Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЕНЬ КОРЯС ЕВАНГЕЛИЯ

Глава 26

Евреень озксвятихне арьсихть, кода шавомс Иисусонь

(Марк 14:1,2; Лук. 22:1,2; Иоанн 11:45-53)

1Мзярда Иисус аделазе тя сембе корхтаманц, мярьгсь тонафниензонды:2«Тинь содасасть: кафта шида меле Очижись. Эста Ломанень Цёрать мисазь и эськодьсазь крёз лангс».

3Ся пингть озксвятиень оцюнятне, койти тонафтыхне и ломаньтналонь оцюнятне пуромсть Каиафа озксвятиень оцюнять кудозонза4и арьсесть эсь ётковаст, кода салава кундамс Иисусонь и шавомс Сонь.5«Аньцек аф Очижинь шиня, – корхтасть синь, – афольхть кеподе ломаттне».

Иисусть танцти шине вайса вадемац

(Марк 14:3-9; Иоанн 12:1-8)

6Мзярда Иисус ульсь Вифанияса Симононь пяле, кона инголи сярядсь наксафты урмаса,7нажядсь Тейнза ава алебастрань сяканя мархта, конац пяшксель пяк питни и танцти шине вайда. Авась кайсезе вайть Иисусонь пряванза, мзярда Сон ярхцась.8Тянь няемста тонафнихе кяжиясть и эсь ётковаст корхтасть: «Мезенди тяфтама карьхцнень тиендемс?9Тя вайсь пяк питниста миволь, а ярмакне максовольхть ашуфненди».

10Иисус кулезе тянь и мярьгсь тейст: «Мезенди кольфнесасть авать мяленц? Сон пара тев тись Тейне.11Ашуфне фалу кармайхть мархтонт, а Мон улян мархтонт аф фалу.12Валомок Монь тя вайса, сон аноклазе ронгозень калмамас.13Видеста корхтан тейнть: сембе масторть келеса, коса азондсазь тя Пара кулять, тоса аватьке лятфтасазь и сянь, мезе сон тись».

Иуда срхкась мимс Иисусонь

(Марк 14:10,11; Лук. 22:3-6)

14Эста кемгафтува тонафнихнень эзда фкясь, конань лемоцоль Иуда Искариот, тусь озксвятиень оцюнятненди15и корхтай: «Мезе макстада тейне, кда мон миса тейнть Иисусонь?» Синь надияфтсть тейнза тянкса максомс сиянь колмогемонь ярмак.16И ся пингста сявомок Иуда кармась вешендема ётка, мзярда мимс Иисусонь.

Очижинь илядень ярхцамась

(Марк 14:12-26; Лук. 22:7-23; Иоанн 13:21-30; 1 Кор. 11:23-25)

17Аф шапама кшинь илать васенце шистонза Иисусонди нажядсть тонафниенза и кизефнесазь: «Коза мярьгат анокламс Тейть очижинь ярхцамать?»18Иисус мярьгсь: «Арда ошу тяфтама-тяфтама ломанти и мярьгода тейнза: "Тонафтыеньке корхтай: Монь пингозе сась. Тонь ширесот Мон ётафтса очижить Эсь тонафнинень мархта"».19Тонафнихне тисть стане, кода мярьгсь Иисус, и анокласть очижинь ярхцама.

20Мзярда сась илядьсь, Иисус озась шрать ваксс тонафниензон мархта.21Ярхцамста Иисус мярьгсь: «Видеста корхтан тейнть: ёткстонт фкясь мисамань Монь».22Тонафнихне прасть оцю ризфс и ушедсть фкя-фкянь мельге кизефнема: «Азор, тя аф монан?»23Иисус каршезост мярьгсь: «Монь мисамань ся ломанць, кона навасы кшинц мархтон марса фкя шавас.24Ломанень Цёрась моли стане, кода сёрматф колганза, но вай кодань кальдяв ули ся ломанти, кона мисы Ломанень Цёрать! Ся ломанти сяда пара улель афи шачендомс».25Эста Иуда, конац ёразе Сонь мимс, кизефнесы: «Тонафты, тя аф монан?» Иисус каршезонза мярьгсь: «Тон тянь азыть».

26Мзярда синь ярхцасть, Иисус сявозе кшить, бславазе, синдезе и, явондозь тонафниензонды, мярьгсь: «Сявость и ярхцада, тя Монь ронгозе».27Сяльде сявозе кядьготь, азсь сюконяма Шкайти, венептезе тонафниензонды и мярьгсь: «Симода эздонза сембе,28тя Монь верозе, од сотксонь вер, кона валови сембе ломаттнень пежеснон нолдаманкса.29Корхтан тейнть, тячиень шиста сявомок Мон аф симан виноградонь винада ся шить самс, мзярда Мон тинь мархтонт симан од винада Алязень Оцязорксшисонза».

30Шкайти шнама моронь морамда меле синь тусть Вайшуфта пандть лангс.

Иисус инголькиге азонды Пёторонь потаманц колга

(Марк 14:27-31; Лук. 22:31-34; Иоанн 13:36-38)

31Эста Иисус корхтай тейст: «Тя веня тинь сембе Монь эздон потатада, вдь азф Сёрматфксса:
"Шавса учань ваныть и учатне срадыхть".

32Но вельмамдон меле Мон тиндедонт инголи молян Галилеяв».33Пётр корхтай каршезонза: «Кда мянь сембе Тонь эздот потайхть, мон тянь мзярдовок аф тиса».34«Видеста корхтан тейть, – мярьгсь тейнза Иисус, – тя веня атёкшсь аф кенери моразевомс, кода тон колмоксть потат Монь эздон».35Пётр тага корхтай Тейнза: «Кда тейне саволь мархтот куломс, эстовок афолень пота эздот». Тяфта корхтасть сембе лия тонафниензовок.

Иисус озонды Гефсиманиянь переса

(Марк 14:32-42; Лук. 22:39-46)

36Сяльде Иисус сась тонафниензон мархта ся вастти, кона лемневи Гефсимания, и корхтай тейст: «Ащеда тяса, мзярс Мон молян озондан тоса».37Сон сявозень мархтонза Пёторонь и Зеведеень кафцьке цёранзон. Иисус прась ризфс и тошнас.38Сон корхтай тейст: «Куломшка ризнай ваймозе. Ащеда тяса мархтон и тяда уда».39Иисус аердсь аф ламода шири, прась модать лангс и ушедсь озондома: «Аляй! Кда ули кода, ётафтк маятамань кядьготь Монь вакскан. Аньцек улеза аф Монь, а Тонь мяльцень коряс».

40Иисус мрдась тонафниензонды и сатозень синь удозь. Корхтай Пёторонди: «Вов, тинь Монь мархтон фкя частовок ашеде кирдев апак удок?41Тяда уда, озондода: варчсемстонт афоледе пра пежес. Ваймось анок паронь тиемс, а ронгсь лафча».

42И омбоцеда Иисус аердсь озондома: «Аляй! Кда аф ётафтови вакскан тя маятамань кядьгось, и Тейне эряви сонь симомс, эста катк ули Тонь мяльцень коряс».43Мрдамстонза Сон тага сатозень синь удозь, сяс мес сельмосна коневсть.

44Иисус тага аердсь шири и кармась колмоцеда озондома сяка валса.45Сяльде мрдась Эсь тонафниензонды и корхтай тейст: «Тинь нинге удотада и ваймосетяда? Вага, сась пингсь, мзярда Ломанень Цёрась максови пежуфнень кядьс.46Стяда, аряда! Вага, Монь миизе маладсь».

Иисусонь кундамац

(Марк 14:43-50; Лук. 22:47-53; Иоанн 18:3-12)

47И мзярда Иисус нинге корхтась, сась Иуда, кемгафтува тонафниензон эзда фкясь. Сонь мархтонза сась тор и пяль мархта лама ломань, конатнень кучезь озксвятиень оцюнятне и ломаньтналонь оцюнятне.48Иуда инголькиге ладязе мархтост, кода тейст содамс Иисусонь: «Кинь паласа, ся Сон, Сонь сявость».49Иуда эстокиге нажядсь Иисусонди и мярьгсь: «Шумбрат, Тонафты!» И палазе Сонь.50Иисус корхтай тейнза: «Ялгай, мезенди тон сать?» Эста лиятневок нажядсть Иисусонди, фатязь Сонь, и сявозь пякстамс.

51И тяса, Иисусонь мархта ащихнень эзда фкясь таргась тор, яфодсь озксвятиень оцюнять покодиенц лангс и керозе пиленц.52Эста Иисус мярьгсь тейнза: «Путк торцень вастозонза, сяс мес эрсь, кие кеподи тор, ся эздонза и кулы,53али арьсят: Тейне афоль вешев Алязень кядьста лезкс? Сон эстокиге кучель Тейне кемгафтува легионда лама ангел!54Но эста афольхть пяшкоде Сёрматфксонь валхне, конат корхтайхть: тянди улема».

55Меле Иисус мярьгсь ломаттненди: «Тинь саде Монь сявомс торса и пяльса, кода нельги-шави ломанень мельге! Мон эрь шиня озафолень мархтонт Шкаень кудса и тонафтонь, и тинь ашемасть сявонде.56Но сембось тя лиссь пророкнень сёрматфснон пяшкодеманкса».

Эста сембе тонафнихне кадозь Иисусть и ворьгодсть.

Иисус Оцю пуромксть инголе

(Марк 14:53-65; Лук. 22:54,55,63-71; Иоанн 18:13,14,19-24)

57Иисусонь фатяенза вятезь Сонь Каиафа озксвятиень оцюняти. Тоза пуромсть ни койти тонафтыхне и ломаньтналонь оцюнятне.58Пётр мольсь ичкозьге Иисусонь мельге озксвятиень оцюнять пирьфонцты пачкодемс. Сувась, озась Шкаень кудть ванфтыензон ёткс и кармась учсема, мезьса тя сембось аделави.

59Озксвятиень оцюнятне, ломаньтналонь оцюнятне и сембе Оцю пуромкссь вешендсть васькафни няфтемат Иисусонь каршес. Тяфта улель туфталсна максомс Сонь куломас.60Аньцек кодамовок туфтал ашесть мушенда, хуш васькафни няида-кулида ульсь пяк лама. Мекпяли лиссть кафта ломатть61и мярьгсть: «Тя Ломанць корхнесь: "Тейне срафтови Шкаень кудсь и колма шиста меки тиеви"».

62Эста озксвятиень оцюнясь стясь и кизефтезе Иисусонь: «Мес мезевок аф корхтат? Тейть аш мезе азомс синь няфнемаснон каршес?»63Но Иисус ащесь апак каштортт. Тага озксвятиень оцюнясь пшкядсь Тейнза: «Мярьган Тейть: эряй Шкайть лемса варазь азк тейнек – Тон Христоссят, Шкайть Цёрацат?»64Иисус каршезонза корхтай: «Тон тянь азыть. И нинге тейнть мярьган: курок тинь няйсасть Ломанень Цёрать, кона ащи озада Виить види кядь ширесонза и кона сай менелень коволхнень лангса».65Эста озксвятиень оцюнясь сязезе щамонц и мярьгсь: «Сон сялдсы Шкайть! Кодама нинге няихть-кулихть тейнек эрявихть? Тинь тинць тяни кулесть, кода Сон сялдсы Шкайть!66Мезе мярьктяда?» Синь корхтайхть каршезонза: «Сон мувору и Тейнза кулома!»

67Сяльде синь кармасть сельгондема шамазонза и эрьхнемонза. Кой-конат пикссезь шама ланга68и корхтасть: «Христос, пророчендак тейнек, кие Тонь эрьхтензе!»

Пётр потай Иисусонь эзда

(Марк 14:66-72; Лук. 22:56-62; Иоанн 18:15-18, 25-27)

69Пётр озафоль озксвятиень оцюнять кудонц пирьфса. И нажядсь тейнза покоди ава и мярьгсь: «Тонга улеть Галилеянь Иисусть мархта».70А Пётр сембонь ингольде сёпсь: «Мон аф шарьхкодьса, мезень колга тон корхтат».71Ортава лисемста лия покоди ава няезе сонь и мярьгсь тоса ащихненди: «Тявок ульсь Назаретонь Иисусть мархта».72Пётр тага сёпсь и мярьгсь: «Варан, мон Сонь аф содаса».73Аф лама пингта меле Пёторонди нажядсть тоса ащихне и мярьгсть тейнза: «Видекс тон эздост фкясят, тя шарьхкодеви корхтамаценьге коряс».74Эста Пётр кармась варама Шкайть лемонц кунцезь: «Мон аф содаса Тя Ломанть». Тяса моразевсь атёкшсь,75и Пётр лятфтазень Иисусонь валонзон: «Атёкшсь аф кенери моразевомс, кода тон колмоксть потат Монь эздон». Сон лиссь и ризфта пяшксе седиса аварьгодсь.


*а 26:17 Аф шапама кшинь ила – тя сисем шинь кувалмоса ила, кона сотф евреень очижить мархта. Ня шитнень мярьгондеви ярхцамс аф шапама кшида сяпи тише мархта и каннемс озксказнет. Тя сембось тиендеви кода лятфнембяль ся пингти, мзярда еврейхне ворьгодсть Египетста и ашесть кенере шорямс кшинди шапакс.

*б 26:28 соткс – тяса: завет, союз

*в 26:31 Захария 13:7

*г 26:53 легион – кунардонь Римса ушманонь сембода оцю отрядсь, конань эса кота тёжятть тюри


предыдущая глава Глава 26 следующая глава