Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЕВРЕЙХНЕНДИ СЁРМАСЬ

Глава 5

1Эрь озксвятиень оцюнясь кочкави ломаттнень ёткста и путови покодемс Шкайти ломаттнень инкса: каннемс казнет и озксказнет пежеснон инкса.2Сон машты ужяльдезь пшкядемс сятненди, конатнень аш содамошисна и конат васькафтфт-эрьготьфт, сяс мес сон сонць, кода и сембе – лафча ломань.3И тянкса тейнза эряви каннемс озксказнет кода лиятнень инкса, стане жа эсь пежензон инкса.4Киндинге аф сявови эсь лангозонза тяфтама питни тев. Сонь тя тевти тердьсы Шкайсь, кода ульсь Аарононьге мархта.

5Тяфта Христосовок аф Сонць Эстейнза сявозе иневалдть улемс озксвятиень оцюнякс, но Сонь путозе Ся, кие мярьгсь Тейнза:
«Тон Монь Цёразят, тячи Мон шачфтыхтень Тонь».

6И лия вастса Шкайсь корхтай:
«Тон улят озксвятикс сембе пинкненди,
Мелхиседеконь лаца».

7Иисус, масторлангонь эряфонц пингста, оцю вайгяльса авардсь и, эняльдезь, сельмоведь мархта озондсь Шкайти, конань ульсь виец идемс Сонь куломада. И Сон ульсь кульф Шкайть мяленц ваноманц инкса.8Хуш Сон Шкаень Цёра, сякокс, Эсь маятаманзон вельде Сон тонадсь кулхцондома.9И мзярда тянь вельде арась прокс анококс, Сон тиевсь пефтома пингс идемань кандыкс сембонди сятненди, конат кулхцондсазь Сонь,10и Шкайсь Сонь лемдезе Озксвятиень оцюнякс Мелхиседеконь лаца.

Ваймопожфонь ярхцамбяль

11Тянь колга минь маштолеме лама азондомс, аньцек стака тейнть тянь пачфтемс, сяс мес тяни тинь араде аф оцю мяльса кулхцондыкс.12Тейнть кунаркиге эряволь улемс лия ломанень тонафтыкс, аньцек вага, тинь тинцень эряви тага тонафтомс васенце содамошитненди Шкаень валса. Тейнть эряви лофца, а аф калгода ярхцамбяль.13Эрсь, конань нинге аннесазь лофцта, аф шарьхкоди видексшить колга тонафтомаса, сяс мес сон пиже шаба.14А вага калгода ярхцамбяльсь максови сятненди, конат кассть. Синь потмонь марямасна эряфонь тевснон вельде тонадсть явомонза сянь, мезсь пара и мезсь кальдяв.


*а 5:5 Псалтирь 2:7

*б 5:6 Псалтирь 109:4


предыдущая глава Глава 5 следующая глава