафниензон мархта.11Фарисейхне няезь тянь и кармасть тонафнихнень кизефнема: «Мес тинь Тонафтыенте ярхцай каяфксонь кочкайхнень и лия пежуфнень мархта?»12Иисус марязе тянь и мярьгсь: «Пчкафтысь эряви аф шумбрати, а сярядити.13Арда шарьхкодесть, кодама смузь кандыхть Сёрматфксонь ня валхне: "Мон учан эздонт кельгозь ужяльдема, а аф озксказнень каннема". Мон сань пежу ломаттнень Шкайти шарфтоманкса, а аф видексшиса эряйхнень».

Кизефкс постонь кирдемать колга

(Марк 2:18-22; Лук. 5:33-39)

14Эста Иисусти маладсть Иоаннонь тонафниенза и кизефтезь: «Мес минь и фарисейхне сидеста кирттяма пост, а Тонь тонафнихне – аф?»15Иисус мярьгсь тейст: «Кали пичедихть рьвяяма илань инжихне, мзярда рьвяяйсь мархтост? Но сайхть шит, мзярда рьвяяйть сявсазь ёткстост, и эста синь кармайхть поставама.

16Кивок аф панни ташта щамти од щамста сязьф панкс; сяс мес од панкссь озай и варясь сядонга келеми.17Стане жа аф кайсихть и од вина кедень ташта кяскавс, сяс мес кедень кяскафне сязевихть, винась шуди и кяскафне юмайхть. Од винать кайсесазь кедень од кяскавс, эста и винаське и кяскафневок ванфтовихть».

Иисус вельмафтсы кулофста оцюнять стиренц и пчкафтсы сяряди авать

(Марк 5:21-43; Лук. 8:40-56)

18Мзярда Иисус корхтась тейст тянь колга, Тейнза маладсь фкя оцюня, прась пильгозонза и кармась корхтама: «Монь стирезе аньцек тяни кулось. Сак, путыть лангозонза кяттнень, и сон кармай эряма».19Иисус стясь и тусь мельганза, тонафниензовок мольсть мельгаст.

20Тя пингоня фкя авась, кона кемгафтува киза сярядсь веронь шудемаса, фталда маладсь Иисусонди и токазе Сонь щамонц пенц.21Авась эсь пачканза арьсесь: «Кда аньцек токаса Сонь щамонц, пчкан».22Иисус шарфтсь, няезе сонь и мярьгсь: «Стирняй, тят пеле, кемамаце пчкафтонзе тонь». И авась эстокиге пчкясь.

23Мзярда Иисус сувась оцюнять кудс и няезень нюдиса морайхнень и явсихнень,24Сон мярьгсь тейст: «Лиседа тяста. Стирнясь ашезь кула, сон уды». Иисусть лангса кармасть пеетькшнема.25Мзярда ломаттнень лихтезь, Сон сувась тоза, косоль кулофсь. Сявозе стирнять кядьта, и ся стясь.26Тянь колга кулясь срадсь сембе ся аймакова.

Кафта сокорхнень пчкафтомасна

27Мзярда Иисус тусь тоста, мельганза мольсть кафта сокорхт и юватькшнесть: «Иисус, Давидонь Цёрац, ужяльдемасть минь28Мзярда Иисус сувась кудботмос, сокорхне маладсь Тейнза. Иисус кизефтезень синь: «Тинь кематада, Тейне тиеви тя?» Сят корхтайхть Тейнза: «Кематама, Азор!»29Эста Сон токазень сельмоснон и мярьгсь: «Катк ули тейнть кемамантень коряс», –30и сокорхне кармасть няема. Иисус кемоста мярьгсь: «Ваность, катк тянь колга кивок аф кармай содама».31Синь лиссть тоста и сембе сяка азондсть Иисусонь колга сембе ся аймакова.

Аф корхтайть пчкафтомац

32Ашесть кенере сят лисемс, кода Иисусти вятсть аф корхтай аля, конань колазе кяжи ваймопожфсь.33Мзярда эздонза паньфоль кяжи ваймопожфсь, аф корхтайсь корхтазевсь. И ломаттне дивандазевсть: «Израильса тяфтама нинге мзярдовок ашель».34А фарисейхне тянь каршес корхнесть: «Сон кяжи ваймопожфнень оцюняснон вийса панцесыне кяжи ваймопожфнень».

Нумада лама, а покайда кржа

35Иисус якась сембе ошева и велева, тонафтсь тостонь синагогава, азондсь Пара куля Оцязорксшить колга, пчкафнезень ломаттнень эрь кодама урмада и сярятьфта.36Мзярда Иисус няезень пуромф ломаттнень, синь ужялькс арасть Тейнза, сяс мес ульсть пяк сизефт и сратфт, кода учат, конатнень аш ванысна.37Эста Сон корхтай Эсь тонафниензонды: «Нумада лама, а покайда кржа;38ина эняльдеда нумать Азоронцты, кучеза сёронь кочкайхть Эсь паксянц лангс».


*а 9:1 Ся ошсь ульсь Капернаум.

*б 9:6 Ломанень Цёра – тя Иисусонь лемоц, кона няфнесы: Сон Шкаень кучф Иди.

*в 9:10 Ся пинкнень синь ярхцсесть шра ваксса пялес велязь.

*г 9:13 Сёрматфкс – Писание, книги Библии

*д 9:13 кельгозь ужяльдема – милость

*е 9:22 Тя валсь греконь кяльста нинге ётафневи кода: идензе.

*ж 9:23 нюди – свирель

*з 9:27 Давидонь Цёра – лемнемок Иисусонь тя лемса, сокорхне лувозь Сонь Шкайть эзда кучф Идикс, кона пророкнень азондомаснон коряс лиси Давид оцязорть юромста.


предыдущая глава Глава 9 следующая глава