Выбрать язык
Книги Ветхого Завета
Книги Нового Завета
с русским текстом1Сяда меле Иисус кармась корхтама ломаттненди и Эсь тонафниензонды:2«Койти тонафтыхне и фарисейхне арасть Моисеень вастс койть смузенц панчсема.3Сяс кулхцондость синь и сембоса тиеда стане, кода мярьгихть. Но синь тевснон лаца тефт тяда тиенде, сяс мес синь корхтайхть фкя, а тиихть лия.4Синь веляфнесазь аф кандови и стака канкснень ломаттнень лафтуснон лангс, а синць сурснонга аф шерьхфтьсазь лездомс тейст.5Семботь тиендьсазь аньцек ломаттненди няфтеманкса. Кодама оцюфт и келихть Сёрматфксть мархта коробканясна*а и кодама кувакат панарсост цёкне!6Синь кельгсазь озсемать эзембряв иласа и васенце васттненди синагогаса,7кельгсазь мишендема-рамсема вастова шумбракснема-шнама валонь кочксемать, и мзярда ломаттне лемнесазь: "Тонафтыеньке!"
8А тинь тяда мярьгонде лемнемс эсь прянтень тонафтыкс, сяс мес тонафтыенте фкя – Христоссь, а фкя-фкянди тинь сембе – браттада.9Алякска мастор лангса тясть лемне киньге, сяс мес тинь аньцек фкя Алянте, кона менельса.10Вятикска катк аф лемнетядязь тинь, сяс мес тинь вятиенте фкя – Христоссь.11Ся, кие ёткстонт сембода оцю, катк ули тейнть покодикс.12Сяс мес, кие оцюлгофнесы эсь прянц, ся ёмлалгофтови, а кие ёмлалгофнесы эсь прянц, ся оцюлгофтови».
13«Кальдяв тейнть, койти тонафтыхть и фарисейхть! Шамафксонь каннихть! Тинь сёлгондсасть ломаттнень эзда Менелень Оцязорксшить. Тинцьке аф сувсетяда и сятненьге, кинь мяльсна сувамс, аф нолясасть.
14Кальдяв тейнть, койти тонафтыхть и фарисейхть! Шамафксонь каннихть! Тинь сивондьсасть-ётафнесасть удаватнень*б мекольценяснон и прянь няфтеманкса куватьс озонкшнетяда. Тянкса Шкайсь нинге сяда кемоста судендатядязь.
15Кальдяв тейнть, койти тонафтыхть и фарисейхть! Шамафксонь каннихть! Эсь кемамазонт хуш фкя ломанень сувафтоманкса тинь ётнесасть оцюведть и масторть. И мзярда сувафтсасть, тиендьсасть сонь аду повикс, кафксть сяда кальдявкс эсь корязонт.
16Кальдяв тейнть, сокор вятихть! Тинь тонафттада: "Кда кие варай Шкаень кудть лемса, тя нинге мезевок аш, а кда варай Шкаень кудть зрнянц лемса, эста тейнза валонц эряви кирдемс".17Вай, ёньфтомот и сокорхт! Мезсь сяда оцю, зрнясь али Шкаень кудсь, кона тя зрнять иняруяфтсы*в?18И нинге тонафттада: "Кда кие варай алтарть лемса, тя нинге мезевок аш, а кда кие варай алтарти кантф озксказнеть лемса, сянди валонц эряви кирдемс".19Сокорхт! Мезсь сяда оцю, алтарти кантфсь али алтарсь, кона тя кантфть иняруяфтсы?20Тяфта, кие варай алтарть лемса, варай и алтарти кантфть лемсовок.21И ся, кие варай Шкаень кудть лемса, ся варай и Шкаень кудса Эряйтьке лемса.22И кие варай менельть лемса, ся варай Шкайть озама вастонцка лемса и Сянь лемса, кие озаф лангсонза.
23Кальдяв тейнть, койти тонафтыхть и фарисейхть! Шамафксонь каннихть! Тинь макссесасть Шкайти кемонце пяльксть ярхцама тишетнень эзда: путлекста, капёрста, камбраздишеста*г, а койста инь эрявиксть юкснесасть – видешить, кельгозь ужяльдемать, Шкаень мялень ваномать. Тявок эряви тиемс, и сяньге колга аф юкснемс.24Сокор вятихть! Тинь сяськть педясасть, а ишимть нильсасть!
25Кальдяв тейнть, койти тонафтыхть и фарисейхть! Шамафксонь каннихть! Тинь аруяфнесасть кядьготнень и шаватнень лангснон, а потмосна пяшксет сяда, мезе тинь сатоде салазь и васькафнезь.26Сокор фарисей! Васенда аруяфтк кядьготь и шавать потмонц, эста лангоцка аруяй.
27Кальдяв тейнть, койти тонафтыхть и фарисейхть! Шамафксонь каннихть! Тинь кода акшептф лазксне, конат уша ширде няевихть мазыста, а потмосна пяшксет кулофонь пакарьда и наксаткста.28Стане тиньге: лангозонт ванозь, няефтяда ломаттненди видексшинь ваймокс, а потмоширде – шамафкссотада и пяшксетяда коень колай тевда.
29Кальдяв тейнть, койти тонафтыхть и фарисейхть! Шамафксонь каннихть! Тинь тиенттяда мялямгефт*д пророкнень калмоснон лангса и мазопнесасть видексшинь ломаттнень калмолангснон.30Тинь корхтатада: "Кда минь эрялеме атянь-атяньконь пингста, эста афолеськ шудефте синь мархтост пророкнень верснон".31Тяфта тинь тинць корхтатада эсь лангозонт, няфтьсасть: тинь сятнень цёраснотада, конат шавондозь пророкнень.32Стане шумордасть сянь, мезть ушедозь тинь алянте!33Куйхть, пупай куень лефкст! Кодавок аф ворьгодефтяда судендамать и аду повомать эзда.
34Кулхцондода! Мон кучан тейнть пророкт, смузю ломатть и койти тонафтыхть. Кой-конатнень синь ёткстост тинь шавсасть и эськодьсасть крёз лангс, а лиятнень карматада пикссемост эсь синагогавант и панцемост ошста ошс.35Тинь лангозонт прай муворшись сембе пророкнень верснон инкса, кона валовсь масторлангса, ушедомок видексшинь Авелень веронц эзда и Захариянь, Варахиять цёранц веронц самс, конань тинь шавость Шкаень кудть и инголенза ащи алтарть ёткса.36Видеста корхтан тейнть: тя пингонь ломаттненди сави пандомс сембе ня кальдяв тефнень инкса».
37«Иерусалим, Иерусалим! Пророкнень шавондысна и тейть кучфнень кевса пикссисна! Мзярксть Мон ёрань кочкамс тонь эряйхнень, кода нармонць кочксесыне эсь пацянзон алу лефксонзон, но тинь ашель мяленте.38И вов, тинь кудонте кадови шава.39Корхтан тейнть: тячиста сявомок тинь Монь аф няйсамасть снярс, мзярс аф мярьктяда: "Бславаф Азорть лемса Сайсь!"»
*а 23:5 Коробканя – тя кедьста тиф коробканя, конань потмос еврейхне путнесазь Моисеень койста башка сёрматфксть, и озондомста сотнекшнесазь конязост и кержи кядезост.
*б 23:14 удава – вдова
*в 23:17 иняруяфтомс – освятить
*г 23:23 путлек – мята, капёр – укроп, камбраздише – тмин
*д 23:29 мялямгев – памятник
Глава 23